Last updated on March 26th, 2024 at 10:22 am
ಸುಳ್ಯ/ಪುತ್ತೂರು: ಮಾರ್ಕೆಟ್‌ಡ್ ಪಜ್ಜಿ ಕೊಕ್ಕೋದ ರೇಟ್ ಭಾರೀ ಪ್ರಮಾಣೊಡ್ ಏರ್ತೆಲ್ ತೂವೊಂದಿತ್ತ್‌ದ್, ಇತ್ತೆ ಒಂಜಿ ಕೆ.ಜಿ.ಗೆ ₹200 ಗಡು ಕಡತ್‌ದ್ಂಡ್. ಉ್ಂದು ಇದಮುಟ್ಟದ ಸಾರ್ವಕಾಲಿಕ ದಾಖಲೆ ರೇಟ್. ಉ್ಂದೆಕ್ ದುಂಬು ಪ್ರತೀ ಕೆ.ಜಿ.ಗ್ 125 ರೂ. ರ್ದ್ ಮಿತ್ತ್ ಪೋದಿಜ್ಜಂಡ್.
ಉ್ಂದೆತ ಒಟ್ಟುಗು ಉ್‌ನ್ಗೆಲ್ ಕೊಕ್ಕೊದ ರೇಟ್‌ಲಾ ಮಿತ್ತ್ ಪೋದಿತ್ತ್‌ದ್, ಬುಲೆತಿನಕಲೆಗ್ ಬಾರೀ ಕುಸಿ ಕನದ್ಂಡ್. ಪಜ್ಜಿ ಕೊಕ್ಕೋ ರೇಟ್ ಕೆ.ಜಿ.ಗ್ ಬಜೀ ಕಮ್ಮಿ ಪಂಡ್ 75 ರೂ. ಮುಟ್ಟ ಇತ್ತ್ಂಡ್. ಅವೆರ್ದ್ ದುಂಬು ಕೆ.ಜಿ.ಗೆ 30 ರೂ. ಮುಟ್ಟ ಜತ್ತ್‌ದ್ ಬುಲೆತಿನಕಲೆನ ಕೈ ಕರೆಂಚಾದಿತ್ತ್ಂಡ್. ರೈತೆರ್ ಕೊಕ್ಕೋ ಬುಲೆತ ನಿರ್ವಹಣೆಗ್ ಬೋಡಾಯಿನಾತ್ ಕರ್ಚಿ ಮಲ್ತೊಂದಿತ್ತ್ಂಡಲಾ ಎಡ್ಡೆ ರೇಟ್ ತಿಕ್ಕೊಂದಿತ್ತಿಜಿ. ಆಂಡ ಪರಿಸ್ಥಿತಿ ಇತ್ತೆ ಪಗದ್ಂಡ್. ಕ್ಯಾಂಪ್ಕೋ ಮಾರ್ಕೆಟ್‌ಡ್ ಮಾ. 25ತಾನಿ ಪಜ್ಜಿ ಕೊಕ್ಕೊ ಕೆ.ಜಿ.ಗ್ 205ಕ್ ಗೆತೊಂದೆರ್. ಪಂಜ ಮಾರ್ಕೆಟ್‌ಡ್ 210 ರೂ.ಗ್ ಗೆತೊಂದೆರ್. ಉ್‌ನ್ಗೆಲ್ ಕೊಕ್ಕೊಗ್ ರಡ್ಡ್ ದಿನೊಕು ದುಂಬು ಇತ್ತಿನ ರೇಟ್ ತೂಂಡ ಕೆ.ಜಿ.ಗ್ 75 ರೂ.ದಾತ್ ಏರ್ತೆಲ್ ಆತ್ಂಡ್. ಅತ್ತಂದೆ ನನಲಾತ್ ಎಚ್ಚ ಆಪಿನ ಸೂಚನೆನ್ಲಾ ಮಾರ್ಕೆಟ್ ಕೊರ್ತುಂಡು.
ಪರದೇಸೊಲೆಡ್ ಕೊಕ್ಕೊ ಉತ್ಪಾದನೆ ಬೊಕ್ಕ ಇನ್ವೆಂಟರಿ ಭಾರೀ ಪ್ರಮಾಣೊಡು ಕಮ್ಮಿ ಆತಿನವು, ದೇಶೀಯವಾದ್ಲಾ ಕೊಕ್ಕೊ ಉತ್ಪಾದನೆಡ್ ಕುಂದೆಲ್ ಆತಿನೆರ್ದಾವರ ಮಾರ್ಕೆಟ್‌ಡ್ ಕೊಕ್ಕೊ ಕುಂದೆಲ್ ಆದ್, ಡಿಮಾಂಡ್ ಎಚ್ಚಾತ್ಂಡ್. ಡಿಮಾಂಡ್‌ಗ್ ತಕ್ಕ ಕೊಕ್ಕೊ ಸಪ್ಲೈ ದಾಂತಿನೆರ್ದಾವರ ರೇಟ್ ಏರ್ಪುನ ಅಸ್ತ್ರ ಪ್ರಯೋಗ ಮಲ್ದೆರ್.