Last updated on March 13th, 2024 at 08:22 am
ಒಡಿಪು: ಲೋಕಸಭಾ ಚುನಾವಣೆಗ್ ಅಭ್ಯರ್ಥಿಲೆನ್ ಫೈನಲ್ ಮನ್ಪುನ ಇಸಯೊಡು ರಾಜಕೀಯ ಪಕ್ಷೊಲು ಮಂಡೆಕರ್ಚಿ ಮಲ್ತೊಂದುಲ್ಲ. ಕಾಂಗ್ರೆಸ್ ರಾಜ್ಯೊದ ಕಡೀರ ಪಟ್ಟಿನ್ ಬುಡುಗಡೆ ಮಲ್ದ್ಂಡ್, ಬಿಜೆಪಿ ಇನಿ ಅತ್ತ್ಂಡ ಎಲ್ಲೆ(ಗುರುವಾರ) ಪಟ್ಟಿ ಬುಡುಗಡೆ ಮನ್ಪುಂಡು ಪಂದ್ ತೋಜೊಂದುಂಡು.
ಕರ್ನಾಟಕೊಡು ಎಚ್ಚ ಸೋದ್ಯ ಉಂಡುಮಲ್ದಿನ ಕ್ಷೇತ್ರೊಲೆಡ್ ಒಡಿಪು–ಕಿನ್ಯಮಗಲ್ನೂರ್(ಚಿಕ್ಕಮಗಳೂರ್) ಕ್ಷೇತ್ರೊಲಾ ಒಂಜಿ. ಇತ್ತೆ ಸಂಸದೆದಿಯಾದುಪ್ಪುನ ಶೋಭಾ ಕರಂದ್ಲಾಜೆ ಮೇರ್ ಕ್ಷೇತ್ರೊಡು ಕುಡೊರ ಸ್ಪರ್ಧೆ ಮನ್ಪುನ ಅಟ್ಟನೆಡ್ ಉಲ್ಲೆರ್. ಬೆರಿಬೆರಿ ರಡ್ಡ್ ಸರ್ತಿ ಅಜತ್ ಬೈದಿನ ಮೆರೆಗ್ ಇತ್ತೆ ವಿರೋಧೊದ ಪುಗೆಲಾ ಆಕೊಂದುಂಡು. ‘ಗೋ ಬ್ಯಾಕ್ ಶೋಭಾ’ ಅಭಿಯಾನ ನಡತ್‌ದ್, ರಾಜ್ಯ ಮಟ್ಟೊಡು ಸುದ್ದಿಯಾತ್ಂಡ್.
ಕುಡೊಂಜಿ ಕಡೆಟ್ ಕಾಂಗ್ರೆಸ್‌ರ್ದ್ ಬಿಜೆಪಿಗ್ ಬೈದಿನ ಪ್ರಮೋದ್ ಮಧ್ವರಾಜ್‌ಲಾ ಟಿಕೆಟ್‌ಗಾದೊ ಕಸರತ್ತ್ ಮಲ್ತೊಂದುಲ್ಲೆರ್. ಈ ಸರ್ತಿ ಎಂಕ್ ಟಿಕೆಟ್ ತಿಕ್ಕುಂಡು ಪನ್ಪಿ ವಿಶ್ವಾಸೊಡುಲ್ಲೆರ್. ಚಿಕ್ಕಮಗಳೂರ್‌ಡ್ ವಿಧಾನಸಭೆಟ್ ಸೋತಿನ ಸಿ.ಟಿ ರವಿಲಾ ಅವ್ವೇ ಕ್ಷೇತ್ರೊರ್ದು ಲೋಕಸಭೆಗ್ ಜಪ್ಪುನ ಅಲೆಚನೆಡ್ ಕೈಕಾರ್ ಪಂದಾವೊಂದುಲ್ಲೆರೊ ಪಂದ್ ಸುದ್ದಿ ಉಂಡು.
ಕೋಟ ಪೂಜಾರ್ಲೆಗ್ ಮಣೆ: ಇತ್ತೆದ ವರದಿಲೆನ ಪ್ರಕಾರ ಈ ಪುದರ್‌ಲೆನ್ ಬರಿಕ್ ದೀದ್ ಏರ್ಲಾ ಎನ್ನಂದಿನ ಅಭ್ಯರ್ಥಿಗ್ ಬಿಜೆಪಿ ಹೈಕಮಾಂಡ್ ಮಣೆ ಪಾಡುಂಡು ಪನ್ಪಿನ ಸುದ್ದಿಲಾ ಉಂಡು. ವಿಧಾನ ಪರಿಷತ್ ಪದುಕೆ ಕೋಟ ಶ್ರೀನಿವಾಸ ಪೂಜಾರ್ಲೆಗ್ ಟಿಕೆಟ್ ಕೊರ್ಪುನ ಸಾಧ್ಯತೆ ಉಂಡು. ಈ ಬಗೆಟ್ ಸೋಮಾರ ನಡತಿನ ಹೈಕಮಾಂಡ್ ಇನಯೊಡು ಚರ್ಚೆ ನಡತ್‌ದ್ಂಡ್ ಪಂದ್ ಪನೊಂದುಲ್ಲ ವರದಿಲು.
ಶೋಭಾ ಕರಂದ್ಲಾಜೆ ಮೆರೆಗ್ ಬಡಕಾಯಿ ಬೆಂಗಳೂರು ಕ್ಷೇತ್ರೊಡು ಟಿಕೆಟ್ ಕೊರ್ದು ಕೋಟ ಶ್ರೀನಿವಾಸ ಪೂಜಾರ್ಲೆನ್ ಒಡಿಪು- ಕಿನ್ಯಮಗಲ್ನೂರ್‌ಡ್ ಜಪ್ಪಾವೆರ್ ಪನ್ಪಿ ಸುದ್ದಿ ತಿರ್ಗೊಂದುಂಡು.
ತುಳುನಾಡ್‌ಡ್ ಪಾಕ ಜನಸಂಖ್ಯೆ ಇಪ್ಪುನ ಬಿಲ್ಲವ ಸಮುದಾಯೊಗು ಮಣೆ ಪಾಡುನು ಅಂಚೆನೇ ಒಡಿಪುಡು ಅಲ್ಪದಕುಲೆಗೇ ಅವಕಾಶ ಕೊರ್ಪುನ ದಿಸೆಟ್ ಕೋಟದಾರೆನ ಪುದರ್ ಕೇಂದ್ ಬರೊಂದುಂಡು ಪಂದ್ ಪನೊಂದುಲ್ಲೆರ್.