Last updated on April 15th, 2023 at 08:11 pm
ಚುಟೀತ್ತ ದೊಂಬುಡು ಪಿದಯಿ ಕಾರ್ ದೀಯರೆಗಾಯಿಜಿಡಲಾ ಪಸಂದ್ರಡ್ ಮಾತ್ರ ಪುರ್ಪೊ ಪೋದು ಫಲ ಕೊರ್ಪಿ ಕಾಲ. ಅಂದ್ ಕೆಡ್ಡಸದಾನಿ ಮದಿಮಾಲಾಯಿನ ತುಲುಅಪ್ಪೆ ಪಗ್ಗುಡು ಫಲ ಕೊರ್ಪಲ್ ಪಂದ್ ಪೆರಿಯಾಕ್ಲೆನ ನಂಬೋಲ್ಗೆ. ಪಸಂದ್ರಡ್ ನಡಪುನ ಈ ಸೋಜಿಗನೇ ಪೊಸ ಓಡುದ ಗಾಲಿ ಬೀಜೊಂದುಂಡು ಪಂದ್ ತೋಜಾವುಂಡು. ಪೊರ್ತು ಪಜ್ಜೆ ಪಗತಿನಾನಿ ನಮಕ್ಕ್ ಪೊಸ ಓಡು ಸುರು ಪಂಡ ಪಗ್ಗುಡು ಒಂಜಿ ಪೋಪಿನಾನಿ. ನಮ್ಮ ಪೆರಿಯಾಕುಲು ಈ ದಿನೊನು ಬಿಸು ಪಂದ್ ಲೆತ್ತೆರ್, ಅಂಚಾದ್ ಪಗ್ಗು ತುಲುವೆರೆಗ್ ಸುರುತ್ತ ತಿಂಗೊಲು. ಬಿಸುತ್ತಾನಿ ಕಣಿ ದೀದ್ ಪೊಸ ಓಡುನು ಎದುಕೊನ್ನ ಕಟ್ಲೆ ತುಲುವೆರ್ನೊ. ಸುಗ್ಗಿ ಪೋಪಿ ಸಂಕ್ರಾಂದಿದಾನಿದ ಇರ್ಲ್‌ಡ್ ದೈವೊದ ಮಂಚಾವುದೆದುರು ಕೊಡಿ ಇರಿಟ್ಟ್ ಇಲ್ಲ ಬಿತ್ತ್‌ಲ್ಡ್ ಬುಲೆಪಿನ ಕಾಯಿಕೈಪು, ಗೋಂಕು, ಕುಕ್ಕು, ಗುಜ್ಜೆನ್ ಕೊಡಿ ಇರೆಟ್ಟ್ ದೀದ್ ನಡುಟ್ಟು ಕನ್ನಡಿ ದೀವೊಂತೆರ್. ಮನದಾನಿ ಪುಲ್ಯ ಕಾಂಡೆ ಇಲ್ಲಡಿಪ್ಪಿ ಜೋಕುಲೆನ ಕನ್ನ್‌ಗ್ ಕೈ ಪತ್ತೊಂದು ಬಿಸುಕಣಿತ್ತಡೆ ಲೆತೊಂದುಬತ್ತ್ ಕಣಿನ್ ತೋಜಾದ್ ಕನ್ನ್ ದಿಂಜಾವೊಂತೆರ್. ಈಯೋಡುಲಾ ಪೊಲಿದಿಂಜಡ್ ಎಡ್ಡೆಡ್ ಬುಲೆಸೆಲೆಯಾವಡ್ ಪಂದ್ ದೈವ ದೇಬೆರ್ಡ ನಟ್ಟೊಂತೆರ್,ಲತ್ತ್ ಬೀಜೊದ ಬೊಂಡು ದೆತ್ತ್ ಮಲ್ಪುನ ಪರಮ್ಮಾನ್ನ ಬಿಸುತ್ತಾನಿದ ಅಟೀಲ್ದ ಇಸೇಸ.
ಒಕ್ಕೆಲ್ಡ್ ಇತ್ತಿನಾಯಗ್ ಈಯೋಡು ಬಾಕಿ ಇಪ್ಪುನ ಗೇಣಿನ್ ಕೊರ್ದು ಬಿಸುತ್ತಾನಿ ಬರ್ಪಿ ಓಡುಗ್ಲಾ ಬೆನರೆ ಕಂಡ ಕೊರ್ಲೆ ಅಂದ್ ಕೇನೊನುನ ಪೊರ್ತು, ಕಾಲಿ ಕೈಟ್ಟ್ ಪೋಂಡ ಆಪುಂಡ ಇಜ್ಜಿ ಐಕ್ಕಾದೇ ಇಲ್ಲಡ್ ಆಯಿನ ಕಾಯಿ ಕೈಪನು ಜಾಗೆದ ಗುರ್ಕಾರ್ಲೆಗ್ ಮುಟ್ಟಾದ್ ಕೇನೊಡಾಯಿನೆನ್ ಕೇನೊಂತೆರ್. ಆಪುಜಿಂದ್ ಪನಂದೆ ಕುಸಿಟ್ಟ್ ಗುರ್ಕಾರ್ಲು ಬೆನ್ನಿ ಬೆನರೆ ಕಂಡ ಬುರ್ದು ಕೊರ್ತಿನವೇ ದಿಂಜ. ಬಿಸುತ್ತಾನಿ ಮುರ್ತ ಮಲ್ತ್ಂಡ ಬೇತೆ ದಿನ ಕೇನುನ ಬೊರ್ಚಿಗೆ ಅಂದ್ ಬೆನ್ನಿದಾಯೆ ನುಗ ನಾಯೆರ್ಗ್ ಕೈ ಮುಗಿದ್ ಬಿಸುತ್ತಾನಿ ಬೇಲೆ ಸುರು ಮಲ್ಪುನ ಕಟ್ಟ್ ಪಿರಾಕ್‌ರ್ದೇ ಬೈದಿನ. ದೈವೊಲೆಗ್ ಬಿಸುತ್ತ ಪರ್ವ, ನೇಮ ಆಪಿನ ಕಟ್ಲೆ ಕೆಲವು ಕಡೆಟ್ಟ್ ಉಲ್ಲ, ಬಿಸುತ್ತಾನಿ ಮಾತ ಜವನೆರ್ ಸೇರ್ದ್ ತಾರಯಿ ಕುಟ್ಟುನ ಗೊಬ್ಬು ಗೊಬ್ಬೊಂತೆರ್, ಪುಡಯಿನ ಒಟ್ಟೆ ತಾರಾಯಿನಿ ದಾಲಾವಂದಿ ಬಂಟತಾರಯಿದ ಗುರ್ಕಾರ್ಲೆಗ್ ಕೊರ್ಪೆರ್ . ಇಂಚ ಬಿಸು ತುಲುವೆರೆಗ್ ಬೆನ್ನಿಡ್, ನರಮಾನಿ ಬದ್ಕ್ಡ್ ಪಸಂದ್ರಡ್ ಪೊಸ ದೇಕಿನ್ ದಿಂಜಾವುನ ಪರ್ಬೊ, ಮಾತೆರ್ನಲ ಬಾಯಿಡ್ ಮುನ್ನೊಡುರ್ದ್ ಈಯೋಡು ಬದ್ಕ್ಡ್ ಎಡ್ಡೆ ಬುಲೆಚ್ಚಿಲ್ ತೋಜಿಂಡ್ ಪಂದ್ ಪನ್ಪುನಂಚಾವಡ್.