ಬಿನ್ನಾಭಿಪ್ರಾಯೊಲು ಇಜ್ಜ, ನಮ ಒಂಜಿ ಸಂಘಟನೆಡ್ ಇಪ್ಪುನಗ ಕುಡೊಂಜಿ ಸಂಘಟನೆದ ಲೇಸ್‌ಡ್ ಪಾಲ್ ಗೆತೊಂಡ ಈರ್ ದಾನೆ ಪೋಯಿನಿ ಅಂದ್ ಕೇನುವೆರ್ – ರೋಷನ್ ರೆನಾಲ್ಡ್

Last updated on April 20th, 2025 at 06:15 pm

ಕಟ್ಪಾಡಿ: ಎಪ್ರಿಲ್ 13 ಕ್ ತುಳುನಾಡ್ ಕಾನ್‌ಕ್ಲೇವ್‌ಡ್ ನಡತಿನ ಜವನೆರೆ ಸಮಾವೇಶೊದ ಬಿನ್ನೆ ರೋಷನ್ ರೆನಾಲ್ಡ್  ಪಾತೆರ್ದ್, ಪೊರ್ಂಬಾಟೊದ ಕಲೊಟ್ಟು ಇಪ್ಪುನೆರ್ದ್ ಎಂಕುಲು ಪಾತೆರುನು ಕಮ್ಮಿ, ಮಹಿ ಮಲ್ಕಿ ಬೊಕ್ಕ ಅರೆನ ಜವನೆರ್ ಟೆಕ್ನಿಕಲ್ ಆದ್ ಗಟ್ಟಿ ಉಲ್ಲೆರ್ ತುಳು ಲಿಪಿದ ಬಗೆಟ್ ಆದಿಪ್ಪು, ಫಾಂಟ್‌ದ ಇಸಯಡ್ ಆದಿಪ್ಪು ಮಾತ ಇಚಾರಡ್ಲಾ ಟೆಕ್ನಿಕಲ್ ಆದ್ ಗಟ್ಟಿ ಉಲ್ಲೆರ್. ಇನಿ ನಮ ನಮ್ಮ ಶಾಲೆದ TC ನ್ ತೂಂಡ ಅವೆಟ್ ನಮ್ಮ ಅಪ್ಪೆ ಬಾಸೆ ಕನ್ನಡ ಪಂದುಂಡು ಇತ್ತಿನೆರ್ದಾವರ ನಮಕ್ಕ್ ತುಳುವೆರ್ ಏತ್ ಉಲ್ಲೆರ್ ಪಂದ್ ಸಮ ಲೆಕ್ಕ ತಿಕ್ಕೊಂದಿಜ್ಜಿ, ನೆಕ್ಕ್ ದಾಲ ಟೆಕ್ನಿಕಲ್ ಆದ್ ಬೇಲೆ ಆವೊಡು ಪಂದ್ ಬಿನ್ನಯ ಮಲ್ತೊಂಡೆರ್. ರಾಜ್ಯ ಬಾಸೆ ಮಲ್ಪರೆ ಎಂಕ್ಲೆಡ ತುಳುವೆರ್ನ ಲೆಕ್ಕ ಕೇನುವೆರ್ ಆಂಡ ನಮಡ ಸರಿ ಲೆಕ್ಕ ಇಜ್ಜಿಂದ್ ಪಂಡೆರ್, ಈ ಪೊರ್ತುಡು ತುಳು ಬಾಸೆದ ಬಗೆಟ್ ಪೊರ್ಂಬಾಟ ಮಲ್ತಿನ ಬಿರ್ಸೆ, ತುಳುವೆರೆನ್ ಬುರ್ದು ಪೋತಿನ ಶಶಿರಾಜ್ ಬಂಡಿಮಾರ್‌ನ್ ನೆನೆತೊಂಡೆರ್.

ತುಳು ಪೊರ್ಂಬಾಟೊಗು ಸೇರುನ ಜನ ಕಮ್ಮಿ, ಒಡಿಪುಡು ತುಳುವೆರೇ ಕನ್ನಡ ಸಂಘನ್ ಕಟ್ಟೊಂದುಲ್ಲೆರ್, ತುಳುತ್ತ ಇಚಾರ ಬನ್ನಗ ಒಡಿಪುದಕುಲುಲಾ ಸೊರ ದೆರ್ಪೊಡು ಬೊಡ್ಡ ಪೊರ್ಂಬಾಟೊಗು ಎಂಕುಲು ಕುಡ್ಲರ್ದ್ ಜನ ಬರ್ಪ ಪಂದ್ ಪಂಡೆರ್ ಆತೆ ಅತ್ತಾಂದೆ ತುಳುಕ್ಕ್ ಒಂಜಿ ಮಲ್ಲ ಪೊರ್ಂಬಾಟ ಆವೊಡು ಪಂದ್ ಲೆಪ್ಪು ಕೊರಿಯೆರ್. ಒವ್ವೆ ರೀತಿದ ಬಿನ್ನಾಭಿಪ್ರಾಯೊಲು ಇಜ್ಜ, ಯಾನ್ಲಾ ಒಂಜಿ ಸಂಘಟನೆಡ್ ಇತ್ತೆ, ನಮ ಒಂಜಿ ಸಂಘಟನೆಡ್ ಇಪ್ಪುನಗ ಕುಡೊಂಜಿ ಸಂಘಟನೆದ ಲೇಸ್‌ಡ್ ಪಾಲ್ ಗೆತೊಂಡ ಈರ್ ದಾನೆ ಪೋಯಿನಿ ಅಂದ್ ಕೇನುವೆರ್, ಅಂಚಾದ್ ಇತ್ತೆ ಏಕಾಂಗಿ ಹೋರಾಟ ಪಂದ್ ಪಂಡೆರ್. ತುಳುಬಾಸೆಗ್ ರಾಜ್ಯ ಬಾಸೆದ ಮಾನಾದಿಗೆ ಮಾತಲ ತಿಕ್ಕೊಡು ಆಂಡ ಇತ್ತೆ ತುಳುವೆರೆಗ್ ತುಳುತ್ತ ಬಗ್ಗೆ ಇಪ್ಪುನ ಜ್ಞಾನ ಕಮ್ಮಿ ಉಂಡು ತುಳುವೆರ್ ತುಳುತ್ತ ಬಗ್ಗೆ ತೆರಿಯೊನೊಡು ಪಂದ್ ಬಿನ್ನಯ ಮಲ್ತ್ ಅರೆನ ಪಾತೆರೊಗು ಮುಗಿತಲದ ಬೊಟ್ಟು ದೀಯೆರ್.