Last updated on February 1st, 2023 at 05:43 pm
ತುಳುನಾಡ್‌ದ ಗುಂಡೊಡು ಜೋಡು ನಂದಾದೀಪವಾದ್ ಬೆಳಗೊಂದಿಪ್ಪುನ
ತುಳುವ ಅಮರ್ ಬೊಳ್ಳಿಲೆನ ಕತೆ ‘ಕೋಟಿ ಚೆನ್ನಯ’ ಪನ್ಪಿನ ಪಿಚ್ಚರ್ ಆದ್ 2023ಗು 50 ವರ್ಸ ಆಪುಂಡು.
ಕಟಪಾಡಿದ ಮುದ್ದು ಸುವರ್ಣೆರ್ ನಿರ್ಮಾಣ ಮಲ್ತ್, ವಿಶು ಕುಮಾರ್ ನಿರ್ದೇಶನ ಮಲ್ತ್, ವಿಜಯಭಾಸ್ಕರೆರ್ ಸಂಗೀತ ಕೊರ್ದು, ಸುಭಾಶ್ಚಂದ್ರ ಪಡಿವಾಳೆರ್ ಕೋಟಿಯಾದ್ ವಾಮನರಾಜೆರ್ ಚೆನ್ನಯೆ ಆದ್, ಮೆನ್ಕುನ ಬೊಳ್ಳಿ ಕಲ್ಪನಾ ದೇಯಿಯಾದ್ ಕಿನ್ನಿದಾರುವಾದ್ ತುಳುವೆರೆ ಉಡಲ್‌ಡ್ ಅಚ್ಚಿ ಪಾಡಿಲೆಕ್ಕ ಕುಲ್ದಿನ ಈ ಪಿಚ್ಚರ್‌ನ್ ಏರ್ಲಾ ಮದಪಯೆರ್. 1973ನೇ ಇಸವಿಡ್ ತುಳುನಾಡೊರ್ಮೆ ಈ ಪಿಚ್ಚರ್ ಬುಡುಗಡೆ ಆದಿತ್ತ್ಂಡ್.
ಕೋಟಿ ಚೆನ್ನಯ ಪಿಚ್ಚರ್ದ ಪದೊಕುಲು ಇತ್ತೆಲ ಜನಕುಲೆನ ಬಾಯಿಡ್ ನಲ್ಪುಂಡು. ಬಿ.ಎ ವಿವೇಕ್ ರೈಕುಲು ಬರೆದ್ ಎಸ್ ಜಾನಕಿ ಪಾಟ್ದಿನ ‘ಎಕ್ಕ ಸಕ ಎಕ್ಕ ಸಕ’ ಆವಡ್, ಅಮೃತ ಸೋಮೇಶ್ವರೆರ್ ಬರೆದ್ ಪಿ.ಬಿ ಶ್ರೀನಿವಾಸೆರ್ ಪನ್ತಿನ ‘ಜೋಡು ನಂದಾದೀಪ ಬೆಳಗ್ಂಡ್’ ಆವಂಡ್, ಬೆರ್ಮೆರೆನ್ ಸುಗಿಪುನ ‘ಕೆಮ್ಮಲೆತ ಬ್ರಹ್ಮ’ ಆವಡ್ ಕೇನ್ನಗ ಇತ್ತೆಲ ಮೈ ಇರ್ಮನೆ ಆಪುಂಡು.
ಕಾರ್ಲದ ಬಾರಾಡಿ ಬೂಡುಡು, ಪಡ್ಡೆದ್ರಡ್, ಬೈಲೂರುಡು, ಸಾರ ಕುಂದದ ಬಸದಿಡ್ ಇಂಚ ತುಳುನಾಡೊರ್ಮೆ ಉಂದೆತ ಚಿತ್ರೀಕರಣ ಆತಿನೆನ್ ಇತ್ತೆಲಾ ಪೆರಿಯಾಕುಲು ನೆನೆತೊನುವೆರ್.
ಈ ಪಿಚ್ಚರ್ ಕುಡ್ಲದ ಜ್ಯೋತಿ ಟಾಕೀಸ್‌ಡ್ 150 ದಿನ ಬಲ್ದ್ಂಡ್, ಒಡಿಪುದ ಅಲಂಕಾರ್‌ಡ್ 125 ದಿನ, ಬೆದ್ರಡ್ ಬೊಕ್ಕ ಪುತ್ತೂರುಡು 75 ದಿನ, ಬೊಂಬಾಯಿಡ್ ಒಂಜಿ ತಿಂಗೊಲು ಬಲ್ತ್ ತುಳು ಚಿತ್ರರಂಗದ ಪರತಿರಿಟ್ ಒಂಜಿ ಇತಿಹಾಸ ಬರೆತ್ಂಡ್.
ಈ ಪಿಚ್ಚರ್‌ಡಿತ್ತಿನಕುಲು ಹೆಚ್ಚಿನಕುಲು ಇತ್ತೆ ನಮ್ಮೊಟ್ಟುಗು ಇಜ್ಜೆರ್, ಆಂಡ ತುಳು ಚಿತ್ರರಂಗ ಉಪ್ಪುನೇಟ ತುಳುವೆರ್ ಕೋಟಿ ಚೆನ್ನಯ ಪಿಚ್ಚರ್‌ನ್ ಅವೆತ ಪದೊಕುಲೆನ್ ನೆನೆತೊನುವೆರ್ ಪನ್ಪಿನ ಸತ್ಯ.