Last updated on December 8th, 2023 at 10:19 am
ನಮನ್ ಆಳ್ವಿಕೆ ಮಲ್ದಿನ ಬ್ರಿಟೀಷೆರ್ ನಮೆತ ನಮ್ಮ ರಾಜ್ಯೊನು ತುಳುದೇಶ, ತುಳುವ ಪನ್ದ್ ಅಪಗಪಗ ಲೆತ್ತ್‌ದೆರ್. ನಮ್ಮ ಸಂಸ್ಕೃತಿಲೆನ್ “Tuluva worship” ಪನ್ದ್ ಲೆತ್ತ್‌ದೆರ್. ಇಂಚ ಉಪ್ಪುನಗ ಇತ್ತೆದ ಕರ್ನಾಟಕ ಸರಕಾರೆಲೆಗ್ ಕರಾವಳಿ ಪನ್ಪಿನ ಮಂಡೆಮಾರಿ ದಾನೆ ಅಡರ್ದಿನಿ?
ಕೇರಳ ಸರಕಾರ ಕಾಸ್ರೋಡು ಬಸ್ ಉಂತಡೆಗ್ ಅಧಿಕೃತವಾದ್ ತುಳುನಾಡ್ ಬಸ್ ಉಂತಡೆ ಪನ್ದ್ ಪನ್ತ್ಂಡ್. ತುಕ ಕರ್ನಾಟಕ ಸರಕಾರದ ಒವ್ಲೇ ಒಂಜಿ ಯೋಜನೆ ಆವಡ್ ನೋಟೀಸ್‌ಲು ಆವಡ್ ಅವೆಟ್ ತುಳುನಾಡ್ ಪನ್ಪಿನ ಪದ ಪೆಜ್ಜರೆ ಆವಾ? ಕರಾವಳಿ ಪನ್ದ್ ಪನೊಂದು ಪನೊಂದು ತುಳುತ ಅಸ್ಥಿತ್ವ ದಾಂತಿಲೆಕ್ಕ ಮಲ್ತೊಂದುಲ್ಲೆರ್? ನಮ್ಮ ತುಳುನಾಡ್‌ದವೇ ಆಯಿನ ಕಾರ್ಲ ವಾ ಕರಾವಳಿ? ಪುತ್ತೂರು ವಾ ಕರಾವಳಿ? ಬೆದ್ರ ವಾ ಕರಾವಳಿ? ಬೊಲ್ತೇರ್ ವಾ ಕರಾವಳಿ? ಏತ್ ಕಡಲುಲು ಉಲ್ಲ ನೆಟೆ? ಇಂಚ ಉಪ್ಪುನಗ ಉಂದೆನ್ ಪೂರಾ ಕರಾವಳಿ ಪನ್ದ್ ಲೆಪ್ಪುನ ಹಮ್ಸಾನಿ ದಾಯೆಗ್?
ತುಳುನಾಡ್ ಪನ್ಡ ಕನ್ನಡದ ಸಾರ್ವಭೌಮತ್ಯೆಗ್ ಪೆಟ್ಟ್ ಬೂರುನಾಂಡ ತುಳುವೆರೆಗ್ ಸೊತಂತ್ರ ನನಲ ಬೈಜಾ? ಇನಿ ತುಳುನಾಡ್ ಪನೊಡ್ಚಿ ಪನ್ಡಿನಕುಲು ಎಲ್ಲೆ ತುಳು ಪಾತೆರೊಡ್ಚಿ ಪನ್ದ್ ಪನ್ಡೆರ್ಡಲಾ ಕೇನುವೆರಾ?
ಪಿದಯಿದಕುಲು ಸಯ್ಯಡ್, ತುಳುನಾಡ್‌ದವೇ ಕೆಲವು ಕಜವುಲು ಮುಲ್ಪದ ನುಪ್ಪು ನೀರ್ ತಿನ್ದ್, ತುಳುವೆರೆರ್ದ್ ಮಲ್ಲ ಆದ್ ಇತ್ತೆ ತುಳುನಾಡ್ ಪನಂದೆ ಕರಾವಳಿ ಪನ್ಪಿನಕಲೆನ ನಾಲಯಿಗ್ ಬೆಚ್ಚ ಕೈಪೊಡು. ಇತ್ತೆ ಭೂತಕೋಲ, ಕಂಬುಲ ಪೂರಾ ತುಳುನಾಡ್‌ದ ಸಂಸ್ಕೃತಿ ಅತ್‌ತ್‌ಗೆ ಕರಾವಳಿ ಸಂಸ್ಕೃತಿಗೆ. ಇಲ್ಲಗ್ ಬತ್ತಿನ ಬಿನ್ನೆರ್ ಪೇರ ನೀರ್ ಪರೊಡು, ರಡ್ಡ್ ವನಸ್ ಮಲ್ಪೊಡು ಬೊಕ್ಕ ಪಿಕಿರ್‌ದಾಂತಿಲೆಕ್ಕ ರಾಪಟ ಪೋದು ಇಲ್ಲೇ ಎನ್ನ ಪನ್ದ್ ಪನ್ಪಿಲೆಕ್ಕ ಆವರೆ ಬಲ್ಲಿ. ಅಂಚ ಪನ್ಡೆರ್ಡ ಬಿನ್ನೆರೆನ್ ತಾದಿಡ್ ಉಂತಾವರೆ ತುಳುವೆರೆಗ್ ತೆರಿದುಪ್ಪೊಡು.
ಕರಾವಳಿದ ಮರ್ಲ್ ಇತ್ತೆನೇ ಉಂತಾಯಿಜಿಡ ನನ ತುಳುನಾಡ್ ಪನ್ಡ ಓಲು ಪನ್ದ್ ಪನ್ಪಿಲೆಕ್ಕ ಆವು.