Last updated on November 15th, 2022 at 07:06 am
ತೆಲಂಗಾಣೊದ ಟಿಆರ್‌ಎಸ್ ಪಕ್ಷೊದ ಶಾಸಕೆರೆನ್ ಬಿಜೆಪಿಗ್ ಒಯ್ತೊನೆರೆ ಬೋಡಾದ್ ನಡತ್‌ದ್ಂಡ್ ಪಂದ್ ಪನೊಂದುಪ್ಪುನ ಆಪರೇಷನ್ ಕಮಲದ ಪುನೆಪುದ ಜಡ್ತೆ ಮಲ್ತೊದು ತೆಲಂಗಾಣ ಪೊಲೀಸ್ ಪುತ್ತೂರು ಸೇರ್ದ್ 4 ರಾಜ್ಯೊಲ್ನ 7 ಜಾಗೆಲೆಡ್ ದಾಳಿ ಮಲ್ದೆರ್.
ಬಿಜೆಪಿದ ಏಜೆಂಟ್ ಪಂದ್ ಪನೊಂದುಪ್ಪುನ ಫರೀದಾಬಾದ್ ಮೂಲೊದ ಧರ್ಮ ಪ್ರಚಾರಕೆ ರಾಮಚಂದ್ರ ಭಾರತಿ, ಹೈದರಾಬಾದ್ ಉದ್ಯಮಿ ನಂದಕುಮಾರ್ ಬೊಕ್ಕ ತಿರುಪತಿದ ಸಿಂಹಯ್ಯಾಜಿ ಸ್ವಾಮಿ ಎಂಕ್ಲೆಗ್ ₹ 250 ಕೋಟಿ ಕೊರ್ದು ಬಿಜೆಪಿಗ್ ಒಯ್ಪೆರ ತೂತೆರ್ ಪಂದ್ ಟಿಆರ್‌ಎಸ್‌ದ ನಾಲ್ ಜನ ಶಾಸಕೆರ್ ಇಂಚಿಪ್ಪೊಗು ದೂರು ಕೊರ್ದಿತ್ತೆರ್. ಮೂಜಿ ಜನೊನ್ಲಾ ಪತ್ತಿನ ಪೋಲೀಸ್‌ದಕ್ಲೆಗ್ ರಾಮಚಂದ್ರ ಭಾರತಿಗ್ ಫರೀದಾಬಾದ್‌ಡ್ ಮಾತ್ರ ಅತ್ತ್ ಕುಡ್ಲ ಜಿಲ್ಲೆದ ಪುತ್ತೂರುಡ್ಲಾ ಇಲ್ಲ್ ಉಂಡು ಪಂದ್ ತೆರಿದ್‌ಬೈದ್ಂಡ್. ಅಂಚಾದ್ ಪುತ್ತೂರುದ ಇಲ್ಲಗ್ ತೆಲಂಗಾಣದ ಸ್ಪೆಷಲ್ ಇನ್ವೆಸ್ಟಿಗೇಷನ್ ಟೀಮ್ ದಾಳಿ ಮಲ್ದೆರ್.