ರಾಜಕೀಯದ ಕಲೊಟು ತರೆದೆರ್ತ್ ಮೆನ್ಕಿನ ತುಳುವೆರೆ ಸ್ವಾಭಿಮಾನದ ಕೊಡಿ

Last updated on April 8th, 2024 at 10:17 am

ತುಳುವೆರೆ ಕೇಪುಲ ರಂಗ್‌ದ ಕೊಡಿಕ್ ಏತೋ ಸಾರ ವರ್ಸದ ಪರತಿರಿ ಉಂಡು. ತುಳುವ ಪರಪೋಕುಡು ಕೇಪುಲ ಆವಡ್ ಸೂರ್ಯೆ ಚಂದ್ರೆರ್ ಆವಡ್ ಉಪ್ಪಂದೆ ಒವ್ಲಾ ನಡಪುಜಿ. ಅಂಚಿತ್ತಿ ತುಳುವ ಸ್ವಾಭಿಮಾನದ ಕೊಡಿ ಈ ಸಲ ರಾಜಕೀಯದ ಕಲೊಕುಲಾ ಜತ್ತ್ಂಡ್.

ಕಾಂಗ್ರೇಸ್ ಬೊಕ್ಕ ಬಿಜೆಪಿ ರಡ್ಡ್ ಪಕ್ಷದ ಪುದರೋಲೆ ಸಂದೈತ ಮಲ್ಪುನಗ ಪೊರ್ತುಡು ನಡತಿನ ಮೆರವಣಿಗೆಡ್ ತುಳುವ ಕೊಡಿ ದೆರ್ತ್ ತೋಜುಲೆಕ್ಕ ರಾವೊಂದಿತ್ತಿನ ತೋಜಿದ್ ಬತ್ತ್ಂಡ್. ಉಂದು ತುಳುತ ಮಟ್ಟ್‌ಗ್ ಒಂಜಿ ಮಲ್ಲ ಬುಲೆಚ್ಚಿಲ್. ತುಳುವೆರೆ ಅಸ್ಥಿತ್ವ ಒರಿಯೊಡಾಂಡ ತುಳು ರಾಜಕೀಯೊಡ್ಲಾ ಬರೊಡು, ತುಳುಕು ಬೋಡಾಪಿನ ಸಾಂವಿಧಾನಿಕ ಮಾನಾದಿಗೆಗ್ ಉಂದು ಒಂಜಿ ಮಲ್ಲ ಮೈಲಿಗಲ್ಲ್ ಆವು.

ತುಳು ಬಾಸೆನ್ 8ನೇ ಪರಿಚ್ಛೇದೊಗು ಗೋಡ್ಯಾವೊಡು ಪನ್ದ್ 1971ನೇ ಇಸವಿರ್ದ್ ತುಳುವೆರ್ ಪೊರುಂಬೊಂದುಲ್ಲೆರ್. ಕರಿನ 53 ವರ್ಸೊರ್ದು ಈ ಬೇಡಿಕೆನ್ ಲೆಕ್ಕೊಗು ದೆತೊನಂದಿನ ರಾಜಕೀಯ ಪಕ್ಷೊಲು ಈ ಸಲ ತುಳು ಅಸ್ಮಿತೆನ್ಲಾ ತನ್ಕುಲೆನ ದಾಳತ ಒಂಜಿ ಕೈದ್ ಆದ್ ಗಲಸೊಂದಿಪ್ಪುನವು ಪಡೀರ್ ಕಂಡೊದು ನೀರ್‌ದ ಒಸರ್ ಜತ್ತಿಲೆಕ್ಕ ತೋಜುಂಡು. ಮಸ್ತ್ ತುಳುವ ಜವನೆರ್ ತುಳುತ ಪೊರುಂಬಾಟೊಗು ಜತ್ತಿನವು ಈ ಬುಲೆಚ್ಚಿಲ್‌ಗ್ ನೆವನ ಆದುಂಡು. ಜಾತಿ ಧರ್ಮ ಸಾರ ಎತ್ವಾಸೊಲೆನ ನಡುಟುಲಾ ತುಳುವೆರೆನ್ ಇನಿ ಒಂಜಿ ಮಲ್ಪುನ ಸತು ಉಪ್ಪುನು ತುಳು ಬಾಸೆಗ್ ಮಾತ್ರ.