Last updated on June 4th, 2025 at 08:53 am
ಹೆಬ್ರಿ, ಜೂನ್ 4: ಐಪಿಎಲ್ ಪನ್ಡನೇ ಅಂಚ, ಒರ್ಮೆಲಾ ಜನೊಕುಲು ಮರ್ಲ್ ಕಟ್ಟ್ದ್ ತೂಪಿನ ಕ್ರಿಕೆಟ್ದ ಗೊಬ್ಬು. ಅವ್ಲಾ ಕೋಡೆ 18 ವರ್ಸೊರ್ದಿಂಚಿ ಟ್ರೋಫಿ ಗೆಂದುನ ಕನ ಕಟೊಂದಿನ ರಡ್ಡ್ ಟೀಮ್ಲೆ ನಡುಟು ಪಂತೊ. ಉಂದೆತ ನಡುಟು ಐಪಿಎಲ್ ಟೀಮ್ಲೆನ ಕೆಲ ಫ್ಯಾನ್ಸ್ಲೆನ ಒಂಜೊಂಜಿ ಅಬತರ.
ಅಂಚೆನೇ ಹೆಬ್ರಿಗ್ ಮುಟ್ಟದ ದೊಂಡೇರಂಗಡಿ ತಿರ್ತಪೇಂಟೆದ ಗುರುದೇವ ಕಾಂಪ್ಲೆಕ್ಸ್ಡ್ ಇಪ್ಪುನ ಬ್ರಹ್ಮಶ್ರೀ ಚಿಕನ್ ಸೆಂಟರ್ದ ಪುದರ್ಡ್ ಸುಳ್ಳು ಪೋಸ್ಟರ್ ಒಂಜಿ ವೈರಲ್ ಆತ್ಂಡ್. ಏರೋ ಒರಿ ಪ್ರದೀಪ್ ಶೆಟ್ಟಿ ಕುಕ್ಕುಜೆ ಮೆರೆನ ಪುದರ್, ನಂಬರ್ ಪಾಡ್ದ್, ಬ್ರಹ್ಮಶ್ರೀ ಚಿಕನ್ ಸೆಂಟರ್ದ ಪುದರ್ಡ್ ಫೈನಲ್ಡ್ ಆರ್ಸಿಬಿ ಕಪ್ ಗೆಂದ್ಂಡ್ ಒಂಜಿ ಕೆಜಿ ಕೋರಿಗ್ ಒಂಜಿ ಕೆಜಿ ಕೋರಿ ಫ್ರೀ ಕೊರ್ಪ ಪನ್ದ್ ಪೋಸ್ಟರ್ ಮಲ್ತ್ ಪಟ್ಟೊಂದೆರ್.
ಈ ಪೋಸ್ಟರ್ ತೂದು ಪಾಕ ಜನ ಪ್ರದೀಪೆರೆಗ್ ಕಾಲ್ ಮಲ್ತಿತ್ತ್ದ್ ಅಂಚಿನ ಒಂಜಿ ಕಾಲ್ದ ವಾಯ್ಸ್ ರೆಕಾರ್ಡ್ಲಾ ಇತ್ತೆ ವೈರಲ್ ಆತ್ಂಡ್. ಈ ಆಡಿಯೋಡ್ ಪ್ರದೀಪೆರ್, ಅವು CSK ದಕುಲು ಪಾಡ್ದಿನಿ, ಎನ್ನ ಕೈ ದಾಲ ಇಜ್ಜಿ ಐಟ್, ಎನ್ನ ಪಗೆಮಾನಿಲು ಪಾಡ್ದಿನಿ, ಎಂಕ್ ಕಾಲ್ದ ಮಿತ್ತ್ ಕಾಲ್ ಬರೊಂದುಂಡು ಪನ್ದ್ ಬೆಸರ್ಡ್ ಪನ್ಪುನ ಕೇನುಂಡು.
ಇಂಚ ಗೊಬ್ಬುದ ಮರ್ಲ್ಡ್ ಕುಡೊರ್ಯನ ವೈವಾಟ್ಗ್ ಪೆಟ್ಟ್ ಬೂರುಲೆಕ, ಬೊರ್ಚಂದಿ ವಿಷಯೊಡು ಸುದ್ದಿ ಆಪುಲೆಕ ಮಲ್ಪುನ ತಪ್ಪು.