Last updated on April 17th, 2024 at 07:52 pm
ಪುತ್ತೂರ್: ತೆಂಕುತಿಟ್ಟ್‌ದ ಪುಗರ್ತೆದ ಶ್ರೀ ಗೆಜ್ಜೆಗಿರಿ ಮೇಳ ಮಸ್ಕತ್‌ ಬೊಕ್ಕ ದುಬಾೖಡ್ ಅಪ್ಪೆ ದೇಯಿ ಬೈದೇತಿ ಬೊಕ್ಕ ಜುಮಾದಿನ ಕತೆತ ಆಟ ಗೊಬ್ಬೆರೆ ಇತ್ತ್‌ದ್, ಪೂರ್ಣ ಪ್ರಮಾಣೊಡು ಒಂಜಿ ಮೇಳ ಪಿದಯಿ ದೇಸೊಡು ಗೊಬ್ಬೊಂದುಪ್ಪುನ ಯಕ್ಷರಂಗೊದ ಪರತಿರಿಟೆ ಸುರು ಪಂದ್ ಮೇಳದ ವ್ಯವಸ್ಥಾಪಕೆ ಪ್ರಶಾಂತ್‌ ಪೂಜಾರಿ ತೆರಿಪಾದೆರ್.
ಒಮಾನ್‌ ಬಿಲ್ಲವಾಸ್‌ ಕೂಟೊದ ಕಡೆರ್ದ್ ಮಸ್ಕತ್‌‌ದ ರೂವಿ ಅಲ್‌ ಫಲಾಜ್‌ ಹೊಟೇಲ್‌ ಗ್ರ್ಯಾಂಡ್‌ ಸಭಾಂಗಣೊಡು ಎ. 19ರದಾನಿ ಮದ್ಯಾನ 3.15 ರ್ದ್ ಗೆಜ್ಜೆಗಿರಿ ಕ್ಷೇತ್ರೊದ ಸ್ಥಳ ಪುರಾಣೊದ ಆಧಾರೊದ ನಿತಿನ್‌ ತೆಂಕಕಾರಂದೂರು ಬರೆತಿನ, ಯೋಗೀಶ್‌ ಕುಮಾರ್ ಚಿಗುರುಪಾದೆ ಪದ್ಯ ಬರೆತಿನ 225ನೇ ಪ್ರಯೋಗದ ಪ್ರದರ್ಶನ ನಡಪರೆಗುಂಡು.
ಎ. 20 ದಾನಿ ಬಿಲ್ಲವ ಫ್ಯಾಮಿಲಿ ದುಬಾೖ ಕೂಟದ ಕಡೆರ್ದ್ ಬರ್‌ ದುಬಾೖದ ಜದಫ್‌ ಸ್ವಿಸ್‌ ಇಂಟರ್‌ ನ್ಯಾಶನಲ್‌ ಸೈಂಟಿಫಿಕ್‌ ಸ್ಕೂಲ್‌ದ ಹಾಲ್‌ಡ್ ಬಯ್ಯ 5ರ್ದ್ 226ನೇ ಪ್ರಯೋಗದ ಯಕ್ಷಗಾನ ಪ್ರದರ್ಶನ ಆವರೆಗುಂಡು.
ಪರಿಪೂರ್ಣ ತಂಡ ಪಂಡ ದಾದ?
ನೆಕ್ಕ್ ದುಂಬೇ ಪಿದಯಿ ದೇಸೊಡು ಪಾಕ ಯಕ್ಷಗಾನ ಪ್ರದರ್ಶನೊಲು ಆದಿತ್ತ್ಂಡಲಾ ಅವು ಬೇತೆ ಬೇತೆ ಮೇಳೊಲೆರ್ದ್ ಪೆಜ್ಜಿನ ಕಲಾವಿದೆರ್ ಒಟ್ಟುಸೇರ್ದ್ ಕೊರ್ತಿನ ಪ್ರದರ್ಶನ. ಆಂಡ ಒಂಜಿ ಮೇಳ ಪೂರ್ಣ ಪ್ರಮಾಣೊಡು ಇನಿಮುಟ್ಟ ಪಿದಯಿ ದೇಸೊಡು ಆಟ ಗೊಬ್ಬುದಿಜಿ. ಗೆಜ್ಜೆಗಿರಿ ಕ್ಷೇತ್ರಾಡಳಿತ ಸಮಿತಿ ಅಧ್ಯಕ್ಷೆ ಪೀತಾಂಬರ ಪೆರಾಜೆ ಮಾರ್ಗದರ್ಶನೊಡು ಮೇಳ ಸುರೂತ ಸರ್ತಿ ಪನ್ಪಿನಂಚ ಪೂರ್ಣ ಕೂಟ ಆದ್ ಪೋವೊಂದುಂಡು. ಊರ್‌ಡ್ ಆಟ ಆಪಿಲೆಕನೇ ಪಿದಯಿ ದೇಸೊದ ನೆಲಟ್ಲಾ ತ್ರಿಕಾಲಪೂಜೆ, ಚೌಕಿ ಪೂಜೆದ ಒಟ್ಟುಗು ರಂಗಸ್ಥಳ ಉಂಡು ಮಲ್ತ್‌ದ್ ಯಕ್ಷಗಾನ ಪ್ರದರ್ಶನ ಆವರೆಗುಂಡು. ಗಿರೀಶ್‌ ರೈ ಕಕ್ಕೆಪದವು ಬೊಕ್ಕ ನಿರಂಜನ ಪೂಜಾರಿ ಬಡಗಬೆಳ್ಳೂರು ಮೊಕಲ್ನ ಭಾಗವತಿಗೆ ಇಪ್ಪುಂಡು ಪಂದ್ ಪ್ರಶಾಂತ್‌ ಪೂಜಾರಿ ತೆರಿಪಾಯೆರ್.