Last updated on August 14th, 2022 at 03:01 pm
ಇಡೀ ತುಳುನಾಡೇ ತಿರ್ಗ್’ದ್ ತೂತಿನ ಮರ್ಡರ್ ಕೇಸ್’ದ ಆರೋಪಿ ಈ ವಾಮಂಜೂರು ಪ್ರವೀಣೆ. ಅವು ಅಪ್ಪಿ ಶೇರಿಗಾರ್ತಿನ ಇಲ್ಲಗ್ ಕಾಂಡೆ ಪೇರ್ ಪಾಡರೆ ಪೋಪಿನ ಪೊಣ್ಣುಮಗಲ್ ಎದುರ್ದ ಬಾಕಿಲ್’ಗ್ ಚಿಲ್ಕ ಪಾರ್ದಿನೆರ್ದ್ ಕುರು ಬಾಕಿಲ್’ರ್ದ್ ಉಲಯಿ ಪೋನಗ ಬಾಲೆಗ್ ಅಪ್ಪಿ ಶೇರಿಗಾರ್ತಿನ ಪುನ ತೋಜಿಂಡ್ ಪೋಡಿದ್ ಬಲ್ತೊಂದು ಪೋಯಿನ ಬಾಲೆ, ಅಮ್ಮೆರ್ಡ್ ಪನ್ಪುಂಡು ಊರುದಕುಲು ಬತ್ತ್ ತೂನಗ ಅಲ್ಪ ಅಪ್ಪಿ ಶೇರಿಗಾರ್ತಿನೊಟ್ಟುಗು ಇಲ್ಲಡ್ ಇತ್ತಿನ ಅರೆನ ಮಗೆ ಮಗಲ್ ಅಂಚನೇ ಅರೆನ ಪುಲ್ಲಿನಲ ಪುನ ನೆತ್ತೆರ್ದ ನಡುಟ್ಟು ಇತ್ತ್ಂಡ್. ಪೋಲಿಸ್ ದಕ್ಲೆಗ್ ಉಂದೊಜಿ ದರೋಡೆದ ಲೆಕ್ಕ ತೋಜಿಂಡ್ ದಾಯೆ ಪಂಡ ಕುರು ಬಾಕಿಲ್ದ ಚಿಲ್ಕ ಪುಡದಿತ್ತ್ಂಡ್ ಬಂಗಾರ್, ಪನವು ಕಲ್ವೆಯಾದಿತ್ತ್ಂಡ್.
ಪೊಲೀಸ್ ದಕುಲು ಕೆರಿನ ಜಾಗೆದಲ್ಪ ದಾಲ ಸಾಕ್ಷಿ ತಿಕ್ಕುಂಡ ಪಂದ್ ನಾಡ್ನಗ ಬೆಂದ್’ರ್ಡ್ ಪಲಾಯಿದ ತುಂಡು ತಿಕ್ಕುಂಡ್ ಅವೆಟ್ಟ್ ನೆತ್ತೆರ್ದ್ ಕಲೆಲಾ ಇಪ್ಪುಂಡು ಅಡೆಗ್ ನೆಟ್ಟ್ ಹಾಕ್ದ್ ಕೇರ್ತಿನಿ ಪಂದ್ ನಿಚ್ಚಯ ಆಂಡ್, ಚಾವಡಿಡ್ ಮಡ್ತ್’ದೀತಿನ ಹಾಸಿಗೆನ್ ಬುಡ್ಪಾನಗ ಅವೆಟ್ಟ್ ನೆತ್ತೆರ್ದ ಕಲೆ ತೋಜಿಂಡ್ ಆತೆ ಅತ್ತಾಂದೆ ಏರಾ ಜೆತ್ತ್ ಅಮಸರೊಡು ಮಡ್’ತ್ ದೀತಿನಲ್ಕ ಇತ್ತ್ಂಡ್, ಅವ್ವೆ ಪೊರ್ತುಡು ಬತ್ತಿನ ಅಪ್ಪಿ ಶೇರಿಗಾರ್ತಿನ ಪಲಯೆ “ಎನ್ನ ಮೆಗ್ದಿನ್ ಕೆರಿ ನಕ್ಲೆನ್ ಎಂಕುಲು ನಂಬಿನ ಸತ್ತೊಲು ಬುಡಯಾ ” ಪಂದ್ ಪೊಲೀಸ್ ದಕ್ಲೆಡ ಬುಲ್ತೆರ್, ನೆತ್ತ ಒಟ್ಟುಗು ಕುಡೊಂಜಿ ಪಾತೆರಲಾ ಪಂಡೆರ್ ” ಎನ್ನ ಮಗೆ ಕೋಡೆ ಮುಲ್ಪ ಬರ್ರೆಗಿತ್ತೆ ಪುಣ್ಯ ಬೈಜ್ಜೆ ಇಜ್ಜಿಂಡ ಆಯನ್ಲಾ ಕೆರ್ತುವೆರ್ ” ಪಂದ್. ಪೊಲೀಸ್ ನಕ್ಲೆಗ್ ಈತ್ ಯಾದಿತ್ತ್ಂಡ್ ಆರ್ನ ಮಗನ್ ಪೊಲೀಸ್ ಬಾಸೆಡೇ ವಿಚಾರಣೆ ಮಲ್ಪುನಗ ಮಲ್ತಿ ತಪ್ಪುನು ಪ್ರವೀಣೆ ಒತ್ತೊನುವೆ. ಆಯನ್ ಜೈಲ್ ಗ್ ಶಿಫ್ಟ್ ಮಲ್ತಿತ್ತೆರ್ ಒಂಜರೆ ಓಡುರ್ದ್ ಬೊಕ್ಕ ಕೋರ್ಟ್ ವಿಚಾರಣೆಗ್ಂದ್ ಕುಡ್ಲಗ್ ಬನ್ನಗ ತಪ್ಪಾದ್ ಬಲ್ಪುವೆ.
ತಪ್ಪಾದ್ ಪೋತಿನ ಪ್ರವೀಣೆ ಒಲ್ಲೆ ದಾದ ಮಲ್ತೊಂದುಲ್ಲೆ ಪಂದ್ ಏರೆಗ್ಲಾ ಗೊತ್ತಿತ್’ಜಿ. ಅವು ಅಪ್ಪಿ ಶೇರಿಗಾರ್ತಿ ತೀರ್ದಿನ ದಿನೊ, ಆನಿ ಪ್ರವೀಣನ ಪಟನ್ ಪೇಪರ್ಡ್ ಪಾಡಿಯೆರ್ ನಾರ್ದ್ ಕೊರಿನಕ್ಲೆಗ್ ಒಂಜಿ ಲಕ್ಷ ಪನವು ಕೋರ್ಪ ಪಂದ್ಲಾ ಪಂಡೆರ್. ಗೋವಾಡ್ ತಿಂಡಿ ತಿನ್ಯ ಒರಿಯಗ್ ತಿಂಡಿ ಕಟ್’ದ್ ಕೊರಿನ ಪೇಪರ್ಡ್ ಇತ್ತಿನ ಮೋನೆ ಒಲ್ಪನಾ ತೂತಿನಲ್ಕ ಆಪುಂಡು ಅಂದ್ ಅವು ಆಯನ ಊರುಡಿಪ್ಪುನಾಯನ ಪಟ,ಆಂಡ ಬರೆತಿನ ಬಾಸೆ ಓದರೆಗಾಪುಜಿ ಐಕ್ಕ್ ಬೇತೆ ಅಕ್ಲೆಡ ಓದಾನಗ ಇಸಯ ತೆರಿಯುಂಡು, ಪನವು ತಿಕ್ಕುಂಡು ಪಂದ್ ಆಯನ ಮಿತ್ತ ಇಲ್ಲಡ್ ಇಪ್ಪುನಾಯನ ಬಗ್ಗೆ ಕುಡ್ಲದ ಪೊಲೀಸ್ ನಕ್ಲೆಗ್ ತೆರಿಪಾವೆ. ಬತ್ತ್ ತೂಯಿನ ಪೊಲೀಸ್ ನಕ್ಲೆಗ್ ಸೋಜಿಗ ಆಂಡ್ ವಾಮಂಜೂರು ಪ್ರವೀಣೆಗ್ ಗೋವಾಡ್ ಕುಡೊಂಜಿ ಮದ್ಮೆಯಾದ್ ಒಂಜಿ ಬಾಲೆಲಾ ಇತ್ತ್ಂಡ್. ಅಲ್ಪರ್ದ್ ಅರೆಸ್ಟ್ ಮಲ್ತ್ ಕನತ್ ವಿಚಾರಣೆಯಾದ್ ಪ್ರವೀಣಗ್ ಗಲ್ಲು ಶಿಕ್ಷೆ ತಿಕ್ಕುಂಡು ಆಂಡ ಬೊಕ್ಕ ಅವು ಜೀವಿತಾವದಿಗ್ ಬದಲಾಪುಂಡು ಇತ್ತೆ ಸನ್ನಡತೆದ ಆದಾರಡ್ ಬುಡುಗಡೆಲಾ ಅವೊಂದುಂಡು.