ಇನಿ ತುಳುಪೀಡಿಯಾ ಲೋಕೊಗೊಪ್ಪರೆಗುಂಡು

Last updated on August 21st, 2022 at 08:32 am

ತುಳುನಾಡ್ ಬೊಕ್ಕ ತುಳು ಬಾಸೆದ ಬಗೆಟ್ಟ್ ಗೇನ ದಿಂಜಿದ ಗೇನೊದ ತುಪ್ಪೆ ತುಳುಪೀಡಿಯ ವೆಬ್’ಸೈಟ್ ಸೋನ ನಾಲ್ ಪೋಪಿನಾನಿ ಪಂಡ ಇನಿ ಮಧ್ಯಾಹ್ನ 2.05 ಗಂಟೆಗ್ ಲೋಕೊ ಗೊಪ್ಪರೆಗುಂಡು ಪಂದ್ ತುಳುವಾಣಿ ವಾರ್ತೆಗ್ ತುಳುಪೀಡಿಯಾ ದಕುಲು ತೆರಿಪಾಯೆರ್.
ತುಳು ಬಾಸೆ ಬೊಕ್ಕ ತುಳುನಾಡ್’ದ ಇಚಾರೊಲು ಇಂಗ್ಲೀಷ್ ಬಾಸೆಡ್ ಓದರೆ ತಿಕ್ಕುಜಿ. ತಿಕ್ಕ್ಂಡಲಾ ಅವೆನ್ ನಾಡ್ ಪತ್ತುನವೇ ಮಾಮಲ್ಲ ಕಜ್ಜ ಪನ್ಪಿನ ಬೆಸರ್ ಮಾತಾ ತುಳುವೆರ್ನ ಆದಿತ್ತ್ಂಡ್, ಅಂಚಾದ್ ತುಳು,ತುಳುನಾಡ ಇಚಾರೊಲು ಮಾತಾ ಒಂಜೇ ಕಡೆಟ್ ತಿಕ್ಕೊಡು ಪನ್ದ್ ತುಳುಪೀಡಿಯಾ ಮಲ್ದ ಪನ್ದ್ ತೆರಿಪಾಯೆರ್.
ಇತೋರ್ತು ಸುಮಾರ್ ಬರವುಲೆನ್ ಇಂಗ್ಲೀಷ್’ಡ್ ಪಾಡ್ದ ಮಾತ್ರ ಅತ್ತಂದೆ ನಿಕಲೆನ ಒವ್ವಾಂಡಲ ಬರವು ಇತ್ತ್ಂಡ ಅವೆನ್ಲಾ ಎಂಕಲೆಗ್ ಕೊರೊಲಿ. ಎಂಕುಲು ಅವೆನ್ ಪಾಡುವ ಪನ್ದ್ ಪಂಡೆರ್. ಉಂದು ಬೀಟಾ ರಿಲೀಸ್, ಒಂತೆ ದಿನ ಪೋಯಿನೇ ಪೂರ್ಣ ಪ್ರಮಾಣೊದ ರಿಲೀಸ್ ನಡಪರೆಗ್ ಉಂಡುಗೆ. ಕಾಲಿ ಓದುನಕಲೆಗ್ ಮಾತ್ರ ಅತ್ತ್, ತುಳುತ ಬಗೆಟ್ ಅಧ್ಯಯನ ಮಲ್ಪುನಕಲೆಗ್ಲಾ ಉಂದೊಂಜಿ ಮಲ್ಲ ಗೇನದ ತುಪ್ಪೆ ಆದ್ ನನ ದುಂಬುಗು ಬುಲೆಯುಂಡು ಪನ್ಪಿನ ಆಶಯ ಉಂಡು ಪನ್ದ್ ತೆರಿಪಾಯೆರ್.