Last updated on April 19th, 2024 at 07:49 am
ದೆಲ್ಲಿ: ಇನಿ (ಏ.19) 2024ತ ಲೋಕಸಭಾ ಎಲೆಕ್ಷನ್‌ದ ಸುರುತ ಸುತ್ತುದ ಓಟು ನಡಪರೆಗುಂಡು.
21 ರಾಜ್ಯೊಲು ಬೊಕ್ಕ ಕೇಂದ್ರಾಡಳಿತ ಪ್ರದೇಶೊಲೆನ 102 ಕ್ಷೇತ್ರೊಲೆಗ್ ಶುಕ್ರವಾರ ಓಟು ನಡಪರೆಗುಂಡು.
ತಮಿಳ್‌ನಾಡ್‌ದ ಮಾತಾ 39 ಸ್ಥಾನೊಲು, ಉತ್ತರಾಖಂಡೊದ ಮಾತಾ ಐನ್ ಸ್ಥಾನೊಲು, ಅರುಣಾಚಲ ಪ್ರದೇಶ, ಮಣಿಪುರ ಬೊಕ್ಕ ಮೇಘಾಲಯೊದ ರಡ್ಡ್ ಸ್ಥಾನೊಲು ಬೊಕ್ಕ ಮಿಜೋರಾಂ, ನಾಗಾಲ್ಯಾಂಡ್ ಅಂಚನೇ ಸಿಕ್ಕಿಂದ ಒಂಜೊಂಜಿ ಸ್ಥಾನೊಲೆಗ್ ಸುರುತ ಸುತ್ತುಡು ಓಟು ನಡಪುಂಡು.
ರಾಜಸ್ಥಾನೊದ 25 ಡ್ 12, ಉತ್ತರ ಪ್ರದೇಶೊದ 80 ಡ್ 8, ಮಧ್ಯಪ್ರದೇಶೊದ 29 ಡ್ 6, ಮಹಾರಾಷ್ಟ್ರೊದ 48 ಡ್ 5, ಅಸ್ಸಾಂನ 14 ಡ್ 5 ಬೊಕ್ಕ ಬಿಹಾರೊದ 40 ಸ್ಥಾನೊಲೆಡ್ 4 ಸ್ಥಾನೊಲೆಗ್ ಓಟು ನಡಪುಂಡು.
ಪಡ್ಡಾಯಿ ಬಂಗಾಳೊದ 42 ಸ್ಥಾನೊಲೆಡ್ 3, ಛತ್ತೀಸ್‌ಗಢೊದ 11 ಸ್ಥಾನೊಲೆಡ್ ಒಂಜಿ ಬೊಕ್ಕ ತ್ರಿಪುರಾದ ರಡ್ಡ್ ಸ್ಥಾನೊಲೆಡ್ ಒಂಜೆಕ್ ಓಟು ನಡಪುಂಡು.
ಕೇಂದ್ರಾಡಳಿತ ಪ್ರದೇಶೊಲೆಡ್, ಜಮ್ಮು ಬೊಕ್ಕ ಕಾಶ್ಮೀರೊಡು ಐನೆಟ್ ಒಂಜಿ ಸ್ಥಾನ, ಅಂಚೆನೇ ಅಂಡಮಾನ್ ಬೊಕ್ಕ ನಿಕೋಬಾರ್ ಕುದುರುಲು, ಲಕ್ಷದ್ವೀಪ ಬೊಕ್ಕ ಪುದುಚೇರಿಡುಪ್ಪುನ ಒಂಜೊಂಜಿ ಸ್ಥಾನೊಲೆಗ್ ಓಟು ನಡಪುಂಡು.
ಅರುಣಾಚಲ ಪ್ರದೇಶ ಬೊಕ್ಕ ಸಿಕ್ಕಿಂ ರಾಜ್ಯೊಲೆನ ಒಟ್ಟು 92 ವಿಧಾನಸಭಾ ಸ್ಥಾನೊಲೆಗ್ ಓಟು ನಡಪುಂಡು.
543 ಲೋಕಸಭಾ ಸ್ಥಾನೊಲೆಗ್ ಏಪ್ರಿಲ್ 19 ರಿಂದ ಜೂನ್ 1 ತ ಉಲಯಿ ಏಳ್ ಸುತ್ತುಡ್ ಓಟು ನಡಪೆರೆ ಇತ್ತ್‌ದ್, ಜೂನ್ 4 ತಾನಿ ಓಟು ಗೆನ್ಪು ನಡಪುಂಡು.
ನಾಗ್ಪುರರ್ದ್ ನಿತಿನ್ ಗಡ್ಕರಿ, ಅರುಣಾಚಲ ಪ್ರದೇಶೊರ್ದ್ (ಪಡ್ಡಾಯಿ) ಕಿರಣ್ ರಿಜಿಜು, ಬಿಕಾನೇರ್‌ರ್ದ್ ಅರ್ಜುನ್ ರಾಮ್ ಮೇಘವಾಲ್, ಅಸ್ಸಾಂದ ದಿಬ್ರುಗಢೊರ್ದ್ ಸರ್ಬನಾದಾ ಸೋನೋವಾಲ್, ಪಡ್ಡಾಯಿ ಯುಪಿದ ಮುಜಾಫರ್‌ನಗರೊರ್ದು ಸಂಜೀವ್ ಬಲಿಯಾನ್ ಸುರುತ ಸುತ್ತುದ ಓಟುಡು ತನ್ಕುಲೆ ಅದೃಷ್ಟೊನು ಪರೀಕ್ಷೆಗ್ ಒಡ್ಡೊಂದುಲ್ಲೆರ್.
ಸಕ್ರಿಯ ರಾಜಕೀಯೊಗು ಪಿರ ಬರ್ಯೆರೆ ತೆಲಂಗಾಣೊದ ಗವರ್ನರ್ ಬೊಕ್ಕ ಪುದುಚೇರಿದ ಲೆಫ್ಟಿನೆಂಟ್ ಗವರ್ನರ್ ಪೋಸ್ಟ್‌ಗ್ ಇಂಚಿಪ್ಪೊಗು ರಾಜೀನಾಮೆ ಕೊರ್ತಿನ ತಮಿಳಿಸೈ ಸೌಂದರರಾಜನ್ ಮೇರ್ ಚೆನ್ನೈ ದಕ್ಷಿಣ ಲೋಕಸಭಾ ಕ್ಷೇತ್ರೊರ್ದ್ ಸ್ಪರ್ಧೆ ಮಲ್ತೊಂದುಲ್ಲೆರ್.
ಕಾಂಗ್ರೆಸ್ ನಾಯಕೆ ಅಂಚೆನೇ ಮಧ್ಯಪ್ರದೇಶೊದ ದುಂಬುದ ಮುಖ್ಯಮಂತ್ರಿ ಕಮಲ್‌ನಾಥ್ ಮೆರೆನ ಮಗೆ ನಕುಲ್ ನಾಥ್ ಮೇರ್ ಛಿಂದ್ವಾರಾರ್ದ್ ಓಟುಗು ಉಂತುದೆರ್.