ಪುತ್ತೂರು ಬಿಜೆಪಿಡ್ ದಾದ ಆವೊಂದುಂಡು? ವಿವಾದೊಗು ನೆವನ ಆಯಿನ ಶಾಸಕೆರ್ನ ಪಾತೆರ!

Last updated on February 10th, 2023 at 04:23 pm

ಪುತ್ತೂರು ಶಾಸಕೆ ಸಂಜೀವ ಮಠಂದೂರು ಮೆರೆನ ಪಾತೆರ ಇತ್ತೆ ಮಲ್ಲ ವಿವಾದೊಗು ನೆವನ ಆತ್ಂಡ್. ಎಲ್ಲೆ ಅಮಿತ್ ಷಾ ಪುತ್ತೂರುಗು ಬರ್ಪಿನ ಪೊರ್ತುಡು ಈ ವಿವಾದ ನನಲಾತ್ ಮಲ್ಲ ಆಪಿನಲೆಕ್ಕ ತೋಜೊಂದುಂಡು.

ಕೇಂದ್ರ ಗೃಹ ಮಂತ್ರಿ ಅಮಿತ್ ಷಾ ಪುತ್ತೂರುಗು ಬರ್ಪಿನ ಬಗೆಟ್ ಪಾಡಿನ ಬ್ಯಾನರ್‌ದ ಲಡಯಿ ಇತ್ತೆ ಭಿನ್ನಮತೊಕು ತಿರ್ಗ್‌ದ್ಂಡ್. ಪುತ್ತೂರು ಪೇಂಟೆಡ್ ಅರುಣ್ ಕುಮಾರ್ ಪುತ್ತಿಲ ಮೆರೆನ ಬೆಂಬಲಿಗೆರ್ ಅಮಿತ್ ಷಾಗ್ ಸ್ವಾಗತ ಮಲ್ಪುನ ಬ್ಯಾನರ್ ಪಾಡ್ದಿತ್ತೆರ್. ಉಂದೆನ್ ಬರ್ಸೊಗು ಪುಟ್ಟುನ ಅಲಾಂಬುಲೆಕ್ಕ ಪನ್ದ್ ಶಾಸಕೆ ಸಂಜೀವೆರ್ ಟೀಕೆ ಮಲ್ದಿತ್ತೆರ್. ಉಂದು ಅರುಣ್ ಕುಮಾರ್ ಪುತ್ತಿಲ ಮೆರೆನ ಅಭಿಮಾನಿಲೆನ ಕಣ್ಣ್ ಕೆಂಪು ಮಲ್ದಿತ್ತ್ಂಡ್.

ಅಮಿತ್ ಷಾ ಬರ್ಪಿನ ನಿಲೆಟ್ ಪುತ್ತೂರುದ ಬೊಳುವಾರ್‌ಡ್ ಸಂಜೀವ ಮಠಂದೂರು, ಅರುಣ್ ಕುಮಾರ್ ಪುತ್ತಿಲ ಸೇರಿನಂಚೆನೆ ಬೇತೆ ನಾಯಕೆರ್ ಪೂರಾ ಲೆಪ್ಪೋಲೆ ಪಟ್ಟುನ ಜಾಥಾ ಮಲ್ತೊಂದಿಪ್ಪುನಗ ಕುಡ ಕಾರ್ಯಕರ್ತೆರ್ನ ನಡುಟು ಲಡಯಿ ಆಂಡ್. ಅರುಣ್ ಕುಮಾರ್ ಬೆಂಬಲಿಗೆರ್ ಶಾಸಕೆರೆಗ್ ಮುತ್ತಿಗೆ ಪಾಡ್ದ್ ಈರ್ ಪಂಡಿನ ಪಾತೆರೊಗು ಮಾಪು ಕೇನೊಡು ಪನ್ದ್ ಪಂಡೆರ್.

ಕರಿನ ಸಲ ಅರುಣ್ ಕುಮಾರ್ ಪುತ್ತಿಲೆರೆಗ್ ಟಿಕೆಟ್ ಕೊರೊಡು ಪನ್ದ್ ಬೆಂಬಲಿಗೆರ್ ಕೇನ್ದಿತ್ತೆರ್ ಆಂಡ ಅವ್ ಕೈ ತತ್ತ್ ಪೋದಿತ್ತ್ಂಡ್. ಇತ್ತೆ ಕುಡ ಈ ಸಲ ಬೆಂಬಲಿಗೆರ್ ಜೋರುಡೇ ಅಭಿಯಾನ ಮಲ್ತೊಂದುಲ್ಲೆರ್.