ತೆಕ್ಕ್ಂಡೊಂಜಿ ತುಳುವ ತುಡರ್: ಜಾನಪದ ವಿದ್ವಾಂಸೆ, ತುಳು ಸಾಹಿತ್ಯ ಅಕಾಡೆಮಿದ ದುಂಬುದ ಗುರ್ಕಾರೆ ಡಾ|ಪಾಲ್ತಾಡಿ ರಾಮಕೃಷ್ಣ ಆಚಾ‌ರ್ ತೀರ್ಯೆರ್

Last updated on May 7th, 2024 at 11:00 pm

ಪುತ್ತೂರು: ಪೆರಿಯ ಜಾನಪದ ವಿದ್ವಾಂಸೆ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ದುಂಬುದ ಗುರ್ಕಾರ್ರ್ ಆದಿತ್ತಿನ,  ನಿವೃತ್ತ ಉಪನ್ಯಾಸಕೆ ಡಾ|ಪಾಲ್ತಾಡಿ ರಾಮಕೃಷ್ಣ ಆಚಾ‌ರ್ ಮೇರ್ ತೀರ್ಯೆರ್. ಮೆರೆಗ್ 79 ವರ್ಸ ಪ್ರಾಯ ಆದಿತ್ತ್ಂಡ್.

ಪೆರುವಾಜೆಡ್ ಮಗಲ್ನ ಇಲ್ಲಡಿತ್ತಿನ ಮೆರೆನ ಆರೋಗ್ಯಡ್  ಎಚ್ಚಿಕಮ್ಮಿ ಆಯಿನೆರ್ದಾವರ ಮೇ 7 (ಇನಿ) ಬಯ್ಯಡ್ ಪುತ್ತೂರು ಮಹಾವೀರ ಆಸ್ಪತ್ರೆಗ್ ಲೆತೊಂದು ಬರ್ಪಿನ ಸಾದಿಡೇ ತೀರ್ದೆರ್.

ಮೇರ್ ಬೊಡೆದಿ ಸುಮಾ ಆರ್.ಆಚಾರ್, ಬೆದ್ರ ಆಳ್ವಾಸ್ ಕಾಲೇಜಿಡ್ ಅಸಿಸ್ಟೆಂಟ್ ಪ್ರೊಫೆಸ್ಸರ್ ಆದುಪ್ಪುನ ಮಗೆ ಹರ್ಷವರ್ಧನ್, ಮಗಲರ್ಲಾಯಿನ ಕಿರಣ ಪಿ.ಆರ್., ಬೆಳ್ಳಾರೆ ಡಾ| ಶಿವರಾಮ ಕಾರಂತ ಪ.ಪೂ.ಕಾಲೇಜಿಡ್ ಉಪನ್ಯಾಸಕೆದಿಯಾದುಪ್ಪುನ ಸುಪ್ರಿಯಾ ಪಿ.ಆ‌ರ್, ಮರ್ಮಲ್ ಸುಧಾ, ಮರ್ಮಯೆರ್ ಕೃಷ್ಣ ಎಂ.ಬಿ., ಜಯಪಾಲ ಹೆಚ್.ಎನ್. ಮೊಕಲೆನ್ ಅಗತ್‌ದೆರ್. ಡಾ| ಪಾಲ್ತಾಡಿಯೆರೆನ ಪಾರ್ಥಿವ ಶರೀರೊನು ಪುತ್ತೂರು ಸಿಟಿ ಆಸ್ಪತ್ರೆಡ್ ದೀದಿತ್ತ್‌ದ್ ಮೇ 8 ತಾನಿ ಅಂತ್ಯ ಕ್ರಿಯೆ ನಡಪರೆಗುಂಡು.

ಮೇರ್ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರೆ ಆದುಪ್ಪುನ ಪೊರ್ತುಡು ಅಕಾಡೆಮಿರ್ದ್ ಪಾಕ ತುಳುಪರ ಬೇಲೆಲು ನಡತ್‌ದ.

ತೆಕ್ಕ್‌ದ್ ಪೋಯಿ ಈ ಮಲ್ಲ ಚೇತನೊಗು ಸದ್ಗತಿ ತಿಕ್ಕಡ್ ಪಂದ್ ನಟ್ಟೊನುಗ.