Last updated on December 12th, 2023 at 02:43 pm
ಪರಿಸರ ತಜ್ಞೆ, ಗ್ರೀನ್ ಹೀರೋ ಆಫ್ ಇಂಡಿಯಾ ಡಾ.ಆರ್.ಕೆ.ನಾಯರ್ ಮೆರೆಗ್ ನಾಸಾದ ಕಡೆರ್ದ್ ಅಟ್ಟನೆ ಆದಿತ್ತಿನ ಕಾನ್ಸರೆನ್ಸ್ಡ್ ಪಾಲ್‌ಪಡೆದ್ ಪ್ರಬಂಧ ಮಂಡನೆ ಮನ್ಪುನ ಸಂದರಪ್ಪು ತಿಕ್ಕ್‌ದಿತ್ತ್‌ದ್, ಈ ಪೊರ್ತುಡು ತುಳು ಭಾಷೆದ ಕಮ್ಮೆನ ಪಸರಾದ್ ವಿಶೇಷತೆ ತೋಜಾದೆರ್. ಆನ್‌ಲೈನ್‌ಡ್ ನಾಸಾ ಅಟ್ಟನೆ ಮಲ್ದಿನ ಕಾನ್ಸರೆನ್ಸ್ಡ್ ಇಸ್ವೊದ ಬೇತೆ ಬೇತೆ ಕಡೆತ ವಿಜ್ಞಾನಿಲು ಅಂಚೆನೇ ತಜ್ಞೆರ್ ಪಾಲ್ ಪಡೆದ್ ವಿಚಾರ ಮಂಡನೆ ಮಲ್ತಿತ್ತೆರ್. ಜಾಗತಿಕ ತಾಪಮಾನೊನು ಅಂಕೆಡ್ ದೀಪಿನ ಬಗೆಟ್ ನಡತಿನ ಕಾನ್ಸರೆನ್ಸ್ಡ್ ಜಾಗತಿಕ ತಾಪಮಾನೊದ ಅಂಕೆಗ್ ಮಿಯಾವಾಕಿ ಕಾಡ್‌ದ ಪಾತ್ರೊದ ಬಗೆಟ್ ವಿಚಾರ ವಿನಿಮಯ ನಡತ್ಂಡ್. ಮಿಯಾವಾಕಿದಂಚಿನ ಕಾಡ್ ಬುಲೆಪಾವುನೆರ್ದ್ ಪುಡಮಿಗ್, ಜೂವರಾಶಿಲೆಗ್ ಬೊಕ್ಕ ಬರ್ಪಿ ಜನಾಂಗೊಗು ಆಪಿನ ಪ್ರೇಜನೊಲೆನ ಬಗೆಟ್ ಗುಜರಾತ್‌ಡ್ ಉದ್ಯಮಿ ಆದುಪ್ಪುನ ಸುಳ್ಯದ ಡಾ.ಆರ್.ಕೆ.ನಾಯರ್ ಪಾತೆರ್ಯೆರ್. ಕೇಂಡಿ ಕೇನ್ಪುಲೆಗ್ ಸದು ಕೊರ್ಯೆರ್. ತನ್ನ ವಿಚಾರ ಮಂಡನೆದ ಅಕೇರಿಡ್ ಆರ್.ಕೆ.ನಾಯರ್ ತುಳುಟು ನಾಸಾಗ್ ಸೊಲ್ಮೆಲೆನ್ ಸಂದಾಯೆರ್.