ಕನ್ನಡದ ಕೊಡಿ ಪತೊಂದು ಕರ್ನಾಟಕ ರಾಜ್ಯೋತ್ಸವ ಮಲ್ತ್ ತಲಕಾವೇರಿಡ್ ಧಾರ್ಮಿಕ ನಂಬೊಲಿಗೆಗ್ ಚ್ಯುತಿ ಮಲ್ದೆರ್ : ತಲಕಾವೇರಿ ಮೂಲ ಸ್ವರೂಪ ರಕ್ಷಣಾ ವೇದಿಕೆ

Last updated on November 9th, 2023 at 08:19 am

ಮಡಿಕೇರಿ : ಪವಿತ್ರ ಕ್ಷೇತ್ರ ತಲಕಾವೇರಿಡ್ ಇಂಚಪ್ಪೊಗು ಕೊಡಿ ಪತೊಂದು ಕರ್ನಾಟಕ ರಾಜ್ಯೋತ್ಸವ ಮಲ್ತ್ ಧಾರ್ಮಿಕ ನಂಬಿಕೆಗ್ ಚ್ಯುತಿ ಮಲ್ದೆರ್ ಪನ್ದ್ ತಲಕಾವೇರಿ ಮೂಲಸ್ವರೂಪ ರಕ್ಷಣಾ ವೇದಿಕೆದಕುಲು ಅಸಮಧಾನ ಪಿದಯಿ ಪಾಡ್ದೆರ್. ಮಡಿಕೇರಿಡ್ ಸುದ್ದಿಗೋಷ್ಟಿ ಮಲ್ತಿನ ವೇದಿಕೆದ ಸಂಚಾಲಕೆ ಉಳ್ಳಿಯಡ ಎಂ.ಪೂವಯ್ಯ ಮೇರ್, ಇಂಚೊಗು ಕಾವೇರಿದ ಉಗಮ ಕ್ಷೇತ್ರ ತಲಕಾವೇರಿಡ್ ಧಾರ್ಮಿಕ ಆಚರಣೆಲೆಗ್ ವಿರುದ್ದವಾಯಿನ ಬೇಲೆಲು ನಡತೊಂದುಲ್ಲ ಪನ್ದ್ ಆರೋಪ ಮಲ್ದೆರ್.

ಬೆಳಗಾವಿ ಭಾಗದ ಕೆಲವು ಸಾಧುನಕುಲು ತಲಕಾವೇರಿದ ಪವಿತ್ರ ಕುಂಡಿಕೆದ ಕೈತಲ್ ಕೂಪೆ ಕಟ್ಟ್ ದ್ ಕರ್ನಾಟಕ ರಾಜ್ಯೋತ್ಸವ ಮಲ್ಪುನ ನೆಪೊಟು ಪುಣ್ಯಕ್ಷೇತ್ರದ ಪಾವಿತ್ರತೆಗ್ ಧಕ್ಕೆ ಕನದೆರ್. ಇಂಚಿನ ಪವಿತ್ರ ಕ್ಷೇತ್ರೊಡು ಇತೋರ್ತು ಇಂಚಿನ ಅಚಾತುರ್ಯ ನಡತಿನ ಉದಾರ್ಮೆನೇ ಇಜ್ಜಿ. ಕ್ಷೇತ್ರೊಡು ರಾಜ್ಯೋತ್ಸವ, ಸಾರ್ವಜನಿಕ ಸಭೆ, ಕವಿ ಗೋಷ್ಟಿ ಪೂರಾ ಮಲ್ತೊಂದುಲ್ಲೆರ್, ಉಂದು ಸ್ಥಳೀಯೆರೆನ ಭಾವನೆಗ್ ಧಕ್ಕೆ ಕನದ್ಂಡ್ ಪನ್ದ್ ಪನ್ಡೆರ್.

ವೇದಿಕೆದ ಸಂಚಾಲಕೆರಾಯಿನ ಕೊಕ್ಕಲೆರ ಎ.ಕಾರ್ಯಪ್ಪ ಪಾತೆರ್ದ್ ತಲಕಾವೇರಿ ಬೊಕ್ಕ ಬಾಗಮಂಡಲಡ್ ಮುಲ್ಪದ ಜನಕ್ಲೆನ ಬಾವನೆಗ್ ಮುಲ್ಪದ ಕಟ್ಟುಪಾಡ್ ಗ್ ವಿರುದ್ದವಾದ್ ನಡತೊಂದುಲ್ಲೆರ್, ಉಂದು ಸಮ ಅತ್ತ್ ಪನ್ದ್ ಪಿಸಿರಾಯೆರ್. ವೇದಿಕೆದ ಪದುಕೆರಾಯಿನ ಮಣವಟ್ಟಿರ ಪಾಪು ಚೆಂಗಪ್ಪೆರ್ಲಾ ಸುದ್ದಿಗೋಷ್ಟಿಡ್ ಇತ್ತೆರ್.