Last updated on October 17th, 2023 at 06:00 pm
ಭಟ್ಕಳ: ಕಾರ್ ಬೊಕ್ಕ ಲಾರಿದ ನಡುಟು ನಡತಿನ ಎಡ್ತೆಡ್ ಒರ್ತಿ ಪೊಂಜೊವು ತೀರ್ದ್ ಇರ್ವೆರೆಗ್ ಗಡಿಕುಲಾತಿನ ನಡಕೆ ಭಟ್ಕಳ ತಾಲೂಕ್‌ದ ಮೂಡ್ ಭಟ್ಕಳ ಬೈಪಾಸ್ ಸಂಕದಲ್ಪ ಇನಿ ಕಾಂಡೆ 6 ಗಂಟೆದ ಅಂದಾಜಿಗ್ ನಡತ್‌ದ್ಂಡ್.
ತೀರ್ದಿನಾರೆನ್ ಒಡಿಪು ಜಿಲ್ಲೆದ ಬೇಳೂರು ಗ್ರಾಮೊದ ರೀಟಾ ಕ್ಸೇವಿಯರ್ ಡಿಸೋಜ಼ಾ(51) ಪಂದ್ ಗುರಾತ ಪತ್ತ್‌ದೆರ್. ರೀಟಾನ ಕಂಡನೆ ಕ್ಸೇವಿಯರ್ ರಾಜ್ ಡಿಸೋಜ಼ಾ ಬೊಕ್ಕ ಮಗಲ್ ಇನ್ರಿಕಾಗ್ ಎಡ್ತೆಡ್ ಗಡಿಕುಲಾತ ಪಂದ್ ತೆರಿದ್‌ಬೈದ್ಂಡ್.
ಕ್ಸೇವಿಯರ್ ರಾಜ್ ಇಲ್ಲದಕುಲು ಕಾರ್‌ಡ್ ಒಡಿಪುಡೆ ಆದ್ ಗೋವಾದಂಚಿಗ್ ಪೋವೊಂದಿತ್ತೆರ್. ಮೊಕ್ಲೆನ ಕಾರ್ ಭಟ್ಕಳ ಬೈಪಾಸ್ ಸಂಕದಡೆ ಎತ್ತ್‌ನಗ ಮುರ್ಡೇಶ್ವರದಂಚಿರ್ದ್ ಕುಡ್ಲದಂಚಿ ಪೋವೊಂದಿತ್ತಿನ ಲಾರಿ(ಗ್) ಎದುರುರ್ದ್ ಎಡ್ತ್‌ದ್ಂಡ್ ಪಂದ್ ಪನೊಂದುಲ್ಲೆರ್.
ಗಾತಿದ ಗಡಿಕುಲಾದಿತ್ತಿನ ರೀಟಾ ಆಸ್ಪತ್ರೆಗ್ ಲೆತೊಂದು ಪೋಪಿನ ಸಾದಿಡೇ ತೀರ್ದೆರ್. ಪೆಟ್ಟಾತಿನಕುಲೆನ್ ಮುಟ್ಟದಕುಲು ಭಟ್ಕಳ ಸರಕಾರಿ ಆಸ್ಪತ್ರೆಗ್ ಸೇರಾದೆರ್.
ಎಡ್ತೆದ ಬರಸ್‌ಗ್ ಕಾರ್‌ದ ಮುಸುಂಟು ಅಲಕ್ಕ ಞಕ್ಕೆ ಆತ್ಂಡ್. ಭಟ್ಕಳ ನಗರ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.