ಬೆಂಗ್ಳೂರ್ ಕಂಬುಲ । ತುಳು ಭಾಷೆನ್ ರಾಜ್ಯೊದ ಎಚ್ಚಿನ ಅಧಿಕೃತ ಭಾಷೆ ಮನ್ಪೆರ ಪುನೆಪು ಬರ್ಪ: ಸಿ ಎಂ ಸಿದ್ದರಾಮಯ್ಯೆರ್

Last updated on November 26th, 2023 at 07:40 am

ಬೆಂಗ್ಳೂರ್‌ಡ್ ನಡತೊಂದುಪ್ಪುನ ಕಂಬುಲೊಡು ಪಾತೆರ್ನ ಸಿ ಎಂ ಸಿದ್ದರಾಮಯ್ಯೆರ್ ತುಳು ಭಾಷೆನ್ ರಾಜ್ಯೊದ ಎಚ್ಚಿನ ಅಧಿಕೃತ ಭಾಷೆ ಮನ್ಪೆರ ಪುನೆಪು ಬರ್ಪ ಪಂದ್ ಪಂಡೆರ್.

ಇರ್ವೆರ್ ಕುಡ್ಲ, ಒಡಿಪುದಕುಲು ತಿಕ್ಯೆರ್ನ್ಡ ಅಕುಲು ಏತೇ ಭಾಷೆ ಗೊತ್ತಿತ್ತ್ಂಡಲಾ ತುಳುಟೇ ಪಾತೆರುವೆರ್. ಅಕುಲೆನ ಮಾತೃಭಾಷೆದ ಮಿತ್ತ್ ಅಕುಲೆಗ್ ಆತ್ ಮೋಕೆ, ಅಭಿಮಾನ ಉಂಡು ಪಂದ್ ಪಂಡೆರ್.

ಅಧಿಕೃತ ಭಾಷೆದ ಬಗೆಟ್ ಪಾತೆರೊಂದು ಈ ವಿಷಯೊನು ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರೆಡ ಪಾತೆರುವೆ, ಆರೇ ತೂವೊಡಾತೆ ಪಂದ್ ಪಂಡೆರ್. ದುಂಬು ನಿಕ್ಲೇನ ಜಿಲ್ಲೆದಾರೇ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರಾದಿತ್ತೆರ್ನ್ಡಲಾ ಆರ್ ಮಲ್ದಿಜೆರ್. ಎಂಕುಲು ಮನ್ಪುನ ಪುನೆಪು ಬರ್ಪ ಪಂದ್ ಪಂಡೆರ್.

ನಡುಟು ತುಳುಕು ಲಿಪಿ ಇಜ್ಜತಾ ಪಂದ್ ಸಿ ಎಂ ಕೇನ್ನಗ ಅಲ್ಪ ಇತ್ತಿನ ಎಚ್ಚಿನ ತುಳುವೃರ್ “ಇದೆ ಇದೆ” ಪಂದ್ ಬೊಬ್ಬೆ ಪಾಡಿನೆನ್ ತೂದು ತುಳು ಲಿಪಿ ಒಂಜಿ ಮಟ್ಟ್‌ಡ್ ತುಳುವೆರೆಗ್ ಎತ್ತ್‌ದ್ಂಡ್ ಪಂದ್ ತೋಜಿದ್ ಬರ್ಪುಂಡು.

ದಾಲ ಆವಡ್, ನನಲಾ ರಾಜ್ಯೋದ ರಾಜಕಾರಣಿಲೆನ ಬಾಯಿಡ್ ಪ್ರಯತ್ನ ಬರ್ಪ, ಪುನೆಪು ಬರ್ಪ ಕೇನುನತ್ತಂದೆ ಮಲ್ತ್‌ದೇ ತೀರುನ ಪನ್ಪಿ ತಂಕೊದ ಪಾತೆರ ಕೇನೊಂದಿಜ್ಜಿ ಪನ್ಪಿನ ತುಳುವೆರೆಗ್ ಬೆಸರ್‌ದ ಸಂಗತಿ.