Last updated on October 16th, 2023 at 03:32 pm
ಬಂಟ್ವಾಳ : ಬಸ್‌ಡ್ ಬತ್ತಿನಾಯೆ ಒರಿ ಚೀರವುಡು ಕೋರಿದ ಮಾಸ ಪತೊಂದು ಬಸ್ ಬರ್ತಿನೆಕ್ಕ್ ಆಯಗ್ ಕಂಡಕ್ಟರ್ ಬಪ್ಪರ್ ನೆರಿನಿ ಮಾತ್ರ ಅತ್ತಂದೆ, ಡ್ರೈವರ್ ಬಸ್‌ನ್ ಸೀದಾ ಬಂಟ್ವಾಳ ನಗರ ಪೋಲೀಸ್ ಸ್ಟೇಷನ್‌ಗ್ ಕೊನೊತಿನ ನಡಕೆ ನಡದ್ಂಡ್.
ಸುರೇಶ್ ಪನ್ಪಿನಾರ್ ತುಂಬೆಡ್ ಸ್ಟೇಟ್‌ಬ್ಯಾಂಕ್-ಪುತ್ತೂರುದ ಕೆಎಸ್ಸಾರ್ಟಿಸಿ ಬಸ್ ಬರ್ತ್‌ದೆರ್. ಬಸ್ ಕಂಡಕ್ಟರ್ ಟಿಕೆಟ್ ದೆತೊನರೆ ಬನ್ನಗ ಮೆರೆನ ಕೈಟ್ ಕೋರಿದ ಮಾಸದ ಚೀರವುದ ಬಗೆಟ್ ಕೇನ್ಡೆರ್. ಅವ್ ಕೋರಿದ ಮಾಸ ಪನ್ದ್ ತೆರಿನೇ ಅರೆನ್ ಬಸ್‌ರ್ದ್ ತಿರ್ತ್ ಜೆಪ್ಪರೆ ಪನ್ತೆರ್. ಕೋರಿ ಮಾಸೊನು ಬಸ್‌ಟ್ ಕನವರೆ ಅವಕಾಶ ಇಜ್ಜಿ ಪನ್ಪಿನವು ಕಂಡಕ್ಟರ್‌ನ ವಾದ. ಆಂಡ ಕೂಲಿ ಬೇಲೆ ಮಲ್ಪುನ ಜನಕ್ ಉಂದು ತೆರಿಯಂದೆ ಬಸ್‌ರ್ದ್ ಜಪ್ಪರೆ ಒತ್ತೊನುಜೆರ್. ಮೊಕಲೊನ ನಡುಟು ಪಾತೆರೊಗು ಪಾತೆರ ಆದ್ ಕಂಡಕ್ಟರ್ ಬಪ್ಪರ್ ನೆರ್ತೆರ್ ಪನ್ದ್ ಸುರೇಶೆರ್ ಆರೋಪ ಮಲ್ದೆರ್.
ಆರ್ ಬಸ್‌ರ್ದ್ ಜಪ್ಪಂದಿನ ತೂದು ಡ್ರೈವರ್ ಜನಕುಲೆಡ್ ದಿಂಜಿನ ಬಸ್‌ನ್ ಸೀದಾ ಬಂಟ್ವಾಳ ಪೋಲೀಸ್ ಸ್ಚೇಷನ್‌ಗ್ ಕನತ್ ಅಕೊನ್ ಒಯ್ತ್ ಜಪುಡಾದೆರ್ಗೆ. ಈ ಪೊರ್ತುಡು ಎಸೈ ರಾಮಕೃಷ್ಣ ಮೇರ್ ಬಸ್‌ದ ಡ್ರೈವರ್ ಬೊಕ್ಕ ಕಂಡಕ್ಟರ್‌ಗ್ ಬುದ್ದಿ ಪನ್ತೆರ್ಗೆ.
ಕೂಲಿ ಬೇಲೆ ಪೋಪಿನಕುಲು ಪಾಪದಕುಲು ಬಸ್‌ಟ್ ಕೋರಿ, ಮೀನ್ ಕೊನವಂದೆ ಬೊಕ್ಕ ಎಂಚ ಕೊನೊಪಿನಿ? ಒಂಜಿ ಕೆ.ಜಿ ಕೋರಿಗ್ ಕಾರ್, ರಿಕ್ಷಾ ಬಾಡಿಗೆ ಮಲ್ತ್ ಕೊನೊಡಾ ಪನ್ದ್ ಸುರೇಶೆರ್ ಕೇನ್ಡೆರ್.
ಬಸ್‌ಡ್ ಕೋರಿ ಮಾಸ ಕನರೆ ಇಜ್ಜಿ. ಜೀವ ಇತ್ತಿನ ವಸ್ತುಲೆನ್ ಮಾತ್ರ ಕನೊಲಿ, ಮಾಸ ಪೂರ ಬಾಕಿದಕಲೆಗ್ ವಾಸನೆ ಬರ್ಪುಂಡು. ಉಂದೆರ್ದ್ ಬಾಕಿದಕಲೆಗ್ ಸಮಸ್ಯೆ ಆಪುಂಡು ಪನ್ಪಿನ ದಿಸೆಟ್ ಕರ್ನಾಟಕದ ಸರಕಾರಿ ಬಸ್ ನಿಗಮ ಆದೇಶ ಮಲ್ದ್ಂಡ್ ಪನ್ದ್ ಬಂಟ್ವಾಳ ವಿಭಾಗದ ಅಧಿಕಾರಿ ಶ್ರೀಶ ಭಟ್ ಪನ್ಡೆರ್.