Last updated on November 26th, 2023 at 01:55 pm
ತುಮಕೂರು: ಬೆಂಗ್ಳೂರ್‌ಡ್ ನಡತೊಂದುಪ್ಪುನ ಕಂಬುಲ ತೂದು ಪಿರಬರೊಂದುಪ್ಪುನಗ ಕಾರ್ ಬೊಕ್ಕ ಬೋರ್‌ವೆಲ್ ಲಾರಿದ ನಡುಟು ನಡತಿನ ಭೀಕರ ಎಡ್ತೆಡ್ ಕುಡ್ಲ ಜಿಲ್ಲೆದ ಇರ್ವೆರ್ ಜವನೆರ್ ತೀರ್ದಿನ ನಡಕೆ ನಡತ್‌ದ್ಂಡ್.
ತೀರ್ದಿನಕಲೆನ್ ಪೆರಾರ ಬಜ್ರೆ ಗ್ರಾಮೊದ ನಿವಾಸಿ ಕಿಶನ್ ಶೆಟ್ಟಿ(20) ಬೊಕ್ಕ ಭಟ್ಟೆರೆತೋಟ ಗ್ರಾಮೊದ ನಿವಾಸಿ ಫಿಲೀಪ್ ಲೋಬೋ (32) ಪಂದ್ ಗುರ್ತ ಪತ್ತ್‌ದೆರ್.
ತುಮಕೂರು ಜಿಲ್ಲೆದ ಕುಣಿಗಲ್ ತಾಲೂಕ್‌ದ ಚಿಗಣಿಪಾಳ್ಯದಲ್ಪ ನಡಕೆ ನಡತ್‌ದ್ಂಡ್. ಎಡ್ತೆಡ್ ನಿತೀಶ್ ಭಂಡಾರಿ, ಪ್ರೀತಿ ಲೋಬೋ ಬೊಕ್ಕ ಹರೀಶ್ ಮೊಕಲೆಗ್ ಗಡಿಕುಲಾತ. ಬೆಂಗ್ಳೂರ್‌ಡ್ ಸನಿಯಾರ ನಡತೊಂದಿತ್ತಿನ ಕಂಬುಲ ತೂದು ಕುಡ್ಲಗ್ ಪಿರ ಬರೊಂದುಪ್ಪುನಗ ಕುಣಿಗಲ್‌ರ್ದ್ ತುಮಕೂರು ದಂಚಿಗ್ ಪೋವೊಂದಿತ್ತಿನ ಬೋರ್‌ವೆಲ್ ಲಾರಿ ಎಡ್ತ್‌ದ್ ಈ ನಡಕೆ ನಡತ್‌ದ್ಂಡ್. ಲಾರಿ ಎಡ್ತಿನ ಪೆಟ್ಟ್‌ಗ್ ಕಾರ್ ಅಲಕ್ಕ ಞಕ್ಕೆ ಆತ್ಂಡ್.
ಜಾಗೆಗ್ ಕುಣಿಗಲ್ ಪೊಲೀಸೆರ್ ಬತ್ತ್‌ದ್ ಪರಿಶೀಲನೆ ಮಲ್ತ್‌ದ್, ಲಾರಿ ಬೊಕ್ಕ ಲಾರಿ ಡ್ರೈವರ್‌ನ್ ವಶೊಕು ಗೆತೊಂದೆರ್. ಈ ಬಗೆಟ್ ಕುಣಿಗಲ್ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.