Last updated on March 29th, 2023 at 02:27 pm
ಕುಡ್ಲ: ಭಾರತೀಯ ರೈಲ್ವೆ ತುಳುನಾಡ ಜನೊಕ್ಲೆನ ಮಸ್ತ್ ದಿನೊತ ಬಿನ್ನಪುನು ಈಡೆತ್ತಾದ್ ಕೊರ್ತುಂಡು. ರಾಜಧಾನಿ ಬೆಂಗ್ಳೂರ್ ಬೊಕ್ಕ ಕುಡ್ಲದ ನಡುಟು ಸಂಚಾರ ಮನ್ಪುನ ಜನೊಕುಲು ಮಸ್ತ್ ದಿನೊರ್ದಿಂಚಿ ರೈಲ್‌ದ ವೇಳಾಪಟ್ಟಿ ಪಗಪೊಡು ಪಂದ್ ಬಿನ್ನಪು ದೀದಿತ್ತೆರ್. ಇತ್ತೆ ನೆಕ್ಕ್ ಇಲಾಖೆ ಒತ್ತೊಂದಿನೆಕ್ ಸೌತ್ ಕೆನರಾ ಜಿಲ್ಲಾ ರೈಲ್ ಯಾತ್ರಿಕೆರೆ ಸಂಘ ಇಲಾಖೆಗ್ ಸೊಲ್ಮೆ ಸಂದಾದ್ಂಡ್.
ಕರ್ನಾಟಕೊದ ಮಲ್ಲ ನಗರೊಲಾದುಪ್ಪುನ ಬೆಂಗ್ಳೂರ್ ಕುಡ್ಲಲೆನ ನಡುಟು ಮಸ್ತ್ ಜನ ಪೋವೊಂದು ಬರೊಂದು ಇಪ್ಪುವೆರ್‌. ವೈವಾಟ್, ಶೈಕ್ಷಣಿಕ, ಕಸುಬು ಇಂಚ ಮಸ್ತ್ ಇಸಯೊಲೆಗ್ ಜನೊಕುಲು ಈ ರಡ್ಡ್ ನಗರೊಲೆನ ಮಿತ್ತ್ ತಾಂಗ್‌ದುಲ್ಲೆರ್. ಆಂಡ, ಪೆರ್ಸಾದಿದ ಬೇಲೆ ಆವೊಂದಿಪ್ಪುನೆರ್ದಾವರ ಎಚ್ಚಿನಕುಲೆಗ್ ಮಸ್ತ್ ಬಙ್ಙ ಆವೊಂದಿತ್ತ್ಂಡ್. ಅಂಚಾದ್ ಈ ತಾದಿಯೆ ಪೋಪಿನಕುಲು ರೈಲ್‌ಡ್ ಪೋಪುನವೇ ಎಡ್ಡೆ ಪಂದ್ ರೈಲ್‌ದಂಚಿ ಮೋನೆ ಪಾಡೊಂದುಲ್ಲೆರ್.
ಕುಡ್ಲ ಜಿಲ್ಲೆಡ್ ಧರ್ಮಸ್ಥಳ, ಕುಕ್ಕೆ- ಕುಡುಮ ಇಂಚ ಮಸ್ತ್ ಧಾರ್ಮಿಕ ಕ್ಷೇತ್ರೊಲುಲ್ಲ. ಬೆಂಗ್ಳೂರ್ ಸೇರ್ದ್ ಬೇತೆ ಬೇತೆ ಜಿಲ್ಲೆಲೆರ್ದ್ ಸಾರಗಟ್ಲೆ ಜನ ಇಂಚಿ ಬರ್ಪೆರ್. ಮೊಕಲೆಗ್ ಮಾತ ಅನುಕೂಲ ಆಪಿನಂಚ ಪಗೆಲ್‌ಡ್ ಟ್ರೈನ್ ನಂಬರ್ 16575/16576 ಕುಡ್ಲ ಜಂಕ್ಷನ್-ಯಶವಂತಪುರ ಜಂಕ್ಷನ್ ನಡುಟು ಗೋಮ್ಮಟೇಶ್ವರ ಎಕ್ಸ್‌ಪ್ರೆಸ್ ರೈಲ್ ಸುರು ಮಲ್ದಿತ್ತ್ಂಡ್. ಕುಡ್ಲರ್ದ್ ಕಾಂಡೆ 11.30ಕ್ ಪಿದಡ್ದ್ ಬೆಂಗ್ಳೂರ್‌ದ ಯಶವಂತಪುರ ರೈಲ್ ಉಂತಡೆಗ್ ರಾತ್ರೆ 8.45ಕ್ಕ್ ಎತ್ತೊಂದಿತ್ತ್ಂಡ್. ಈ ರೈಲ್‌ದ ಪೊರ್ತುನು ಪಗಪೊಡು ಪಂದ್ ಮಸ್ತ್ ಜನ ಬಿನ್ನಪು ದೀದಿತ್ತೆರ್.
ರೈಲ್ವೆ ಇಲಾಖೆ ಒತ್ತೊಂದು ಇತ್ತೆ ನೈಋತ್ಯ ರೈಲ್ವೆ ಕುಡ್ಲ-ಯಶವಂತಪುರ ವಾರೊದ ಎಕ್ಸ್‌ಪ್ರೆಸ್ ರೈಲ್‌ದ ವೇಳಾಪಟ್ಟಿನ್ ಪಗತ್‌ದ್ ಆದೇಶ ಕೊರ್ತುಂಡು. ಜುಲೈ 16ರ್ದ್ ಅನ್ವಯ ಆಪಿಲೆಕ ರೈಲ್ ಪೊಸ ವೇಳಾಪಟ್ಟಿದ ಪ್ರಕಾರ ಬಲ್ಪುಂಡು ಪಂದ್ ಆದೇಶೊಡು ತೆರಿಪಾದೆರ್. ರೈಲ್ ಸಂಖ್ಯೆ 16540 ಐತಾರ ಕಾಂಡೆ 7 ಗಂಟೆಗ್ ಕುಡ್ಲ ಜಂಕ್ಷನ್‌ರ್ದ್ ಪಿದಡ್ದ್ ಯಶವಂತಪುರಗ್ ಬಯ್ಯ 4.30ಕ್ಕ್ ಎತ್ತುಂಡು.
ವಾರೊದ ಮೂಜಿ ದಿನ ಬಲ್ಪುನ ಗೋಮ್ಮಟೇಶ್ವರ ಎಕ್ಸ್‌ಪ್ರೆಸ್ ಕುಡ್ಲರ್ದ್ ಮಧ್ಯಾಹ್ನ ಪಿದಡ್ದ್ ಬೆಂಗ್ಳೂರ್‌ಗ್ ರಾತ್ರೆ ಎತ್ತುನೆರ್ದಾವರ ಅಲ್ಪರ್ದ್ ದುಂಬು ತನ್ಕುಲೆ ಜಾಗೆಲೆಗ್ ಆವೊಂದುಂಡು. ಅಂಚೆನೇ ವಾರೊಡೊಂಜಿ ದಿನ ಬಲ್ಪುನ ಕುಡ್ಲ-ಯಶವಂತಪುರ ರೈಲ್‌ಲಾ ಬೆಂಗ್ಳೂರ್ ಎತ್ತ್‌ನಗ ರಾತ್ರೆ 8:20 ಕರಿಪುಂಡು. ಅಂಚಾದ್ ಈ ರಡ್ಡ್ ರೈಲ್‌ಲೆನ್ಲಾ ಕಾಂಡೆ ಬೇಗ ಪಿದಡ್ಪಾದ್ ಬಯ್ಯಾನಗ ಎತ್ತುಲೆಕ ಮನ್ಪೊಡು ಪನ್ಪಿ ಬಿನ್ನಪು ಇಲಾಖೆದ ದುಂಬಿತ್ತ್ಂಡ್.