Last updated on January 26th, 2023 at 01:36 pm
ಲವಣಾಂಶೊಲು ಗಟ್ಟಿಯಾದ್ ಪಡ್ಕೆದಕರಟ್ ಉಂತುನೆಕ್ಕ್ ಪಡ್ಕೆದ ಕಲ್ಲ್ ಪನ್ಪೆರ್. ಪೂರಾ ಪಡ್ಕೆ ಮೈಪಂದೆ ಒರಿಪಾಂಡ ಅಲ್ಪ ಪಡ್ಕೆದಕರಟ್(ಮೂತ್ರಕೋಶಡ್) ಒರಿನ ಪಡ್ಕೆದ ಅಂಶ ಅಡೆಗೇ ಒರಿದ್ ಗಟ್ಟಿಯಾದ್ ಕಲ್ಲ್ ಆಪುಂಡು. ಎಲ್ಯ ಕಲ್ಲುಲಾಂಡ ಒವ್ವೇ ಮರ್ದ್ ದಾಂತೆ ಪಡ್ಕೆದೊಟ್ಟುಗು ಪಿದಯಿ ಪೋಪುಂಡು. ಆಂಡ ಕಲ್ಲ್ ಮಲ್ಲ ಆಂಡ ಮರ್ದ್ ಮಲ್ಪೊಡಾಪುಂಡು ಕೆಲವೊರ ಒಪರೇಶನ್ ಮಲ್ತ್ ದೆಪ್ಪುನಲಾ ಉಂಡು.
ಕೆಲವೊರ ಕಲ್ಲ್ ಇತ್ತ್ಂಡಲ ಒವ್ಲೇ ಲಚ್ಚನ ತೋಜುಜಿ, ಆಂಡ ಕಲ್ಲ್ ಒಂಜಾರ ಪಡ್ಕೆದಕರತ ಗೋಡೆಗ್ ಪೆಟ್ಟ್ ಮಲ್ತ್ಂಡ ಅತ್ತಂದೆ ಪಡ್ಕೆನ್ ಕಟ್ಟಾಂಡ ಕೆಲವು ಲಚ್ಚನೊಲು ತೋಜಿದ್ ಬರು. ತಿರ್ಬಂಜಿ ಬೇನೆ, ಪಡ್ಕೆ ಮೈಪುನಗ ಬೇನೆ ಆಪಿನಿ, ಗಡಿ ಗಡಿ ಪಡ್ಕೆ ಬತ್ತಿನಲ್ಕ ಆಪಿನಿ, ಕಟ್ಟ್ ಕಟ್ಟ್ ಪಡ್ಕೆ ಪೋಪಿನಿ, ಪಡ್ಕೆಡ್ ನೆತ್ತೆರ್ ಪೋಪಿನಿ ಇಂಚಿನ ಕೆಲವು ಸೀಕ್ ಲಚ್ಚನೊಲು ಮಿತ್ತ್ ಬೂರುವ.
50 ವರ್ಸ ಕರಿನ ಅಂಜೊವುಲೆಗ್ ಪಡ್ಕೆಡ್ ಕಲ್ಲ್ ಆಪಿನ ಸಾದ್ಯತೆ ಉಂಡು. ಒಂಜಾರ ಒವ್ವಾಂಡಲ ಸೀಕ್ ಲಚ್ಚನ ತೋಜಿಂಡ ಬೇಗೊಡೆ ಬೈದ್ಯೆರೆಗ್ ತೊಜಪಾವೊಡು.
ಪಡ್ಕೆಡ್ ಕಲ್ಲ್ ಆವಂದಿಲೆಕ್ಕ ಮಸ್ತ್ ನೀರ್ ಪರೊಡು, ನೀರ್ ದಿಂಜ ಪರಿನಾತ್ ಪಡ್ಕೆಡ್ ಇತ್ತಿನ ಲವಣಾಂಶೊಲು ಕಲಡ್‌ದ್ ಪೋಪುಂಡು. ಲಿಂಬುದ ಜ್ಯೂಸ್ ಅಪಗಪಗ ಪರೊಂದಿಪ್ಪೊಡು. ಲಿಂಬುಡು ಸಿಟ್ರಿಕ್ ಆಸಿಡ್ ಉಪ್ಪುಂಡು, ಉಂದು ಕ್ಯಾಲ್ಸಿಯಂ ಗಟ್ಟಿಕಟ್ಟುನೆನ್ ತಡೆಪುಂಡು. ಬಾರೆದ ಬಂಬೆಲಾ ಎಡ್ಡೆ. ಬಾರೆದ ಬಂಬೆದ ನೀರ್ ಜೀವೊಗು ಸೇರ್ಂಡ ಪಡ್ಕೆದ ಕಲ್ಲ್ ನೀರಾಪುಂಡು ಪನ್ದ್ ತುಳುವೆರೆನ ನಂಬೊಲಿಗೆ ಉಂಡು.
ಇಂಚಿನ ಸೀಕುಲು ಬನ್ನಗ ಇಲ್ಲದ ಮರ್ದ್ ಮಲ್ಪುನಲೆಕ್ಕನೇ ಬೈದ್ಯೆರೆನ್ ತೂವೊಡು. ಅಕುಲು ನಮ್ಮ ಜೀವೊಗು ತಕ್ಕ ಮರ್ದ್ ಕೊರ್ಪೆರ್.