Last updated on October 27th, 2022 at 06:44 pm
ಜೆತ್ತಿನದಗ ಒರಾನೇ ಕೈ ಕಾರ್ ಏರಾ ಗಟ್ಟಿಡ್ ಪತ್ತಿದೀದ್ ಕಂಟೆಲ್ ಪೊಜೆಂಕಿಲೆಕ್ಕ ಆಪಿನಿ, ಕಲ್ಕರೆ ಆವಂದಿನ, ಕೈ ಕಾರ್ ಪಿಜಿರ್ಯರೆ ಆವಂದಿನ ಅನುಭವ ಸುಮಾರ್ ಜನಕ್ ಆದಿಪ್ಪು. ಉಂದು ಸೈತಿನಕ್ಲೆನ ಉಪದ್ರನಾ? ಕುಲೆಕುನು ನಮಕ್ ಇಂಚ ಮಲ್ಪುನಾ? ಉಂದೆಕ್ ಮರ್ದ್ ದ ಬಾಸೆಡ್ ಸ್ಲೀಪ್ ಪ್ಯಾರಾಲಿಸಿಸ್ ಪನ್ಪೆರ್.
ಸ್ಲೀಪ್ ಪ್ಯಾರಾಲಿಸಿಸ್ ಪನ್ದ ನಿಕ್ಲೆಗ್ ಎಚ್ಚರ್ಗೆ ಆಯಿಲೆಕ್ಕ ಆಪಿನಿ ಆಂಡ ಕೈ ಕಾರ್ ಪಂದಾವರೆ ಆವಂದಿನಿ. ಉಂದು ಸಾಮಾನ್ಯವಾದ್ ನಿದ್ರೆಡಿತ್ತಿನ ಬೊಕ್ಕ ಎಚ್ಚರ್ಗೆ ಆಪಿನ ನಡುತ ಸ್ಥಿತಿಡ್ ಬರ್ಪುಂಡು. ಉಂದು ಆನಗ ನಿಕಲೆಗ್ ಕೆಲವು ಸೆಕೆಂಡ್ ಪಾತೆರಿಯರೆಲಾ ಆಪುಜಿ, ಕೆಲವೆರೆಗ್ ಕಂಟೆಲ್ ಪತಿಲೆಕ್ಕಲಾ ಆಪುಂಡು. ಈ ಸೀಕ್ ನಾರ್ಕೊಲೆಪ್ಸಿದಟ್ಟುಗ್ಲಾ ಬರು. ನಾರ್ಕೋಲೆಪ್ಸಿ ಪಂಡು ಜೀವೊಗು ಲೆಕ್ಕೊರ್ದ್ ದಿಂಜ ನಿದ್ರೆ ಮಲ್ಪೊಡು ಪನ್ದ್ ಆಪಿನ ಒಂಜಿ ಸೀಕ್.
ಸ್ಲೀಪ್ ಪ್ಯಾರಾಲಿಸಿಸ್ ರಡ್ಡ್ ರೀತಿಡ್ ಉಪ್ಪುಂಡು. ಒಂಜಿ ಜೆತ್ತಿತಿನಗ ಆಪಿನ ಕುಡೊಂಜಿ ನಿದ್ರೆರ್ದ್ ಎಚ್ಚರ್ಗೆ ಆನಗ ಆಪಿನ. ಒಂಜಿ ಸಂಶೋಧನೆ ಪ್ರಕಾರ ಪತ್ತೆಟ್ಟ್ ನಾಲ್ ಜನಕ್ ಉಂದು ಉಪ್ಪುಂಡು. ಉಂದು ಜವನಾದಿಗೆದ ಪಿರಯೊಡು ಸುರುವಾಪುಂಡು. ಸರಿಯಾದ್ ನಿದ್ರೆ ಮಲ್ಪಂದಿನ, ವಾ ವಾ ಪೊರ್ತಗು ಒಟ್ಟಾರೆ ಜೆಪ್ಪುನ, ಮಂಡೆಗ್ ಟೆನ್ಷನ್ ದೆತೊನುನ, ನಾರ್ಕೋಲೆಪ್ಸಿ, ಕೆಲವು ಮರ್ದ್ ದ ಸೈಡ್ ಎಫೆಕ್ಟ್ ಇಂಚ ಬೇತೆ ಬೇತೆ ನೆವನೊಡು ಉಂದು ಬರ್ಪಿನ ಸಾಧ್ಯತೆ ಉಂಡು.
ಉಂದೆಕ್ ಮರ್ದ್ ಇಜ್ಜಿ ಆಂಡ ಸುಮಾರ್ ರೀತಿಡ್ ಉಂದೆನ್ ಅಂಕೆಡ್ ದೀವೊನೊಲಿ. ಎಡ್ಡೆಡ್ ಜೆಪ್ಪೊಡು, ದಿನೊಕು ಆಜೆರ್ದ್ ಎಡ್ಮ ಗಂಟೆ ಜೆಪ್ಪೊಡು. ಕೆಲವು ಆಂಟಿಡಿಪ್ರೆಸ್ಸೆಂಟ್ ಬೈದ್ಯೆರ್ ಕೊರ್ತಿನಲ ಸಕಾಯ ಮಲ್ಪುಂಡು. ಮಂಡೆದ ಮಾನಸಿಕ ಸೀಕ್ ಇತ್ತ್ಂಡ ಅವೆಕ್ ಸರಿಯಾಯಿನ ಮರ್ದ್ ದೆತೊನೊಡು. ನಾರ್ಕೋಲೆಪ್ಸಿದಂಚಿನ ಸೀಕ್ ಇತ್ತ್ಂಡ ಅವೆಕ್ ಮರ್ದ್ ದೆತೊನೊಡು. ಉಂದೆನ್ ಪೂರಾ ಸರಿಟ್ ಮಲ್ತ್ಂಡ ಸ್ಲೀಪ್ ಪ್ಯಾರಾಲಿಸಿಸ್ ಕಂಟ್ರೋಲ್ ಬರ್ಪುಂಡು.
ಇಂಚ ಆಪಿನ ಒವ್ವ್ ತೈತಿನದ ಉಪದ್ರ ಅತ್ತ್. ಉಂದು ಮಂಡೆಬೆಚ್ಚ ಮಲ್ತೊಂದು ಸರಿಯಾದ್ ಜೆಪ್ಪಂದೆ ಆಪಿನ ಸೀಕ್.