ತುಳುನಾಡ ರಾಜ್ಯ ಹೋರಾಟ ಎಂಚ ಫೇಲ್ ಆಂಡ್? ತುಳುನಾಡ್ ತುಂಡಾಯಿನಿ ಎಂಚ? ಕಯ್ಯಾರ ಕಿಞ್ಞಣ್ಣ ರೈಕುಲೆನ ಪಾತೆರ ಓದುಲೆ!

Last updated on October 28th, 2023 at 11:37 am

1-4-1998ನೇ ಇಸವಿದಾನಿ ಕಯ್ಯಾರ ಕಿಞ್ಞಣ್ಣ ರೈಕುಲೆನ್ ಪೆರಡಾಲದ ಅರೆನ ಇಲ್ಲಡ್ ಸಂದರ್ಶನ ಮಲ್ಪುನಗ ಅರೆಡ ತುಳುನಾಡ್ ಡ್ ಕರ್ನಾಟಕ ಏಕೀಕರಣದ ಪೊರ್ತುಡು ದಾದ ಆದಿತ್ತ್ಂಡ್ ಪನ್ದ್ ಕೇನ್ನಗ ಆರ್ ಇಂಚ ಪನ್ದಿತ್ತೆರ್ –

ಕಯ್ಯಾರೆರ್ : ಮೂಲು ಸುರುಟು ಸುರು ಆಯಿನಿ ತುಳುಕಾದ್ ಪೊರುಂಬಾಟ. ತುಳು ಎಂಕ್ಲೆಗ್ ಕನ್ನಡೊರ್ದು ಕೈತಲ್. ತುಳು ಸಂಸ್ಕೃತಿ ಮನುಷ್ಯನ ಮೂಲ ಸಂಸ್ಕೃತಿಗ್ ಕೈತಲ್ ಇತ್ತಿನವು. ಮುಲ್ಪ ಉಪ್ಪುನ ಅಪ್ಪೆಕಟ್ಟ್ ದ ವ್ಯವಸ್ಥೆ. ಮುಲ್ಪದ ಜನಕ್ಲೆಗ್ ಸುಲಬೊಡು ತೆರಿಯುನ ಬಾಸೆ ಪನ್ಡ ತುಳು. ಕನ್ನಡ ದಾದ ಇತ್ತ್ಂಡಲಾ ಕಲ್ತಿನ ಬಾಸೆ ಮಾತ್ರ. ಮುಲ್ಪದ ಜನಕ್ಲೆನ್ ಸಂಪರ್ಕ ಮಲ್ಪರೆ ತುಳು ಬಾಸೆನೇ ಉತ್ತಮ ಸಾಧನ. ಮೋತಿಲಾಲ್ ನೆಹರೂನ ವರದಿದ ಬಗೆಟ್ ಇತ್ತಿನ ಒಂಜಿ ಸಭೆಕ್ ಕೆ.ಬಿ ಜಿನರಾಜ್ ಹೆಗ್ಗಡೆಲಾ ಪೋದಿತ್ತೆರ್ ಪನ್ಪಿನ ನೆಂಪು. ಸ್ವಾತಂತ್ರ್ಯ ಬತ್ತಿನೇ ಆಯಾಯ ಭಾಗದ ಜನಕುಲೆನ ಅಪ್ಪೆಬಾಸೆಡ್ ಆಡಳಿತ ನಡಪೊಡು ಪನ್ಪಿನವು ನೆಹರೂ ಕಮಿಟಿದ ತಿರ್ಲಾದಿತ್ತ್ಂಡ್. ಆ ಪೊರ್ತುಡು ಜಿನರಾಜ್ ಹೆಗ್ಗಡೆರ್ ಕರ್ನಾಟಕೊರ್ದು ಎಚ್ಚ ಪಣಿಯಾಡಿಯೆರೆನ ತುಳು ಚಳುವಳಿಗ್ ಬೆರಿಬಲ ಕೊರ್ದಿತ್ತೆರ್. ಆ ಪೊರ್ತುಡು ಒಡಿಪುಡು ಎಸ್.ಯು ಪಣಿಯಾಡಿ ಮೇರ್ ಒರಿ ಮಲ್ಲ ವೇದಾಂತ ವಿದ್ವಾಂಸೆ. ಇಡೀ ಮಣಿಪಾಲನೇ ಅರೆನವಾದಿತ್ತ್ಂಡ್. ಒಂಜಿ ಟೈಲ್ಸ್ ಪ್ಯಾಕ್ಟರಿ, ಒಂಜಿ ಪ್ರೆಸ್, ತುಳುನಾಡ್ ಬ್ಯಾಂಕ್, ತುಳುವ ಸಾಹಿತ್ಯ ಮಾಲೆ ಪನ್ದ್ ಆರ್ ಮಲ್ದಿತ್ತೆರ್. ಆ ಪೊರ್ತುಡು ಗೋವಿಂದ ಪೈಕುಲುಲಾ ತುಳು ಇತಿಹಾಸದ ಬಗೆಟೇ ಎಚ್ಚ ಬರೆಯೆರ್. ಪಂಜೆ ಮಂಗೇಶರಾಯೆರೆಗ್, ಎಂ.ಎನ್ ಕಾಮತೆರೆಗ್ಲಾ ತುಳುತ ಬಗೆಟ್ ವಿಶೇಷ ಮೋಕೆ ಇತ್ತ್ಂಡ್. ಅಪಗ ತುಳು ಚಳುವಳಿ ಸುರು ಆಂಡ್. ಪಣಿಯಾಡಿಯೆರ್ ಲಾಸ್ ಆಯಿನೇ ಒಡಿಪು ಬುಡ್ದ್ ಪೋಯಿನೇ ಅರೆನ ತುಳು ಚಳುವಳಿ ಸೋತುಂಡು. ತುಳು ಯಾಪೊಗ್ಲಾ ಕನ್ನಡೊರ್ದು ಕಮ್ಮಿ ಅತ್ತ್. ತುಳು ಬರ್ಪಿನಾತ್ ಮೋಕೆಡ್ ಕನ್ನಡ ಬರ್ಪುಜಿ!

ತುಳು ಚಳುವಳಿ ಫೇಲ್ ಆಯಿಬೊಕ್ಕ ಕೆ.ಆರ್ ಕಾರಂತ್ ಮೊಕುಲು ಕರ್ನಾಟಕ ಏಕೀಕರಣ ಚಳುವಳಿಗ್ ಲೈತೆರ್. ಜಿನರಾಜ ಹೆಗ್ಗಡೆಲಾ ಉಂದೆತೊಟ್ಟುಗು ಗೋಡ್ಯೆರ್. ಅಪಗ ಎ.ಬಿ ಶೆಟ್ಟಿ ಬೊಕ್ಕ ಶ್ರೀನಿವಾಸ ಮಲ್ಯೆರ್ ಇತ್ತೆರ್. ಶ್ರೀನಿವಾಸ ಮಲ್ಯೆರೆಗ್ ಕರ್ನಾಟಕ ಏಕೀಕರಣೊಡು ಆಸಕ್ತಿ ಇತ್ತಿಜಿ.ಇಂಚ ಬೊಕ್ಕ ತುಳುವೆರ್ ತುಳುನಾಡ್ ರಾಜ್ಯದ ಪೊರುಂಬಾಟ ಬುಡಿನಿ.

ಇತ್ತೆದ ಪರಿಸ್ಥಿತಿ ತೂನಗ ದ.ಕ ಒಡಿಪು ಕಾಸರಗೋಡುನು ಸೇರಾದ್ ಪ್ರತ್ಯೇಕ ತುಳುನಾಡ್ ಜಿಲ್ಲೆ ಮಲ್ಪೊಡು, ಬೊಕ್ಕ ತುಳುನಾಡ್ ದ ಜನಕ್ಲೆನ ಅಪೇಕ್ಷೆದ ಲೆಕ್ಕ ಅವೆನ್ ಕರ್ನಾಟಕ ಇಜಿಂಡ ಕೇರಳೊಗು ಗೋಡ್ಯಾವೊಡು.
(ಕರ್ನಾಟಕ ಏಕೀಕರಣ ಇತಿಹಾಸ ಪುಸ್ತಕೊರ್ದು)

ಉಂದು ಕಿಞ್ಞಣ್ನ ರೈಕುಲೆನ ಅಭಿಪ್ರಾಯ

ಇಂಚ ತುಳು ಚಳಿವಳಿ ಪಿರಬೂರಿನೇ ನೆಟೆದ ಕೆಲವು ನಾಯಕೆರ್ ಕರ್ನಾಟಕ ಏಕೀಕರಣೊಗು ಜತ್ತ್, 1954 ನೇ ಇಸವಿಡ್ ರಾ.ಪು ಆಯೋಗ ಬತ್ತ್ ತುಳುನಾಡ್ ದ ಕೆಲವು ನಾಯಕೆರೆನ್ ಸಂದರ್ಶನ ಮಲ್ಪುನಗ ಎಂಕುಲು ಕರ್ನಾಟಕೊಗೇ ಸೇರುವ ಪನ್ದ್ ಮನವಿ ಮಲ್ತೆರ್. ಕಾಂಗ್ರೇಸ್ ಪಕ್ಷದ ಪರವಾದ್ ಪಿಂಟೋ ಮೆರೆನ ನೇತೃತ್ವೊಡು, ಪ್ರಜಾ ಸಮಾಜವಾದಿ ಪಕ್ಷದ ಪರವಾದ್ ಕೆ.ಆರ್ ಕಾರಂತೆರ್ನ ನೇತೃತ್ವೊಡು ಮನವಿ ಕೊರುಂಡು. ಜನಸಂಘ, ಕಮ್ಯುನಿಸ್ಟ್ ಪಕ್ಷ, ದಲಿತ ವರ್ಗದ ಮಹಾಮಂಡಲ, ಪತ್ರಿಕೋದ್ಯಮಿಲೆನ ಸಂಘ, ಮಂಗಳೂರು ನಗರ ಸಭೆ ಮಾತಾ ಸೇರ್ದ್ ತುಳುನಾಡ್ನ್ ಕರ್ನಾಟಕೊಗು ಸೇರಾವೊಡು ಪನ್ದ್ ಮನವಿ ಮಲ್ತೆರ್. ಇಂಚ ತುಳುವೆರ್(ಈ ಸಮಿತಿಲೆಡ್ ಅತ್ತಂದೆ ಮನವಿ ಕೊರ್ತಿನಕಲೆಡ್ ತುಳು ಅಪ್ಪೆ ಬಾಸೆ ಇತ್ತಿನಕಲೆನ ಪುದರ್ ಕಮ್ಮಿ) ತುಳು ಚಳುವಳಿಡ್ ಎಚ್ಚಿನ ಉಮೇದ್ ತೂಪಾವಂದೆ ತುಳುನಾಡ್ ಕರ್ನಾಟಕ ಬೊಕ್ಕ ಕೇರಳೊಗು ಪಟ್ಟರೆ ನೆವನ ಆಯೆರ್.