Last updated on November 8th, 2022 at 05:48 pm
ಕೆಲವೊರ ಇಂಚ ಪೂರಾ ಬರೆನಗ ಉಡಲ್ ಪುಲೆಯುಂಡು ಆಂಡ ಬರೆಯಂದೆ ಕುಲ್ಲರೆಲಾ ಆಪುಜಿ. ತುಳುನಾಡ ಮಣ್ಣ ಕಮ್ಮೆನ ಏತ್ ಪಗರೊಂದುಂಡಾ ಆತೇ ಮೂರಿಲಾ ಬರೊಂದುಂಡು. ತುಳುವೆರೆಗ್ ಒಯಿಟ್ ಕುಂದೆಲ್? ಒಯಿತ ಪೋಡಿಗೆ? ತುಳು ಬಾಸೆಗ್ ಒಯಿತ ಕೆರನ? ತುಳುನಾಡ್‌ಗ್ ಪತ್ತಿನ ಒಡು ಒವ್?
ತುಳು ಪನ್ಡ ಕಾಲಿ ನಾಲಯಿರ್ದ್ ಬರ್ಪಿನ ನಾಲ್ ಪದ ಅತ್ತ್. ಅವ್ ಮಣ್ಣ ಪುಂಚೊಡು ಸಂಪುಲ್ಲ ಜಾಗೆಡ್ ಬಲಿರಿನ ಸಂಕಮಾಲೆದ ಸುಯಿಲ್. ಅವ್ ಮೈಲೆ ದಾಂತಿ ಲತ್ತ್ ಪಿಂಗಾರ ಪುರ್ಪುದಲೆಕ್ಕ ಮೆತ್ತನೆದ ಉರಲ್. ತುಳುಕು ಅನನೆಮುನೆ ಇಜ್ಜಿ. ತುಳು ಬೆರ್ಮೆರೆ ಪುಂಡಿಡ್ ಸತ್ಯಮಂದ ಲೋಕದ ಸಿರಿನ ಜಕ್ಕೆಲ್‌ಡ್, ಇರುವೆರ್ ಅಮರ್ ಬೈದ್ಯೆರ್ಲೆ ಸುರಿಯೊಡು, ಬಬ್ಬುನ ಬಾದೆಡ್, ಕಂಬರ್ಲೆ ಕಲಟ್, ಮುಗೇರ್ಲೆ ಬಿರುಟು, ಕಲ್ಲುರ್ಟಿನ ಸೆರಂಗ್‌ಡ್, ತನಿಯನ ಮುಟ್ಟಲೆಡ್, ತುಳುನಾಡ ಸಾರ ಬೂತ ದೈವ ಗಂಡ ಗನೊಕುಲೆ ನಾಲಯಿಡ್ ಅರಲೊಂದಿಪ್ಪುನ ಬಾಸೆ.
ಬಾಲೆಗೊಂಜಿ ದೊಂಡೆ ಉಡರ್ದ್ ಅಪ್ಪೆ ನಿರೆತ ಬೆಪ್ಪು ಕರಿನೇ ನಾಲಯಿ ಪಿಜಿರ್ನಗ ಉಡಲ ಕಿಲೆತಿಲ್ಲಡ್ ಉಂಡಾಪಿನ ದೈವ ತುಳು. ಇಂಚಿತ್ತಿ ತುಳುತ ಕಂಟೆಲ್ಡ್ ಪತ್ತ್ ಪೊಜೆಂಕುನ ಅಮ್ಸಾನಿ ದಾಯೆಗ್ ಪುಟ್ಟುಂಡು?
ಸಾರ ವರ್ಸ ಏತೋ ಜನ ದೊಂಕಿಯೆರ್, ತಜೆತೆರ್, ತೊರ್ತೆರ್ ತುಳುನಾಡ್‌ನ್. ಆಂಡ ತುಳು ಅಳಿಯಿಜಿ! ದಾಯೆಗ್ ಕೇನ್ಲೆ? ತುಳು ನಮ್ಮ ಪೆರಿಯಾಕ್ಲೆನ ಉಡಲ ಗುಂಡೊಡು ನಿತ್ಯ ಪೂಜೆ ಕರಿತೊಂದಿತ್ತ್ಂಡ್. ಏರ್ ಏತೇ ತೊರ್ತುಂಡಲ ತುಳುಕು ಕುಂದೆಲ್ ಬತ್ತ್‌ಜಿ. ಯಾಪ ತುಳುವೆರ್ ತುಳು ಮದತ್‌ದ್ ಪನವುದ ಅಂಗ್‌ಗಾ ಅತ್ತ್ ಪುದರ್ದ ಅಂಗ್‌ಗಾ, ಮಾನಾದಿಗೆದ ಅಂಗ್‌ಗಾ ತುಳು ಬುಡ್ದ್ ಬೇತೆ ಬಾಸೆದ ಸೆರಂಗ್ ಪತ್ತಿಯೆರಾ ಆನಿಯೇ ತುಳುತ ಪಂಚಾಂಗ ಅದ್ರ್ಂಡ್.
ನರಮಾನ್ಯಗ್ ಪನವು ಬೋಡು, ಪುದರ್ ಬೋಡು ಆಂಡ ತನ್ನಪ್ಪೆನ ಸೆರಂಗ್ ಮಾರ್‌ದ್ ಇಂಚಿನ ಮಲ್ಪೊಡಾ? ಪುಟ್ಟಾಯಿನ ಅಪ್ಪೆ ಬಡವೆದಿ ಪನ್ದ್ ಅಲೆನ್ ದಂಟ್‌ದ್ ಪಿದಡ್ವರಾ? ಒಂಜಿ ಕಾಲೊಡು ರಾಜ್ಯೊಲೆನ ರಚನೆ ಆನಗ ಎಂಕ್ಲೆಗ್ ಸೊತಂತ್ರ ಅಸ್ಥಿತ್ವ ಬೋಡು ಪನ್ದ್ ತುಳುವೆರ್ ಪಂಡಿನೇ ಅಕಲೆನ್ ಗೆನ್ಪಂದೆ, ಅಕುಲು ಊರು ಬುಡ್ದ್ ಬಲ್ಪುಲೆಕ್ಕ ಮಲ್ತಿನಿಲಾ ತುಳುವೆರೇ! ಆನಿ ಅಕಲೆಗ್ ಬೆರಿಬಲ ಆದ್ ಉಂತುದಿತ್ತ್ಂಡ ಇನಿ ನಮ್ಮ ಕಾರ್‌ಗ್ ನಮನೇ ಮಡು ಪಾಡೊನುನ ಸಂಗತಿ ಬೈದಿತ್ತಂದ್. ಆನಿ ತುಳುನಾಡ್ ಬೊಡ್ಚಿ ಎಂಕುಲೆಗ್ ಕರ್ನಾಟಕ ಅತ್ತಂದೆ ಬದ್ಕರೆ ಆಪುಜಿ ಪಂಡಿನಕುಲು ಎಂಪಿಲಾಯೆರ್, ಎಂಎಲ್ಎ ಆಯೆರ್, ಕನ್ನಡ ಸಾಹಿತಿಲಾದ್ ಮಲ್ಲ ಮಲ್ಲ ಮಾನಾದಿಗೆ ದೆತೊಂಡೆರ್ ಅಕ್ಲೆನ ಉಪಯೋಗೊಗು ತುಳುನಾಡ್ ಪಟ್ಟೊಂಡೆರ್. ಆಂಡ ತುಳು ಒಡೆಗ್ ಎತ್ತ್ಂಡ್?
ತುಳುಕು ಮಾನಾದಿಗೆ ಕೇನುನನೇ ತಪ್ಪು ಪನ್ಪಿಲೆಕ್ಕ ಆತ್ಂಡ್. ಯಾನ್ ತುಳುವೆ, ಕನ್ನಡಿಗೆ ಅತ್ತ್ ಪನ್ದ್ ಸತ್ಯ ಪಾತೆರಿನಕಲೆಗ್ ತುಳುವೆರೇ ಪ್ರತ್ಯೇಕತಾವಾದಿಲು ಪನ್ಪೆರ್. ಆನಿ ಕೆಲವೆರ್ ಮಲ್ದಿನ ತಪ್ಪುನು ಇತ್ತೆದ ತುಳುವೆರ್ ಮಲ್ಪರೆ ಪಿದಡೊಂದುಲ್ಲೆರ್. ತನ್ನ ಅಪ್ಪೆಗ್ ಒಂಜಿ ಪೊರ್ತುದ ನುಪ್ಪುಗು ತತ್ವಾರ ಬತ್ತ್ಂಡಲಾ ಮಲ್ಲೆಜ್ಜಿ ತುಳುವೆರೆಗ್ ತನ್ನ ಮಾಮಿ ಮಾತ್ರ ಬಂಜಾರ ಉನೊಡು. ಒಂಜತ್ತ್ ಒಂಜಿ ದಿನ ಅಪ್ಪೆನ ಮೋಕೆದ ಪೊಲಬು ಆವು. ಆತ್ ಪೊರ್ತುಗು ಅಪ್ಪೆ ಒರಿದಿತ್ತ್ಂಡ ಯಾವು.