Last updated on October 11th, 2023 at 04:46 pm
ಕುಡ್ಲ, ಅಕ್ಟೋಬರ್ 11: ಎದುರು ಪೋವೊಂದಿತ್ತಿನ ಲಾರಿ ಒಂಜಿ ಸಡನ್ ಬ್ರೇಕ್ ಪಾಡಿನೆರ್ದಾವರ ಲಾರಿದ ಪಿರವು ಇತ್ತಿನ ಸ್ಕೂಟರ್ ಸವಾರೆ ಅಂಕೆ ತತ್ತ್‌ದ್ ಬೂರ್ದ್ ತೀರ್ದಿನ ನಡಕೆ ರಾಷ್ಟ್ರೀಯ ಪೆರ್ಸಾದಿ 66ತ ನೇತ್ರಾವತಿ ಸಂಕೊಡು ಇನಿ ಕಾಂಡೆ ನಡತ್‌ದ್ಂಡ್.
ತೀರ್ದಿನಾರ್ ಮೂಲತಃ ಉಳ್ಳಾಲದ, ಇತ್ತೆ ಕೋಟೆಕಾರ್‌‌ಡುಪ್ಪುನ ಹನೀಫ್ ಪನ್ಪಿನಾರೆನ ಮಗೆ ಅಝ್‌ವೀದ್ (21)ಪಂದ್ ತೆರಿದ್‌ಬೈದ್ಂಡ್. ಅಝ್‌ವೀದ್ ಡಕ್ಕೆಗ್ ಮೀನ್‌ಗಾರಿಕೆದ ಬೇಲೆಗ್ ತನ್ನ ಸ್ಕೂಟರ್‌ಡ್ ಪೋವೊಂದುಪ್ಪುನಗ ನೇತ್ರಾವತಿ ಸಂಕೊಡು ಆರೆನ ಸ್ಕೂಟರ್‌ದ ಎದುರು ಪೋವೊಂದಿತ್ತಿನ ಮೀನ್‌ದ ಲಾರಿ ಸಡನ್ ಬ್ರೇಕ್ ಪಾಡ್ದ್ಂಡ್. ಈ ಪೊರ್ತುಡು ಪಿರವುಡಿತ್ತಿನ ಸ್ಕೂಟರ್ ಅಂಕೆ ತತ್ತ್‌ದ್ ಲಾರಿಗ್ ಎಡ್ತ್‌ದ್ಂಡ್. ಎಡ್ತಿನೆರ್ದಾವರ ಅಝ್‌ವೀದ್‌ಗ್ ಗಾತಿದ ಪೆಟ್ಟಾದ್, ಅಪಗನೇ ಮುಟ್ಟದ ಆಸ್ಪತ್ರೆಗ್ ಸೇರಾಯೆರ್. ಪರೀಕ್ಷೆ ಮಲ್ತಿನ ಬೈದ್ಯೆರ್ ಅಝ್‌ವೀದ್ ತೀರ್ದೆ ಪಂದ್ ಘೋಷಣೆ ಮಲ್ದೆರ್. ತೆನ್ಕಾಯಿ ಸಂಚಾರ ಸ್ಟೇಷನ್ ಪೊಲೀಸೆರ್ ಜಡ್ತೆ ಮನ್ತೊಂದುಲ್ಲೆರ್.