Last updated on October 21st, 2023 at 05:59 pm
ರಾಮಕುಂಜ: ಶ್ರೀ ಶಾರದೋತ್ಸವ ಸಮಿತಿ, ಶಾರದಾನಗರ ಮೊಕಲ್ನ ಮುತಾಲಿಕೆಡ್ 20ನೇ ವರ್ಸೊದ ಶಾರದೋತ್ಸವ ಅಕ್ಟೋಬರ್ 22ರ್ದ್ 24 ಮುಟ್ಟ ಶ್ರೀ ಶಾರದಾಂಬಾ ಭಜನಾ ಮಂದಿರೊಡು ನಡಪರೆಗುಂಡು.
ಅಕ್ಟೋಬರ್ 22, ಐತಾರದಾನಿ ಬಯ್ಯಡ್ 6 ಗಂಟೆಗ್ ಮಂದಿರೊಡು ಅಪ್ಪೆ ಶಾರದೆನ ಪ್ರತಿಷ್ಠೆ ಮಲ್ತ್‌ದ್, ಲೆಪ್ಪು ಕೊರ್ತಿನ ಭಜನಾ ಮಂಡಳಿಲೆನ ಭಜನೆ ಬೊಕ್ಕ ಜೋಕುಲೆನ ಸಾಂಸ್ಕೃತಿಕ ಕಾರ್ಯಕ್ರಮ, ಪ್ರಸಾದ ಭೋಜನ ನಡಪರೆಗುಂಡು.
23ನೇ ಸೋಮಾರದಾನಿ ಕಾಂಡೆ ವಾಹನ ಪೂಜೆ, ಮಾರಿ ಚಾಮುಂಡಿ, ಗುಳಿಗ ದೈವೊಲೆಗ್ ತಂಬಿಲ ನಡಪರೆಗುಂಡು. 11 ಗಂಟೆರ್ದ್ ವಾಲಿಬಾಲ್ ಗೊಬ್ಬು, ಗಾನಸಿರಿ ಕಲಾಕೇಂದ್ರೊದ ವಿದ್ಯಾರ್ಥಿಲೆನ ‘ಸುಮಧುರ ಭಕ್ತಿ ಗೀತಾಂಜಲಿ’ ನಡಪರೆಗುಂಡು.
ಮಧ್ಯಾಹ್ನ ಮಹಾಪೂಜೆ, ಪ್ರಸಾದ ಭೋಜನ ಆದ್ ರಂಗೋಲಿ ಪಂತೊಲಾ ಉಂಡು. ಬಯ್ಯಡ್ 5 ಗಂಟೆರ್ದ್ ದುರ್ಗಾಪೂಜೆ, ಧಾರ್ಮಿಕ ಉಪನ್ಯಾಸ ನಡಪರೆಗುಂಡು. 9 ಗಂಟೆಗ್ ಪೊಸತಾದ್ ಕಟ್ಟಾದಿನ ‘ಶ್ರೀ ಶಾರದಾಂಬಾ ಕಲಾ ಮಂಟಪ’ ಉದಿಪನ ನಡಪರೆಗುಂಡು. ಸುಳ್ಯ ಶಾಸಕೆರ್ ಶ್ರೀ ಭಾಗೀರಥಿ ಮುರುಳ್ಯ ಮೆರೆನ ಗುರ್ಕಾರ್ಮೆಡ್ ದುಂಬುದ ಶಾಸಕೆರ್ ಶ್ರೀ ಎಸ್. ಅಂಗಾರೆರ್ ಪೊಸ ಕಲಾ ಮಂಟಪೊದ ಉದಿಪನ ಮನ್ಪೆರಗುಲ್ಲೆರ್. ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ದುಂಬುದ ಗುರ್ಕಾರ್ಲು ಶ್ರೀ ದಯಾನಂದ ಜಿ ಕತ್ತಲ್ಸಾರ್ ಧಾರ್ಮಿಕ ಉಪನ್ಯಾಸ ಕೊರ್ಯೆರಗುಲ್ಲೆರ್. ರಾತ್ರೆ 10 ಗಂಟೆರ್ದ್ ಐಸಿರಿ ಕಲಾವಿದೆರ್ ಮಂಜೇಶ್ವರ ಮೊಕಲ್ನ ‘ಕಲ್ಜಿಗದ ಮಾಯ್ಕಾರೆ ಪಂಜುರ್ಲಿ’ ಪನ್ಪಿ ಪೌರಾಣಿಕ, ಸಾಮಾಜಿಕ, ಭಕ್ತಿ ಪ್ರಧಾನ ತುಳು ನಾಟಕ ನಡಪರೆಗುಂಡು. ಈ ನಾಟಕೊಡು ತುಳುನಾಡ ರಂಗಬೊಳ್ಳಿ ಪಂದೇ ಪುದರ್ ಪೋತಿನ ರಾಮಕುಂಜದಾರೇ ಆಯಿನ ರವಿ ರಾಮಕುಂಜ ಅಭಿನಯ ಮನ್ಪೆರಗುಲ್ಲೆರ್.
ತೇದಿ 24ನೇ ಅಂಗಾರೆದಾನಿ ಕಾಂಡೆ 9 ಗಂಟೆರ್ದ್ ಸರಸ್ವತಿ ಪೂಜೆ, ವಿದ್ಯಾರಂಭ, ಭಜನೆ ಆದ್ ಮಹಾಪೂಜೆ ನಡಪರೆಗುಂಡು. ಅವೇ ದಿನ ಕಾಂಡೆ 10 ಗಂಟೆರ್ದ್ ಜೋಕುಲು, ಜವನೆರ್, ಪೊಂಜೊವುಲೆಗ್ ಬೇತೆ ಬೇತೆ ಗೊಬ್ಬಲೆನ ಅಟ್ಟನೆ ಆತ್ಂಡ್.
ಬಯ್ಯ 4:30 ರ್ದ್ ಭಗವದ್ಗೀತೆ ಮಸ್ತಿರೆದ ಒರುಟು ಅಪ್ಪೆ ಶಾರದೆನ ಪಲ್ಲೆಂಕಿ ಮೆರವಣಿಗೆ ನಡಪರೆಗುಂಡು.
ಈ ಮಾತ ಕಾರ್ಯಕ್ರಮೊಲೆಡ್ ಭಕ್ತೆರ್ ಭಕ್ತಿಪೂರ್ವಕವಾದ್ ಪಾಲ್‌ಪಡೆದ್ ಅಪ್ಪೆ ಶಾರದೆನ ಆಶೀರ್ವಾದ ಗೆತೊನೊಡು ಪಂದ್ ಉತ್ಸವ ಸಮಿತಿದ ಗುರ್ಕಾರೆ ವಾಸುದೇವ ಕುಲಾಲ್ ಸಮಿತಿದ ಕಡೆರ್ದ್ ತೆರಿಪಾದೆರ್.