ಈ ಸಾವು ನ್ಯಾಯನಾ?

Last updated on August 12th, 2022 at 08:00 pm

ಆತೀಶ್’ನ್ ಕೆರಿನಕುಲು ಏರ್? ಮೀಡಿಯಾ ಬೊಕ್ಕ ಅಧಿಕಾರಿಲು ಉಂದೊಂಜಿ ಅಪಘಾತ ಪನೊಂದುಲ್ಲೆರ್? ಆಂಡ ಆತೀಶ್ ಸೈತಿನಿ ಅಪಘಾತೊಡು ಅತ್ತ್ ಆಯನ್ ಕುಡ್ಲಡ್ ಸರಿಗಟ್ಟ್ ರೋಡ್ ಮಲ್ಪಂದಿನ, ಗುಂಡಿಲು ದಿಂಜಿದಿನ ರೋಡುನು ಸರಿ ಮಲ್ಪಂದಿನ ಅಧಿಕಾರಿಲು ಬೊಕ್ಕ ರಾಜಕಾರಣಿಲು ಕೆರಿನಿ.

ಸೈಂಟ್ ಜೋಸೆಫ್ ಕಾಲೇಜ್’ಡ್ ಇಂಜಿನಿಯರಿಂಗ್ ಮಲ್ದಿನ ಆತೀಶ್ ರೋಡುದ ಗುಂಡಿನ್ ತಪ್ಪಾಯರೆ ಪೋದು ತನ್ನ ಜೀವ ಕಳೆಯೊಂಡೆರ್. ಆರ್ ನಂತೂರುರ್ದ್ ಬಿಕರ್ನಕಟ್ಟೆ ಕೈಕಂಬದಂಚಿ ಪೋವೊಂದಿತ್ತೆರ್ ಆತ್ ಪೊರ್ತುಗು ಬಿಕರ್ನಕಟ್ಟೆ ಕಂಡೆಟ್ಟು ಕ್ರಾಸ್ದ ಡಿವೈಡರ್ ದಲ್ಪ ಉಪ್ಪುನ ಗುಂಡಿನ್ ತೂಯಿಜೆರ್.ಬರ್ಸ ಜೋರು ಬರೊಂದಿತ್ತ್ಂಡ್, ಗುಂಡಿ ಉಂಡು ಅಲ್ಪ ಬರಡೆ ಪನ್ದ್ ಒವ್ವೇ ಬ್ಯಾರಿಕೇಡ್ ಲಾ ಅಲ್ಪ ದೀತ್’ಜೆರ್. ಕಡೇಕ್ ಒರಾನಿ ಗುಂಡಿ ತೂಯಿನ ಆತೀಶ್ ಗುಂಡಿ ತಪ್ಪಾರೆ ಪೋದು ತನ್ನ ಬ್ಯಾಲನ್ಸ್ ತತ್ತೊಂದು ಡಿವೈಡರ್ ತಾಂಟಿಯೆರ್. ಅರೆನ ಮಂಡೆ ಅಲ್ಪ ಇತ್ತಿನ ಕರ್ಬದ ರಿಫ್ಲೆಕ್ಟರ್ ಕಂಬೊಗು ತಾಂಟ್’ದ್ ಮಂಡೆಗ್ ಮಲ್ಲ ಪೆಟ್ಟಾಂದ್. ಅರೆನ್ ಆಸ್ಪತ್ರೆಗ್ ಕೊನೊನಗ ತಾದಿಡೇ ತೀರಿಯೆರ್.
ಅರೆನ ಪಾಸಾಡಿ ಲಿಖಿತ್ ರೈ ಈ ಸಾವು ಅನ್ಯಾಯ ಪನ್ದ್ ಒರಿಯೇ ಪೊರುಂಬಾಟ ಮಲ್ತೊಂದುಲ್ಲೆರ್. ಎನ್ನ ಪಾಸಾಡಿನ ಸಾವುಗು ಅಧಿಕಾರಿಲು ರಾಜಕಾರಣಿಲು ಕಾರಣ ಪನ್ದ್ ಪನೊಂದುಲ್ಲೆರ್. ಮಾತೆರ್ ಉಂದೊಂಜಿ ಅಪಘಾತ, ಆತೀಶ್ ಬರಸ್’ಡ್ ಗಾಡಿ ಬುಡೊಂದಿತ್ತೆರ್ ಪನ್ದ್ ಪನೊಂದುಲ್ಲೆರ್, ಆಂಡ ಒಂಜಿ ವೇಳೆ ಬರಸ್’ಡ್ ಗಾಡಿ ಬುಡೊಂದಿತ್ತೆರ್ಡ ಗಾಡಿ ಪೊಡಿ ಪೊಡಿ ಆತೊಡು, ಗಾಡಿಗ್ ಕಾಲಿ ಎಲ್ಯ ಮಟ್ಟ್ ದ ಗೀರ್ ಆತಿನಿ. ಆತೀಶ್ ಹೆಲ್ಮೆಟ್ಲಾ ಪಾಡ್ದಿತ್ತೆರ್. ಅರೆನ ಮಂಡೆ ತಾಂಟ್ನದ ಹೆಲ್ಮೆಟ್ ರಟ್ಟ್ಂಡ್. ಈ ಗುಂಡಿನ್ ಬೊಕ್ಕ ಜಲ್ಲಿ ಕಲ್ಲ್ ಪಾಡ್ದ್ ಮುಚ್ಚಿಯೆರ್. ಉಂದು ಅವ್ವೇ ಜಾಗೊಡು ನಡಪುನ 8ನೇ ಅಪಘಾತ, ಅಪಂಡ ನನ ಏತ್ ಜೀವದ ಬಲಿ ಬೋಡು ಇಂಚಿನೆನ್ ಸಮ ಮಲ್ಪರೆ ಪನ್ದ್ ಅರೆನ ಪ್ರಶ್ನೆ.
ಎನ್ನ ಪಾಸಾಡಿಗ್ ನ್ಯಾಯ ಬೋಡು ಪನ್ದ್ ಆರ್ ಕೇನೊಂದುಲ್ಲೆರ್. ಆಯನ ಸಾವು ನ್ಯಾಯನಾ ಪನ್ದ್ ಕೇನೊಂದುಲ್ಲೆರ್. ಉಂದೆಕ್ ಉತ್ತರ ಕೊರ್ಪಿನಕುಲೇರ್?