Last updated on March 18th, 2024 at 08:35 pm
ಕುಡ್ಲ: ಗೋವಾರ್ದ್ ಕುಡ್ಲ ಬೊಕ್ಕ ಕೇರಳೊಗು ಅಕ್ರಮವಾದ್ ಕೊಕೇನ್ ಕೊನೊವೊಂದಿತ್ತಿನ ಇರ್ವೆರೆನ್ ಸಿಸಿಬಿ ಪೊಲೀಸೆರ್ ಸೋಮವಾರ ಕೈದ್ ಮಲ್ದೆರ್.
ಆರೋಪಿಲು ಸದಕತ್ ಯು ಅಲಿಯಾಸ್ ಶಾನ್ ನವಾಜ್ (31) ಬೊಕ್ಕ ಮೊಹಮ್ಮದ್ ಅಶ್ಫಾಕ್ ಅಲಿಯಾಸ್ ಅಶ್ಪಾ (25) ಪನ್ಪಿನಕುಲು. ಇರ್ವೆರೆನ್ಲಾ ಉಳ್ಳಾಲೊದ ಅಂಬ್ಲಮೊಗೇರ್ ಗ್ರಾಮೊದ ಎಲಿಯಾರ್‌ಪದವುದಲ್ಪ ಕೈದ್ ಮಲ್ದ ಪಂದ್ ಪೊಲೀಸೆರ್ ತೆರಿಪಾದೆರ್.
ಕೊಕೇನ್ ಅಕ್ರಮ ಮಾರಾಟ ಬೊಕ್ಕ ಕೊನೊಪುನ ಬಗೆಟ್ ಪತ್ತ ಒಲವುನು ಆಧರಿತ್‌ದ್ ನಡತಿನ ಕಾರ್ಯಾಚರಣೆಡ್ ಆರೋಪಿಲೆನ ಕೈರ್ದ್ 2,72,00,000 ರೂ. ಮೌಲ್ಯೊದ 35 ಗ್ರಾಂ ಕೊಕೇನ್, ಸ್ಕೂಟರ್, ಮೂಜಿ ಮೊಬೈಲ್ ಫೋನ್, ಡಿಜಿಟಲ್ ಸ್ಕೇಲ್, 5,560 ರೂ. ಕಾಸ್‌ನ್ ವಶೊಕು ಗೆತೊಂದೆರ್. ಕೈದಾತಿನಕುಲು ಕೊಕೇನ್ ಸಂಗ್ರಹಣೆ ಬೊಕ್ಕ ಪಟ್ಟುನ ಮಲ್ಲ ಜಾಲೊದಕುಲು ಆದಿತ್ತೆರ್. ಗೋವಾರ್ದ್ ಕೊಕೇನ್ ಕನತ್‌ದ್ ಕರ್ನಾಟಕ ಬೊಕ್ಕ ಕೇರಳಡ್ ಅಕ್ರಮ ಲಾಭಡ್ ಮಾರೊಂದಿತ್ತೆರ್. ಸದಕತ್ ಯು ನ ಮಿತ್ತ್ ಉಂದೆಕ್ ದುಂಬು ಕೊಣಾಜೆ ಪೊಲೀಸ್ ಸ್ಟೇಶನ್‌ಡ್ ಮಾದಕ ದ್ರವ್ಯ ಸಾಗಾಟ ಬೊಕ್ಕ ಹಲ್ಲೆ ಪ್ರಕರಣ ದಾಖಲಾತ್ಂಡ್ ಪಂದ್ ಸಿಸಿಬಿ ಪೊಲೀಸೆರ್ ತೆರಿಪಾದೆರ್.