Last updated on October 12th, 2023 at 03:50 pm
ಇಸ್ರೇಲ್-ಹಮಾಸ್ ಕೊಲಲ ಪಡ್ಡಾಯಿ ಬೊಕ್ಕ ಮಧ್ಯಪ್ರಾಚ್ಯೊದ ದೇಶೊಲೆಗ್ ಮಲ್ಲ ಮಂಡೆಬೆಚ್ಚ ಆತ್ಂಡ್. ಕೆಲ ದೇಶೊಲು ಇಸ್ರೇಲ್‌ಗ್ ಬೆರಿತಾಂಗ್ ಕೊರ್ಯಂಡ, ಕುಡ ಕೆಲ ದೇಶೊಲು ಪ್ಯಾಲೆಸ್ತೀನ್ ಸಶಸ್ತ್ರ ಕೂಪೆಗ್ ಬೆರಿತಾಂಗ್ ಕೊರೊಂದುಲ್ಲ. ಇಸ್ರೇಲ್ದ ವಿದೇಶಾಂಗ ಸಚಿವಾಲಯ ಸುಮಾರ್ 84 ರಾಷ್ಟ್ರೊಲು ಇಸ್ರೇಲ್‌ಗ್ ಬೆರಿಬಲ ಕೊರ್ಪುನ ಪಾತೆರೊನು ಬುಡುಗಡೆ ಮಲ್ದ ಪಂದ್ ಪಂಡೊಂದುಂಡು. ಕೆಲ ವರದಿಲೆನ ಪ್ರಕಾರ, ಇಸ್ರೇಲ್‌ಡ್ ನಡತಿನ ಈ ನರಮೇಧೊಗು ನೆವನ ಆತಿನ ಹಮಾಸ್‌ದ ಅನಿರೀಕ್ಷಿತ ದಾಳಿನ್ ಮಧ್ಯಪ್ರಾಚ್ಯೊದ ದೇಶೊಲು ಪುಗರ್‌ದ.
ಹಮಾಸ್ ಇಸ್ರೇಲ್‌ಡ್ ದಾಳಿ ಮಲ್ತ್‌ದ್ ನಾಲ್ ದಿನ ಕರಿನೇ, ಪ್ರಧಾನಿ ನರೇಂದ್ರ ಮೋದಿಯೆರ್ ಇಸ್ರೇಲಿ ಪ್ರಧಾನಿ ನೆತನ್ಯಾಹುರೆಡ ಪಾತೆರೊಂದು ಭಾರತ “ಮಾತಾ ರೂಪೊಡು ಭಯೋತ್ಪಾದನೆನ್ ಖಂಡಿಪ್ಪುಡು” ಪಂದ್ ಪನ್ತೆರ್.
ಈ ಕೊಲಲೊಡು ಸೈದಿನಕಲೆನ ಸಂಖ್ಯೆ ಸಾರೊರ್ದ್‌ಲಾ ಮಿತ್ತಾಯಿಲೆಕನೆ, ಗಡಿ ಜಾಗೆಡಿತ್ತಿನಕಲೆನ್ ಉಲಜಾಗೆಲೆಗ್ ಕಡಪುಡುನ ಬೇಲೆಲಾ ಆವೊಂದುಂಡು. ಇಸ್ರೇಲ್ ಬೊಕ್ಕ ಹಮಾಸ್‌ಗ್ ಬೆರಿಬಲ ಕೊರೊಂದುಪ್ಪುನ ದೇಶೊಲೆನ ಪಟ್ಟಿ ಇಂಚ ಉಂಡು.
ಇಸ್ರೇಲ್ದ ಬೆರಿಕುಪ್ಪುನ ದೇಶೊಲು
ಎಚ್ಚಾದ್ ಪಾಶ್ಚಿಮಾತ್ಯ ದೇಶೊಲಾಯಿನ US, UK, ಆಸ್ಟ್ರೇಲಿಯಾ, ಫ್ರಾನ್ಸ್, ನಾರ್ವೆ, ಜರ್ಮನಿ ಬೊಕ್ಕ ಆಸ್ಟ್ರೇಲಿಯಾ ಇಸ್ರೇಲ್ದ ಬೆರಿಕ್ ಉಲ್ಲ. ಈ ಪೊರ್ತುಡು ಯುಎಸ್ ಅಧ್ಯಕ್ಷೆ ಜೋ ಬೈಡೆನ್ ಇಸ್ರೇಲ್‌ಗ್ USದ ಬೆರಿಬಲ ಕಲ್ಲ್‌ದಾತ್ ಗಟ್ಟಿ ಪಂದ್ ಪಂಡೆರ್. ಈ ಪಾತೆರೊದೊಟ್ಟುಗು ಆರ್ US ಕೊಲಲದ ಪಡವುಲೆನ್ ಅಂಚೆನೇ ಕೊಲಲದ ವಿಮಾನೊಲೆನ್ ಇಸ್ರೇಲ್ದ ಕೈತಲ್‌ಡುಪ್ಪುಲೆಕ ಆದೇಶ ಕೊರ್ತೆರ್.
“ಈ ಭಯೋತ್ಪಾದಕ ಬೇಲೆಲೆನ ವಿರುದ್ಧ UK ಇಸ್ರೇಲ್‌ದೊಟ್ಟುಗು ಉಂತುಂಡು ಪಂದ್ ರಿಷಿ ಸುನಾಕ್ ಪನ್ತೆರ್. ಇಸ್ರೇಲ್‌ಗ್ ಬೋಡಾಪಿನ ಒವ್ವೇ ಬೆರಿಬಲೊನು ಕೊರ್ಪ ಪಂದ್ ಪ್ರಧಾನ ಮಂತ್ರಿ ನೆತನ್ಯಾಹುಗ್ ಪಾತೆರ ಕೊರ್ತೆರ್” ಪಂದ್ ಡೌನಿಂಗ್ ಸ್ಟ್ರೀಟ್ ಕಚೇರಿ ತೆರಿಪಾದ್ಂಡ್. ಇಸ್ರೇಲ್ ಮಿತ್ತ್ ಮಲ್ದಿನ ದಾಳಿನ್ ಫ್ರಾನ್ಸ್ ಅಧ್ಯಕ್ಷೆ ಇಮ್ಯಾನುಯೆಲ್ ಮ್ಯಾಕ್ರನ್ ಖಂಡಿತ್‌ದೆರ್.
ಹಮಾಸ್‌ದ ಬೆರಿಕುಪ್ಪುನ ದೇಶೊಲು
ಮುಖ್ಯವಾದ್ ಮಧ್ಯಪ್ರಾಚ್ಯ ರಾಷ್ಟ್ರೊಲು ಹಮಾಸ್‌ಗ್ ಬೆರಿತಾಂಗ್ ಕೊರ್ರ ದುಂಬು ಬೈದ. ಇರಾನ್ ಅಧ್ಯಕ್ಷೆ ಇಬ್ರಾಹಿಂ ರೈಸಿ, ಹಮಾಸ್‌ದ ಒಟ್ಟುಗು ಪಾತೆರ್ದೆರ್ ಪಂದ್ ಹಿಂದೂಸ್ತಾನ್ ಟೈಮ್ಸ್ ವರದಿ ಮಲ್ದ್ಂಡ್. ಇರಾನ್, ಲೆಬನಾನ್ ಏಪೊಲ್ದ ಲೆಕ ಹಮಾಸ್‌ದ ಬೆರಿಕ್ ಉಂಡು. ಇರಾನ್‌ಲಾ ಈ ಪಕ್ಷೊಡೇ ಉಂಡು.
ಈತ್ ಮಾತ ಆಯೆರ ಇಸ್ರೇಲ್ ನೆವನ ಪಂದ್ ಕತಾರ್ ಪನ್ತ್ಂಡ್. ಹಮಾಸ್‌ಗ್ ಕಾಸ್‌ದ ಸಕಾಯ ಕೊರೊಂದುಪ್ಪುನಕ್ಲೆಟ್ ಕತಾರ್‌ದ ಮಲ್ಲ ಕೈ ಉಂಡು ಪನ್ಪಿ ಪಾತೆರ ಉಂಡು. ಈ ನಡುಟು, ಸೌದಿ ಅರೇಬಿಯಾ ರಡ್ಡ್ ರಾಜ್ಯೊಲೆನ ಪರಿಹಾರೊಗು ಲೆಪ್ಪು ಕೊರ್ತುಂಡು ಅಂಚೆನೇ ಕೊಲಲೊನು ಇತ್ತೆನೇ ಉಂತಾವೊಡು ಪಂದ್ ಬಿನ್ನಪು ಮಲ್ದ್ಂಡ್. ಯೆಮನ್‌ಡ್, ಹೌತಿ ಬಂಡುಕೋರೆರ್ ಹಮಾಸ್‌ದ “ವೀರೋಚಿತ ಜಿಹಾದಿಸ್ಟ್ ಕಾರ್ಯಾಚರಣೆ” ಗ್ ತನ್ಕುಲೆ ಬೆರಿಬಲೊನು ಕೊರ್ತೆರ್.