ಸಿಕ್ಕಿಂ ರಾಜ್ಯೊಡು ಭುಜೆಲ್ ಬಾಸೆ ಅಧಿಕೃತ ಬಾಸೆ ಆದ್ ಘೋಷಣೆ : ಕರ್ನಾಟಕೊರ್ದು ತುಳುಕು ಚೊಂಬು

Last updated on August 26th, 2022 at 08:52 am

ಸಿಕ್ಕಿಂ ರಾಜ್ಯೊದ ಮುಖ್ಯಮಂತ್ರಿ ಆಯಿನ ಪಿ ಎಸ್ ತಮಂಗ್ ಮೇರ್ ಸಿಕ್ಕಿಂ ಅಧಿಕೃತ ಬಾಸೆಲೆನ ಬಿಲ್ ಗ್ ತಿದ್ದುಪಡಿ ಕನತ್ದ್ ತನ್ನ ರಾಜ್ಯೊದ ಭುಜೆಲ್ ಬಾಸೆಗ್ ಅಧಿಕೃತ ಸ್ಥಾನಮಾನ ಕೊರಿಯೆರ್. ಉಂದು ತನ್ನ ರಾಜ್ಯೊಡು ಇತ್ತಿನ ಎಲ್ಯ ಎಲ್ಯ ಬಾಸೆಲೆನ್ ಬುಲೆಪಾವರೆ ಒಂಜಿ ರಾಜ್ಯ ಮಲ್ಪೊಡಾಯಿನ ಕರ್ತವ್ಯ.

ಅವ್ವೇ ಕರ್ನಾಟಕೊಡು ಪತ್ತ್ ಪದಿರಾಡ್ ವರ್ಸೊರ್ದಿಂಚಿ ತುಳುವೆರ್, ಕೊಡವೆರ್ ತನ್ಕುಲೆನ ಬಾಸೆಗ್ ಅಧಿಕೃತ ಸ್ಥಾನಮಾನ ಕೊರ್ಲೆ ಪನ್ದ್ ಕೇಂಡಲ ಇತೋರ್ತು ಒವ್ವೇ ಸರಕಾರ ಆವಡ್ ಒವ್ವೇ ಮುಖ್ಯಮಂತ್ರಿ ಆವಡ್ ಉಂದೆಕ್ ಕೆಬಿ ಕೊರ್ತುಜೆರ್. ಭುಜೆಲ್ ಬಾಸೆ ಪಾತೆರುನಕುಲು ಉಪ್ಪುನು ಕಾಲಿ 22000 ಜನ, ಅವ್ವೇ ನಮ್ಮ ತುಳು ಅಪ್ಪೆ ಬಾಸೆ ಆದ್ ಉಪ್ಪುನಕುಲು 20 ಲಕ್ಷೊರ್ದುಲಾ ಹೆಚ್ಚ. ಎಂಕ್ಲೆಗ್ ಕನ್ನಡ ತುಳು ಒಂಜೇ ಪನ್ದ್ ಪನ್ಪಿನ ಮಲ್ಲ ಮಲ್ಲ ಮಂಡೆದಕುಲು ತುಳುಕು ಒವ್ವೇ ಮಾನಾದಿಗೆ ಕೊರಂದೆ ಕನ್ನಡೊನು ಮಾತ್ರ ಮೆರೆಪಾವುನ ಏತ್ ಸಮ? ಈತ್ ಸಮಯ ತುಳುವೆರೆನ್ ಮಂಗೆ ಕೋಲ ಕಟ್ಟಾವೊಂದು, 8ನೇ ಪರಿಚೇದೊಡು ಉಪ್ಪಂದೆ ತುಳುಕು ರಾಜ್ಯ ಬಾಸೆದ ಮಾನಾದಿಗೆ ಕೊರಿಯರೆ ಆಪುಜಿ ಪನ್ದ್ ನಮ್ಮ ಜನಕುಲೆಗ್ ಕರ್ನಾಟಕ ಸರಕಾರ ಸುಳ್ಳು ಪನೊಂದಿತ್ತ್ಂಡ್. ಅಂಚಿನ ಒವ್ವೇ ಅಡೆತಡೆ ಸಂವಿಧಾನೊಡು ಇಜ್ಜಿ ಉಂದು ಪೊಕ್ಕಡೆ ತುಳುವೆರೆನ್ ಮಂಗೆ ಮಲ್ಪರೆ ಪನೊಂದಿತ್ತಿನಿ. 

ರಾಜ್ಯಬಾಸೆನೇ ಬೇತೆ ಸಂವಿಧಾನೊದ 8ನೇ ಪರಿಚೇದನೇ ಬೇತೆ. ರಾಜ್ಯೊಲೆಗ್ ತನ್ಕುಲೆಗ್ ಬೋಡಾಯಿನ ಒವ್ವೇ ಬಾಸೆನ್ ರಾಜ್ಯಬಾಸೆ ಮಲ್ಪುನ ಪೂರ್ಣ ಸ್ವಾತಂತ್ರ್ಯ ಉಂಡು.

ನನ ತುಳುವೆರ್ ಲಕ್ಕೊಡು ವಾ ತಾಂತ್ರಿಕ ದೋಸಲಾ ಇಜ್ಜಿ ಕುಲೆತ ಉಪದ್ರಲಾ ಇಜ್ಜಿ. ಈ ರಾಜಕಾರಣಿಲೆನ ಸುಳ್ಳುಲೆನ್ ನಂಬೊಡ್ಚಿ. ನೇಪಾಳೊಡು ಪಾತೆರುನ ಬಾಸೆ ಭುಜೆಲ್ ನ್ ಸಿಕ್ಕಿಂಡ್ ರಾಜ್ಯಬಾಸೆ ಮಲ್ಪರೆ ಉಪ್ಪಂದಿನ ತಾಂತ್ರಿಕ ದೋಸ ತುಳುಕು ಎಂಚಿನವು? ಪ್ರಾಯಶಃ ತುಳುನು ಅಧಿಕೃತ ಮಲ್ಪರೆ ಕರ್ನಾಟಕದ ಕನ್ನಡ ಶಾಸಕೆರೆನ ವಿರೋಧ ಉಂಡು ತೋಜೊಡು!