Last updated on November 23rd, 2023 at 09:58 am
ಉತ್ತರಾಖಂಡೊದ ಉತ್ತರಕಾಶಿಡ್ ನವೆಂಬರ್ 12ಕ್ ಜರಿದಿನ ಸುರಂಗೊಡು ತಿಕಲೊಂದಿನ ಕಾರ್ಮಿಕೆರೆನ್ ಪಿದಯಿ ಲೆತೊಂದು ಬರ್ಪುನ ಬೇಲೆ ಜೋರುಡು ನಡತೊಂದುಂಡು. ಉಲಯಿ ಇಪ್ಪುನ 41 ಜನ ಕಾರ್ಮಿಕೆರೆನ್ ರಕ್ಷಣೆ ಮನ್ಪುನ ಬೇಲೆ ಅಕೇರಿದ ಗಟ್ಟೊಗು ಎತ್ತ್‌ದ್, ನನ ಒಂತೆ ಪೊರ್ತುಡೇ ಕಾರ್ಮಿಕೆರ್ ಪಿದಯಿ ಬರ್ರೆಗುಲ್ಲೆರ್. ಸುರಂಗೊದ ಪಿದಯಿ ಆ್ಯಂಬುಲೆನ್ಸ್‌ಲು ಉಂತುದಿತ್ತ್‌ದ್, ರಕ್ಷಣೆ ಮಲ್ದಿನ ಕಾರ್ಮಿಕೆರೆನ್ ಪಿದಯಿ ಬತ್ತಿಲೆಕನೆ ಆಸ್ಪತ್ರೆಗ್ ಲೆತೊಂದು ಪೋಯೆರ ಕಾತೊಂದುಲ್ಲ.
ಕಲ್ಲ್‌ದ ರಾಶಿಲೆಗ್ ಅಡ್ಡ ಕೊರೆದ್ 44 ಮೀಟರ್‌ ಪೈಪ್‌‌ನ್ ಗೋಡ್ಯಾದ್ ಆತ್ಂಡ್, ಆಂಡ ಅವೆತುಲಯಿ ಮೆಷಿನ್‌ಡ್ ಕೊಯ್ಯೆರಾವಂದಿನ ಸ್ಟೀಲ್ ರಾಡ್‌‌ಲು ತಿಕ್ಕ್‌ದ. ಎನ್ಡಿಆರ್ಎಫ್ ಸಿಬ್ಬಂದಿಲು ಆ ರಾಡ್‌ಲೆನ್ ಕೊಯ್ದ್ ಕೊರ್ಪೆರ್, ಬೊಕ್ಕ ಎಂಕ್ಲು ಮೆಷಿನ್‌ನ್ ಕುಡ ಗಲಸುವ” ಪಂದ್ ರಕ್ಷಣಾ ಅಧಿಕಾರಿ ಹರ್ಪಾಲ್ ಸಿಂಗ್ ಕೋಡೆ ರಾತ್ರೆ ಪಂತೆರ್.
ಕಾಂಡೆದ ಅಪ್‌ಡೇಟ್ ಪ್ರಕಾರ ಡ್ರಿಲ್ಲಿಂಗ್ ಮೆಷಿನ್‌ಡ್ ತಾಂತ್ರಿಕ ದೋಷ ತೋಜಿದ್ ಬತ್ತಿನೆರ್ದಾವರ ದೆಲ್ಲಿರ್ದ್ ವಿಶೇಷಜ್ಞೆರ್ ಅವೆನ್ ಸಮ ಮನ್ಪೆರ ಸುರಂಗೊದಡೆಗ್ ಎತ್ತ್‌ದೆರ್.
ನನ ಒಕತೆ ದೂರೊದ ಡ್ರಿಲ್ಲಿಂಗ್ ಬಿಕಿ ಇತ್ತ್‌ದ್, ಡ್ರಿಲ್ಲಿಂಗ್ ಬೇಲೆ ಆಯಿನೇ 3 ಜನ ಎನ್ಡಿಆರ್ಎಫ್ ಬೀರೆರ್ ಸುರಂಗೊದುಲಯಿ ಪೋಯೆರ ಉಲ್ಲೆರ್.