Last updated on May 2nd, 2024 at 03:55 pm
ಒಡಿಪು: ಯಕ್ಷಗಾನ ಕಲಾವಿದೆ ಒರಿ ಏಸ ಬಿಚ್ಚದ್, ರಂಗ್ ದೆತ್ತೊಂದುಪ್ಪುನಗ ಹಾರ್ಟ್ ಅಟ್ಯಾಕ್ ಆದ್ ಚೌಕಿಡೇ ತೀರ್ದಿನ ನಡಕೆ ಒಡಿಪು ಜಿಲ್ಲೆದ ಕೋಟ ಗಾಂಧಿ ಮೈದಾನೊಡು ನಡತ್‌ದ್ಂಡ್. ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಕೃಪಾಪೋಷಿತ ಯಕ್ಷಗಾನ ಮಂಡಳಿದ ಕಲಾವಿದೆ ಗಂಗಾಧರ ಪುತ್ತೂರ್ ಹೃದಯಾಘಾತೊರ್ದಾವರ ತೀರ್ದೆರ್. ಆರೆಗ್ 59 ವರ್ಸ ಪ್ರಾಯ ಆದಿತ್ತ್ಂಡ್. ಕೋಟ ಗಾಂಧಿ ಮೈದಾನೊಡು ಧರ್ಮಸ್ಥಳ ಕ್ಷೇತ್ರ ಮಹಾತ್ಮೆದ ಕುಕ್ಕಿತ್ತಾಯನ ಏಸ ಗೊಬ್ಬುದು, ಚೌಕಿಗ್ ಪಿರ ಬತ್ತ್‌ದ್ ಕಿರೀಟ ಪದ್ದೈಲೆನ್ ದೆತ್ತ್‌ದ್ ಬರಿಕ್ ದೀದ್, ಮೋನೆದ ರಂಗ್ ದೆತ್ತೊಂದಿತ್ತಿಲೆಕ, ರಾತ್ರೆ ಅಂದಾಜಿ 12.25ಕ್ ಚೌಕಿಡ್ ಮಂಗಳ ಆಪಿನ ಪೊರ್ತುಡು ಗಾತಿದ ಹೃದಯಾಘಾತೊರ್ದಾವರ ತೀರ್ದೆರ್.
ಪುತ್ತೂರ್ ತಾಲೂಕ್ ಕೋಡಿಂಬಾಡಿ ಮುಟ್ಟದ ಸೇಡಿಯಾಪುಡ್ ಪುಟ್ಟಿನ ಮೇರ್, ಏಳನೇ ಕ್ಲಾಸ್ ಮುಟ್ಟ ಓದ್‌ದ್ ಬೊಕ್ಕ ಕುಂಬಳೆ ಶ್ರೀಧರ ರಾಯೆರೆ ಮಾರ್ಗದರ್ಶನೊಡು ಶ್ರೀ ಧರ್ಮಸ್ಥಳ ಯಕ್ಷಗಾನ ಕಲಿಕಾ ಕೇಂದ್ರೊಗು ಸೇರ್ಯೆರ್. ಅಲ್ಪ ಪೆರಿಯೆರಾಯಿನ ಗೋವಿಂದ ಭಟ್ ಬೊಕ್ಕ ಕರ್ಗಲ್ಲ್ ವಿಶ್ವೇಶ್ವರ ಭಟ್ರೆರ್ದ್ ಪಜ್ಜೆ ಪಾಡುನೆನ್ ಕಲ್ತ್‌ದ್, ಶ್ರೀ ಧರ್ಮಸ್ಥಳ ಮೇಳೊಗು ಬಾಲಕಲಾವಿದೆ ಆದ್ ಸೇರ್ಯೆರ್. ಮೆಲ್ಲ ಮೆಲ್ಲನೆ ಬುಲೆದ್ ಬತ್ತಿನ ಆರ್, ಶ್ರೀ ಧರ್ಮಸ್ಥಳ ಕ್ಷೇತ್ರ ಮಹಾತ್ಮ್ಯೆದ ಮಾಲತಿ ಪಾತ್ರೊದ ಒಟ್ಟುಗು, ಕಸೆ ಸ್ತ್ರೀವೇಷ, ಗರತಿ ವೇಷೊಲು, ಶೃಂಗಾರ ವೇಷೊಲೆಡ್ ರೈಸ್‌ದ್ ಮಲ್ಲ ಮಲ್ಲ ಕಲಾವಿದೆರೆ ಒಟ್ಟುಗು ಪಜ್ಜೆ ಪಾಡ್ದೆರ್. ಕರ್ಗಲ್ಲ್ ಯಕ್ಷರೂಪಕ ಕೂಟೊಡು ಒಂಜಿ ವರ್ಸ, ಮುಳಿಯಾಲ ಭೀಮ ಭಟ್ರೆನ ಕೂಟೊಡು 10 ವರ್ಸ, 26 ವರ್ಸ ನಿಡ್ಲೆ ಮಹಾಗಣಪತಿ ಯಕ್ಷಗಾನ ಮಂಡಳಿದ ಮರಿಯಾಲೊದ ಕಾರ್ಯಕ್ರಮೊಲೆಡ್ ಗಂಗಾಧರೆರ್ ಪಾಲ್‌ಪಡೆದಿತ್ತೆರ್.