Last updated on October 31st, 2023 at 03:44 pm
ಕುಡ್ಲ: ದಾಯ್ಜಿವಲ್ಡ್ ಟಿವಿ ಬೊಕ್ಕ ಪನಾಮ ಕಾರ್ಪೊರೇಷನ್ ಲಿಮಿಟೆಡ್ ಒಟ್ಟು ಸೇರಿಗೆಡ್ ನವೆಂಬರ್ 29 ನೇ ಐತಾರದಾನಿ ಡಾನ್ ಬಾಸ್ಕೊ ಹಾಲ್‌‌ಡ್ ತುಳು ಸಂಗೀತ ಕಾರ್ಯಕ್ರಮ ‘ಪದರಂಗಿತ’ ಬಾರೀ ಗರ್ದ್ ಗೌಜಿಡ್ ನಡತ್ಂಡ್. ತುಳುನಾಡ್‌ದ ಪುದರ್ ಪೋತಿನ ಗಾಯಕೆರಾಯಿನ ರವೀಂದ್ರ ಪ್ರಭು, ಪ್ರಕಾಶ್ ಮಹದೇವನ್, ರೂಪ ಪ್ರಕಾಶ್, ಮೊಹಮ್ಮದ್ ಇಕ್ಬಾಲ್, ಸೌಮ್ಯ ಭಟ್, ಸಂದೇಶ್, ತನುಶ್ರೀ ಬೊಕ್ಕ ಧಾರಿಣಿ ಪಂಡಿನ ಬೇತೆ ಬೇತೆ ತುಳು ಪದೊಕುಲು ಬತ್ತಿನಕ್ಲೆನ ಉಡಲ್ ಗೆಂದಿಯ.
ಈ ಪೊರ್ತುಡು ತಿರದಾಂತಿ ಮುರ್ಗೊಲೆನ ತಾಂಕನದಪ್ಪೆ ರಜನಿ ಶೆಟ್ಟಿ, ಹೊಟೇಲ್ ಉದ್ಯಮಿಲಾಯಿನ ವಿಜಯ ದಾಂತಿ, ರಂದೀಪ್ ಕಾಂಚನ್, ವಿ4 ನೆಟ್‌ವರ್ಕ್‌ದ ಜಿತೇಂದ್ರ ರಾವ್ ಬೊಕ್ಕ ತುಳು ಚಲನಚಿತ್ರ ಕಲಾ ನಿರ್ದೇಶಕೆ ತಮ್ಮ ಲಕ್ಷ್ಮಣ ಮೊಕಲೆಗ್ ದಾಯ್ಜಿವರ್ಲ್ಡ್ ಮೀಡಿಯಾ ಪ್ರೈವೇಟ್ ಲಿಮಿಟೆಡ್‌ದ ನಿರ್ದೇಶಕೆರಾಯಿನ ಅಲೆಕ್ಸಿಸ್ ಕ್ಯಾಸ್ಟೆಲಿನೋ ಮನಾದಿಗೆ ಮಲ್ತೆರ್. ಸಂಸ್ಥೆದ ನಿರ್ದೇಶಕೆ ಮೆಲ್ವಿನ್ ರೋಡ್ರಿಗಸ್ ಮೇರ್ ಸಾನಿಧ್ಯ ವಸತಿ ಶಾಲೆ ಆಡಳಿತಾಧಿಕಾರಿ ವಸಂತ ಶೆಟ್ಟಿ ಮೆರೆಗ್ ಸನ್ಮಾನ ಮಲ್ತೆರ್.
ಗಣ್ಯೆರೆನ್ ಎದುಕೊಂದು ಪಾತೆರ್ನ ದಾಯ್ಜಿವರ್ಲ್ಡ್ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆ ವಾಲ್ಟರ್ ನಂದಳಿಕೆ, “ದಾಯ್ಜಿವರ್ಲ್ಡ್ 24X7 2014 ಟ್ ಸುರು ಆದ್ ಯಶಸ್ವಿಯಾದ್ ಒರ್ಂಬ ವರ್ಸ ಆಂಡ್. ಬರ್ಪಿ ವರ್ಸ, ಪತ್ತನೇ ವರ್ಸೊಗು ಕಾರ್ ದೀವೊಂದುಂಡು. ಅವೇಕ್ ಬೋಡಾದ್ ನಮ್ಮ ಚಾನಲ್ ಮೆಗಾ ಕಾರ್ಯಕ್ರಮೊನು ಅಟ್ಟನೆ ಮನ್ಪುಕಡು. ದಾಯ್ಜಿವರ್ಲ್ಡ್ ತುಳು, ಕೊಂಕಣಿ, ಕನ್ನಡ ಬೊಕ್ಕ ಬ್ಯಾರಿ ಪನ್ಪಿ ನಾಲ್ ಭಾಷೆಲೆಡ್ ಕಾರ್ಯಕ್ರಮೊಲೆನ್ ಕೊರ್ಪುನ ಒಂಜೇ ಒಂಜಿ ವಾಹಿನಿಯಾದುಂಡು. ಆತೇ ಅತ್ತಂದೆ ಎಂಕ್ಲೆನ ಟಿವಿ ಲೋಗೋಡು ತುಳು ಲಿಪಿನ್ ಗಲಸಿನ ಕಡೀರ ಚಾನಲ್ ಆದುಂಡು. ತುಳುನಾಡ್‌ಧ ಭಾಷೆ ತುಳು, ಈ ಭಾಷೆನ್ ಜಾತಿ, ಧರ್ಮೊದ ಭೇದದಾಂತೆ ತುಳುನಾಡ್‌ದಕುಲು ಪಾತೆರ್ವೆರ್ . ಅಂಚಾದ್ ನಮ್ಮ ತುಳು ಭಾಷೆನ್ ಭಾರತೀಯ ಸಂವಿಧಾನೊದ ಎಣ್ಮನೇ ಶೆಡ್ಯೂಲ್‌ಗ್ ಗೋಡ್ಯಾವೊಡು” ಪಂದ್ ಒತ್ತಾಯ ಮಲ್ತೆರ್.
ದಾಯ್ಜಿವರ್ಲ್ಡ್‌ದ ಸ್ಟ್ಯಾನಿ ಬೇಳಾ ಒತ್ತುಪಾಲ್‌ಡಿತ್ತೆರ್. ಈ ಪೊರ್ತುಡು ಕಲಾಸವ್ಯಸಾಚಿ ಕೂಟೊದ ಪ್ರಶಾಂತ್ ಸಿ ಕೆ, ಸುಂದರ್ ಬಂಗಾಡಿ ಬೊಕ್ಕ ಅರ್ಪಿತ್ ಕುಸಾಲ್‌ದ ಲೇಸ್ ನಡಪಾದ್ ಕೊರ್ಯೆರ್. ರಾಜ್‌ಗೋಪಾಲ್ ಬೊಕ್ಕ ಆರೆನ ಕೂಟ ಇಡೀ ಕಾರ್ಯಕ್ರಮೊಗು ಸಂಗೀತ ಕೊರ್ಯೆರ್. ಟೀಮ್ ಅರ್ಬನ್ ಗ್ರೂಪ್ ಕುಲಶೇಖರ್ ನೃತ್ಯ ಕಾರ್ಯಕ್ರಮ ಕೊರ್ಯೆರ್. ಚೇತನ್ ಶೆಟ್ಟಿ ಬೊಕ್ಕ ಶರ್ಮಿಳಾ ಲೇಸ್ ಸುದಾರ್ಮೆ ಮಲ್ತೆರ್.