Last updated on February 26th, 2023 at 04:19 pm
ಕರಿನ ಕೆಲವು ವರ್ಸೊರ್ದಿಂಚಿ ತುಳು ಬಾಸೆಡ್ ಸುಮಾರ್ ಪೊರುಂಬಾಟ,ಕಜ್ಜೊಲೆನ್ ಮಲ್ತೊಂದಿಪ್ಪುನ ಜೈ ತುಲುನಾಡ್(ರಿ) ಸಂಘಟನೆ ತುಳು ಬಾಸೆ ಕಾಲಿ ತುಲುವೆರೆಗ್ ಮಾತ್ರ ಅತ್ತಂದೆ ಪಿದಯಿದಕಲೆಗಾ ತೆರಿಯೊಡು ಪನ್ಪಿ ಉದ್ದೇಶೊಡು ತುಳು ಕಲ್ಪಾವುನ ಪುನೆಪುಗು ದುಂಬು ಪಜ್ಜೆ ದೀತೆರ್.
ಸುರುಕಾದ್ ಕನ್ನಡ ಬೊಕ್ಕ ಇಂಗ್ಲೀಷ್ ಬರ್ಪಿನಕಲೆಗ್ ತುಳು ಕಲ್ಪಾವುನ ಕ್ಲಾಸ್ ಉಂದೇ ಬರ್ಪಿ ಮಾರ್ಚ್ ತಿಂಗೊಲುರ್ದು ನಡಪರೆ ಉಂಡು. ಉಂದು ಆನ್‌ಲೈನ್ ಕ್ಲಾಸುಲಾದುಂಡು ಮಾತ್ರ ಅತ್ತಂದೆ ಒವ್ವೇ ಪನವು ಕೊರಿಯರೆ ಇಜ್ಜಿ. ಕಲ್ಪರೆ ಉಮೇದ್ ಇತ್ತಿನಕುಲು ಕೊರ್ತಿನ QR ಕೋಡ್ ಸ್ಕ್ಯಾನ್ ಮಲ್ತ್ ತನ್ಕುಲೆನ ಪುದರ್ ಕೊರೊಲಿ. ನನ ದುಂಬಗ್ ಹಿಂದಿಡ್ಲಾ ಕಲ್ಪಾವುನ ಪುನೆಪು ಬರ್ಪ ಪನ್ದ್ ಬೆಂಗಳೂರು ವಿಭಾಗದ ಗುರ್ಕಾರೆ ವಿಶಾಲ್ ತೆರಿಪಾಯೆರ್.
ತುಲುನಾಡ್ದ ಏತೋ ಜನ ಪಿದಯೂರುಲೆಗ್ ಪೋದು ಅಲ್ಪ ನಿಲೆಯಾತೆರ್, ಪೆದ್ದಿನಕಲೆಗ್ ಬಾಸೆ ಬತ್ತ್ಂಡಲಾ ಜೋಕುಲೆಗ್ ಇತ್ತೆ ತುಳು ತೆರಿಯಂದಿನ ತೂದು ಎಂಕುಲು ಈ ಕಜ್ಜಕೂಟ ಮಲ್ಪರೆ ಪಿದಡ್ದ ಪನ್ದ್ ತುಳು ಭಾಷಾ ಕಲಿಕಾ ಸಮಿತಿದ ಮೇಲ್ವಿಚಾರಕೆರಾಯಿನ ಅನುಷಾ ಸಾಲ್ಯಾನ್ ತೆರಿಪಾಯೆರ್.
ಬೇತೆ ಬಾಸೆದ ಮಸ್ತ್ ಜನ ತುಳು ಕಲ್ಪಾವರೆ ಎಂಕ್ಲೆಡ ಕೇನೊಂದಿತ್ತೆರ್, ತುಳು ಬಾಸೆದ ಪೊರ್ಲು ಪಾತೆರಿಯರೆ ಸುರಪ ಮಲ್ತಿಬೊಕ್ಕನೇ ತೆರಿಯುನು. ಸದ್ಯೊಗು ಕನ್ನಡ ಬೊಕ್ಕ ಇಂಗ್ಲೀಷ್‌ಡ್ ಕ್ಲಾಸ್ ಸುರು ಮಲ್ಪುವ ದುಂಬಗ್ ಹಿಂದಿಡ್ ಮಲ್ಪುವ ಪನ್ದ್ ತುಳು ಭಾಷಾ ಕಲಿಕಾ ಸಮಿತಿದ ಮೇಲ್ವಿಚಾರಕೆರಾಯಿನ ಜಯಪ್ರಸಾದ್ ತುಳುನಾಡ್ ಮೇರ್ ತೆರಿಪಾಯೆರ್.