Last updated on December 5th, 2023 at 05:40 pm
ಬಂಟ್ವಾಳ. ಬಿಸಿರೋಡ್‌ದ ವಿವೇಕನಗರ ಸಾದಿದ ಗುಂಡಿನ್ ಅಧಿಕಾರಿ ಒರ್ತಿ ಕಾಂಕ್ರೀಟ್ ಪಾಡ್ದ್ ಮುಚ್ಚಿದಿನ ನಡಕೆ ಸೋಮಾರ ರಾತ್ರೆ ನಡತ್‌ದ್ಂಡ್.
ಬಿ.ಸಿ.ರೋಡ್ ಬಸ್ ಉಂತಡೆದ ಎದುರುದ ಸರ್ವೀಸ್ ರೋಡ್‌ರ್ದ್ ವಿವೇಕ ನಗರ ರೋಡ್‌ಗ್ ಪೊಗ್ಗುನಲ್ಪ ಸಾದಿನ್ ಉದ್ದೊಗು ಗರ್ತ್ ಪಾಡ್ದಿತ್ತ್‌ದ್, ಅವೆನ್ ಮುಚ್ಚಂದಿನೆರ್ದಾವರ ವಾಹನಸವಾರೆರ್ ಬಙ್ಙೊಡು ಪರಡುನ ಲೆಕ ಆದಿತ್ತ್ಂಡ್.
ಮುಲ್ಪದ ಇಂಜಿ ಹೋಟೆಲ್‌ದ ದನಿ ನೀರ್‌ದ ಪೈಪ್ ಪಾಡ್ಪಾವುನ ಪೊರ್ತುಡು ಕಾಂಕ್ರೀಟ್ ರೋಡ್‌ನ್ ಗರ್ತ್‌ದ್ ಪೋದಿತ್ತೆರ್. ಉ್ಂದು ಪುರಸಭೆ ಸೇರ್ದ್ ಸಂಬಂಧಿತಿನ ಮಾತಾ ಇಲಾಖೆಲೆನ ಅಧಿಕಾರಿಲೆನ ಕಣ್ಣ್‌ಗ್ ತೋಜಿಂಡಲಾ ಒವ್ವೇ ಕ್ರಮ ಗೆತೊಂದಿಜ್ಜಂಡ್. ಕಡೆಕ್ ಗರ್ತ್ ಪಾಡಿನ ಜನೊನು ಲೆಪ್ಪುಡಾದ್ ಕಾಂಕ್ರೀಟ್ ಪಾಡ್ಪಾವುನ ಬೇಲೆಲಾ ಮಲ್ದಿಜೆರ್ ಪನ್ಪಿ ಆರೋಪ ಕೇಂದ್ ಬತ್ತಿತ್ತ್ಂಡ್. ಆಂಡ ಇಲಾಖೆ ಒವೆನ್ಲಾ ಕೆಬಿಕ್ ಪಾಡೊನಂದೆ ಮನಿಪ್ಪಂದೆ ಇತ್ತ್ಂಡ್.
ಈ ರೋಡ್‌ಡ್ ಮಸ್ತ್ ಇಲ್ಲ್‌ಲ್ ಇತ್ತ್‌ದ್, ಜೋಕ್ಲೆನ ಆಸ್ಪತ್ರೆ ಅಂಚೆನೇ ಒಂಜಿ ಶಾಲೆಲಾ ಉಂಡು. ಇಡೆಗ್ ಬತ್ತ್‌ದ್ ಪೋಪಿನ ಗಾಡಿದಕುಲು ಜೂವ ಕೈಟ್ ಪತೊಂದೇ ಗಾಡಿಲೆನ್ ರೋಡ್‌ಗ್ ಜಪ್ಪಾವೆದೆರ್. ಉ್ಂದೆನ್ ತೂಯಿನ ಮುಲ್ಪದ ಪಿರ ಒರಿದಿನ ವರ್ಗೊಲೆನ ಬುಲೆಚ್ಚಿಲ್‌ದ ಇಲಾಖೆದ ಅಧಿಕಾರಿ ಬಿಂದಿಯಾ ನಾಯಕ್ ಮೇರ್ ಪುರಸಭೆಗ್ ಸುರುಟು ಬಾಯಿಪಾತೆರೊಡು ಸಮ ಮನ್ಪೆರ ಪಂತೆರ್. ಬೊಕ್ಕ ಓಲೆ ಬರೆದ್ ರೋಡ್ ರಿಪೇರಿ ಮನ್ಪೆರ ಬಿನ್ನಪು ಕೊರ್ದಿತ್ತೆರ್. ಆಂಡ ಒಯಿಕ್ಲಾ ಬಿಲೆ ಕೊರಂದೆ ಮನಿಪ್ಪಂದೆ ಇತ್ತಿನ ಇಲಾಖೆದ ಸಹವಾಸನೇ ಬೊರ್ಚಿ ಪಂಡ್‌ದ್ ತಾನೇ ಸ್ವಂತ ಕಾಂಕ್ರೀಟ್ ಪಾಡ್ದೆರ್. ರಾತ್ರೆ ಗಾಡಿಲು ಕಮ್ಮಿ ಪೋಪುನೆರ್ದಾವರ ಸೋಮಾರ ರಾತ್ರೆ ಕಾಂಕ್ರೀಟ್ ಪಾಡ್ದೆರ್ ಪಂದ್ ತೆರಿದ್‌ಬೈದ್ಂಡ್.