Last updated on August 24th, 2022 at 04:30 pm
ದೇಶದ ಪ್ರಧಾನಿ ಮೋದಿ ಸಪ್ಟೆಂಬರ್ 2ಕ್ಕ್ ಕುಡ್ಲಗ್ ಬತ್ತ್‌ದ್ ಗೋಲ್ಡ್ ಫಿಂಚ್ ಕಲೊಟು ಭಾಷಣ ಮಲ್ಪರೆ ಉಲ್ಲೆರ್. ಆ ಲೆಕ್ಕೊಡು ಕರ್ನಾಟಕೊಡು ದುಂಬು ಬರ್ಪಿನ ಓಟುಗು ಬಿಜೆಪಿದ ಲೆಕ್ಕೊಡು ಮಲ್ಲ ಮಟ್ಟ್‌ದ ಪ್ರಚಾರ ಸುರು ಆಪಿಲೆಕ್ಕ ತೋಜೊಂದುಂಡು.
ಆಂಡ ವಿಷಯ ಉಂದತ್ತ್, ಬಿಜೆಪಿ ಕಾರ್ಯಕರ್ತೆರ್ನವೇ ಆಯಿನ ‘ಪೋಸ್ಟ್ ಕಾರ್ಡ್ ನ್ಯೂಸ್’ ಬೊಕ್ಕ ‘ನಮೋ ಕರುನಾಡ್’ ಪನ್ಪಿ ಪೇಜ್‌ಡ್ ಪರಡೊಂದಿಪ್ಪುನ ಪೋಸ್ಟ್ ಇತ್ತೆ ವೈರಲ್ ಆತ್ಂಡ್. ಆ ಪೋಸ್ಟ್‌ಡು, “ತುಳುವೆರೇ, ಮೋದೀಜಿ ಕುಡ್ಲಗ್ ಬರೊಂದುಲ್ಲೆರ್. ವಿಶ್ವನಾಯಕನ್ ಎದ್ಕೊನುನ ಒಟ್ಟುಗು ಕುಡ್ಲದ ಸಂಸದೆ ಬಿಜೆಪಿದ ರಾಜ್ಯಾಧ್ಯಕ್ಷೆರಾಯಿನ ನಳೀನ್ ಕುಮಾರ್ ಕಟೀಲ್‌ನ್ ಬದಲ್ ಮಲ್ಪರೆ ಒತ್ತಾಯ ಮಲ್ಪುಗ. ನಿಕ್ಲೆಗ್ ತೆರಿದಿನ ಮಾತಾ ಬಾಸೆಲೆಡ್ ಟ್ವಿಟರ್ ಫೇಸ್‌ಬುಕ್ಕುಲೆಡ್ ಪೋಸ್ಟ್ ಪಾಡ್ದ್ ಮೋದೀಜಿಡ ಒತ್ತಾಯ ಮಲ್ಪುಲೆ. ಕುಡ್ಲ ಬುಲೆಯೊಡಾಂಡ ಸಂಸದೆ ಬದಲಾವೊಡು” ಪಂದ್ ಬರೆತ್ಂಡ್.
ಒಂಜಿ ರಾಜ್ಯಾಧ್ಯಕ್ಷನ ವಿರುದ್ದ ಅವ್ವೇ ಪಾರ್ಟಿದಕುಲು ಅವ್ಲಾ ಅಕ್ಲೆನ ಮಲ್ಲ ನಾಯಕೆ ಬನ್ನಗ ತಿರ್ಗ್‌ದ್ ಬೂರ್ದಿನವು ಬಿಜೆಪಿಡ್ ಉಂದೇ ಸುರು.
ಇಂಚಪ್ಪೊಗು ರಾಜ್ಯಡ ನಡತಿನ ಕೆಲವು ಹಿಂದೂ ಕಾರ್ಯಕರ್ತೆರ್ನ ಹತ್ಯೆ ಮಾತ್ರ ಅತ್ತಂದೆ ಕರಿನ 13 ವರ್ಸೊರ್ದಿಂಚಿ ಸಂಸದೆ ಆದಿತ್ತ್‌ದ್ ಕುಡ್ಲಡ್ ಒರಿ ತೂಪಾದ್ ಪನ್ಪಿನಂಚಿನ ಒವ್ವೇ ಬೇಲೆ ಆವಂದಿನ ಜನಕುಲೆಗ್ ಪಿಸಿರ್ ಏರ್ದ್ಂಡ್.
ಮಾತ್ರ ಅತ್ತಂದೆ ರಾಜ್ಯೊದ ಮಲ್ಲ ಪೋಸ್ಟುಡು ಇತ್ತ್‌ದ್, ಸರಕಾರೊಡು ಅಧಿಕಾರೊಡು ಇತ್ತ್‌ದ್ ನನಲಾ ತನ್ನ ಊರುದ ಬಾಸೆ ತುಳುಕು ಮಾನಾದಿಗೆ ಕೊರ್ಪಾವರೆ ಆವಂದಿನಲಾ ಜನಕುಲೆಗ್ ಬಾರೀ ಬೇಜಾರ್ ಉಂಡು. ಕರಿನ ಸಲ ತುಳುವೆರ್ ಕೇನ್ನಗ ತನ್ನ ಅಧಿಕಾರವಧಿಡ್ ಮಲ್ತ್ ಕೊರ್ಪೆ ಪನ್ದ್ ನಳೀನೆರ್ ಆಜೆ ಪಾಡ್ದಿತ್ತೆರ್ ಆಂಡ ಅವ್ ಆಪಿಲೆಕ್ಕ ತೋಜುಜಿ. ಇಂಚ ಮಾತಾ ವಿಸಯಲಾ ಒಟ್ಟಾದ್ ಜನಕುಲು ನನ ದುಂಬುಗು ಕುಡ್ಲಡ್ ಉಂತುನ ಬಿಜೆಪಿದ ಸಂಸದೆ ಬದಲಾವೊಡು ಪನ್ದ್ ಪನೊಂದುಲ್ಲೆರ್.
ಹಿಂದುತ್ವಗ್ ಪೊರುಂಬಾಟ ಮಲ್ದಿನ ಗಟ್ಟಿ ತಂಕದ ಜವನ್ಯೆರೆಗ್ ಅವಕಾಶ ಕೊರೊಡು, ಕುಡ್ಲನ್ ಅಭಿವೃದ್ದಿ ಮಲ್ಪುನಕಲೆಗ್ ಕೊರೊಡು ಪನ್ದ್ ಜನಕ್ಲೆನ ಅಭಿಪ್ರಾಯ. ಈ ನಡುಟು ಸಂಸದೆರ್ನ ಜಾಗೊನು ಸತ್ಯಜಿತ್ ಸುರತ್ಕಲ್‌ಗ್ ಕೊರೊಡು ಪನ್ದ್ ಒಂಜಿ ಬಣ ಪನೊಂದುಂಡು.
