Last updated on September 1st, 2022 at 08:40 pm
ಇನಿ ನಡತಿನ ಟ್ವೀಟ್ ತುಳುನಾಡ್ ಆಂದೋಲನೊಡು ಕಾಂಡೆರ್ದಿಂಚಿ ಮುಪ್ಪ ಸಾರೊರ್ದುಲಾ ದಿಂಜ ಟ್ವೀಟ್ ಮಲ್ತ್‌ದ್ ಕರ್ನಾಟಕೊಡೇ ಒಂಜನೇ ನಂಬರ್ ಡ್ ಟ್ರೆಂಡ್ ಆಪಿಲೆಕ್ಕ ತುಳುವೆರ್ ಮಲ್ತೆರ್.
ತುಳುವೆರ್ ತನ್ಕುಲೆನ ಶಾಸಕೆರ್, ಸಂಸದೆರೆನ್ ಮಾತ್ರ ಅತ್ತಂದೆ ಪ್ರಧಾನಿ ಮೋದಿ ಬೊಕ್ಕ ಮುಖ್ಯಮಂತ್ರಿ ಬೊಮ್ಮಾಯಿನ್ ಟ್ಯಾಗ್ ಮಲ್ತ್‌ದ್ ತುಳುಕು ಆಪಿನ ಅನ್ಯಾಯೊಗು ಪರಿಹಾರ ಕೊರ್ಲೆ ಪನ್ದ್ ಕೇಂಡೆರ್.
ತುಳು ಎಂಕ್ಲೆನ ಅಪ್ಪೆ ಬಾಸೆ, ಈ ಬಾಸೆಗ್ ಮಾನಾದಿಗೆ ಕೊರ್ಲೆ, ಕರ್ನಾಟಕ ರಾಜ್ಯೊದ ಅಧಿಕೃತ ಬಾಸೆ ಮಲ್ಪುಲೆ, ಪೊಕ್ಕಡೆ ತಾಂತ್ರಿಕ ದೋಷ ಪನ್ಪಿನೆನ್ ಬುಡ್ಲೆ ಆಯಿನಾತ್ ಬೇಗ ಅಧಿಕೃತ ಮಲ್ಪುಲೆ ಪನ್ದ್ ಪಂಡೆರ್.
ತುಳು ತನ್ನ ಅಪ್ಪೆ ಬಾಸೆ ಅತ್ತ್‌ಡಲಾ ಏತೋ ಕೊಂಕಣೆರ್, ಬ್ಯಾರಿಲು ತುಳು ತನ್ನ ನೆಲತ ಬಾಸೆ ಪನ್ದ್ ಈ ಪೊರುಂಬಾಟೊಡು ಪಾಲ್ ಪಡೆಯೆರ್.
ತುಳುಕು ಅಧಿಕೃತ ಮಾನಾದಿಗೆ ದಾಂತೆ ಆಡಳಿತೊಡು, ಶಿಕ್ಷಣೊಡು, ಸಂಸ್ಥೆಲೆಡ್ ಒವ್ವೇ ಬಿಲೆ ತಿಕ್ಕೊಂದಿಜ್ಜಿ, ಉಂದೆರ್ದಾತ್ರ ತುಳುತ ಬುಲೆಚ್ಚಿಲ್ ಕಮ್ಮಿ ಆವೊಂದುಂಡು ಪನ್ದ್ ಸಾಹಿತಿಲು ಪಂಡೆರ್.
ತುಳುನಾಡ್ ಕರ್ನಾಟಕದೊಟ್ಟುಗು ಸೇರ್‌ದ್ ಈತ್ ವರ್ಸ ಆಂಡಲಾ ನನಲಾ ತುಳುಕು ಮಾನಾದಿಗೆ ಕೊರಿಯರೆ ಆಯಿಜಿ ಪಂಡ ನಮಕ್ ಬೇತೆನೇ ರಾಜ್ಯ ಆಂಡನೇ ಎಡ್ಡೆ ಪನ್ಪಿನ ಪಾತೆರಲಾ ಬತ್ತ್ಂಡ್.
ಒಟ್ಟುಗು ಸಾರ ಸಾರ ಟ್ವೀಟುಲು ತುಳು ಪರವಾದ್ ಬೈದಿನ ತೂನಗ ನನಾಂಡಲ ಸರಕಾರ ನಿದ್ರೆಡ್ ಲಕ್ಕ್‌ದ್ ತುಳುನು ರಾಜ್ಯದ ಅಧಿಕೃತ ಬಾಸೆಯಾದ್ ಮಲ್ತ್ಂಡ ಎಡ್ಡೆ.