ಭೂಮಿ ಅಪ್ಪೆ ಮದಿಮಾಲಾಪಿನ “ಕೆಡ್ಡಸ”

Last updated on February 10th, 2024 at 08:59 am

ತುಳುವೆರ್ ಪ್ರಕೃತಿನ್ ಆರಾಧನೊ ಮಲ್ದಿನಕುಲು. ಮರ, ಕಲ್ಲ್, ಪರವುನ ನೀರ್, ಕಾಡ ಮುರ್ಗೊಲೆಡ್ಲಾ ದೇವೆರೆನ್ ತೂಯಿನಕುಲು. ಅಂಚೊನೇ ಒಂಜಿ ಭೂಮಿ ಅಪ್ಪೆನ್ ಆರಾಧನೆ ಮಲ್ಪುನ ಪರ್ಬ “ಕೆಡ್ಡಸ”.

ಕೆಡ್ಡಸೊರ್ದು ಒಂತೆ ದಿನ ದುಂಬೇ ತುಳುನಾಡ ಭೂಮಿಡ್ ಪಗತೆಲು ತೋಜಿದ್ ಬರ್ಪ, ಸಿಮ ಗಾಳಿ ಬೀಜರೆ ಸುರು ಆಪುಂಡು. ಉಂದೆಕ್ ಕೆಡ್ಡಸದ ಗಾಳಿ ಪನ್ದ್ ಪನ್ಪೆರ್. ಭೂಮಿ ಅಪ್ಪೆ ಫಲ ಕೊರಿಯರೆ ಅಟ್ಟನೆ ಮಲ್ಪುನಲೆಕ್ಕ ಗಿಡ ಮರೊಕುಲು ಕೊಡಿದ್ ಪೂ ಬುಡೊಂದಿಪ್ಪುವ. ಇಂಚಿನ ಪೊರ್ತುಡು ಭೂಮಿ ಮೂಜಿ ದಿನ ಮದಿಮಾಲಾಪೊಲು ಪನ್ದ್ ಈ ಪರ್ಬ ಕರಿಪುವೆರ್. ಈ ಪೊರ್ತುಡು ನೆಲ ಗರ್ಪುನ ಆವಡ್, ಮರ ದೈ ಕಡ್ಪುನ ಆವಡ್ ನಿಷಿದ್ದ ಉಂಡು.

ನಡುಕೆಡ್ಡಸೊಡು ಜವನೆರ್ ಬೋಂಟೆಗ್ ಪಿದಡುವೆರ್. ಪುಂಡದ ಪಕ್ಕಿಗ್ ಈ ಪೊರ್ತುಡು ಜ್ವರ ಬರ್ಪುಂಡುಗೆ ಅಂಚ ಪುಂಡದನ ಬೋಂಟೆ ಮಲ್ಪುವೆರ್. ತಿಕ್ಕಿನ ಪುಂಡದನ್ ಮಾತೆರ್ಲಾ ಪಟ್ಟ್ ದ್ ತಿನ್ಪೆರ್. ಉಂದೆಕ್ ಕೆಡ್ಡಸದ ಬೋಂಟೆ ಪನ್ದೇ ಪುದರ್.

ಭೂಮಿ ಅಪ್ಪೆಗ್ ಇರೆಟ್ ಬಲಸುನಲಾ ಕ್ರಮ ಕೆಲವು ಕಡೆಟ್ ಉಂಡು. ಕುಡುಅರಿ ಬಲಸುಲ ಕ್ರಮಲಾ ಕೆಲವು ಕಡೆಟ್ ಉಂಡು. ಒಟ್ಟುಗು ಈ ಮೂಜಿದಿನ ತುಳುವೆರ್ ಭೂಮಿ ಅಪ್ಪೆನ ಪೂಜೆಗ್ ದೀತೆರ್. ಇಂಚೊಗು ಈ ಆಚರಣೆಲು ಪೂರಾ ಮದೆ ಸೇರೊಂದುಂಡು. ತುಳುವೆರ್ ಬೆನ್ನಿ ಬುಡ್ದ್ ಬೇತೆ ಬೇರೊಲೆಗ್ ಜತ್ತಿ ಬೊಕ್ಕ ಈ ಪರ್ಬೊಲೆನ ಮೂಲ ಅರ್ಥಲಾ ಪಗತೊಂದುಂಡು. ಕೆಡ್ಡಸ ಪನ್ಡ ದಾದ ಉಂದೆನ್ ದಾಯೆಗ್ ಮಲ್ಪುವೆರ್ ಪನ್ಪಿನೆನ್ ನನ ದುಂಬುದ ಜೋಕುಲೆಗ್ ಪೆರಿಯಾಕ್ಲು ಪನ್ದ್ ಕೊರೊಡು. ಮಾತೆರೆಗ್ಲಾ ಕೆಡ್ಡಸದ ಎಡ್ಡೆಪ್ಪುಲು.