Last updated on April 1st, 2023 at 09:03 pm
ಕಯ್ಯಾರ ಕಿಞ್ಞಣ್ಣ ರೈಕುಲೆನ ಪೆರಡಾಲದ ಇಲ್ಲಡ್ 1994ನೇ ಇಸವಿಡ್ ಎಸ್.ಎಚ್.ಜಿ ಮೇರ್ ಮಲ್ದಿನ ಸಂದರ್ಶೊನೊಡು ರೈಕುಲೆನ ತುಳು ರಾಜ್ಯದ ಕನತ ಬಗೆಟ್ ನಮಕ್ ತೆರಿದ್ ಬತ್ತ್ಂಡ್. ಅವೆತ ಕೆಲವು ಭಾಗೊಲೆನ್ ನಿಕಲೆನ ಎದುರು ದೀವೊಂದುಲ್ಲ.
ತುಳು ಭಾಷೆದ ಬಗೆಟ್ :
ಕರ್ನಾಟಕ ಏಕೀಕರಣದ ಪೊರ್ಮ್ಬು ಕಾಸ್ರೋಡುಡು ಯಾಪ ಸುರು ಆಯಿನಿ ಪನ್ದ್ ಕೇನಿನೆಕ್ಕ್ ಉತ್ತರ ಕೊರಿನ ರೈಕುಲು, ಕಾಸ್ರೋಡುಡು ಸುರುಟು ನಡತಿನಿ ತುಳುಕಾದ್ ಪೊರುಂಬಾಟ. ತುಳು ಎಂಕ್ಲೆಗ್ ಕನ್ನಡೊರ್ದು ಕೈತಲ್. ತುಳು ಸಂಸ್ಕೃತಿ ಮನುಷ್ಯ ಮೂಲ ಸಂಸ್ಕೃತಿಗ್ ಕೈತಲ್ ಆಯಿನವು. ಮುಲ್ಪದ ಜನಕುಲೆಗ್ ಸುಲಭೊಡು ತೆರಿಯುನವು ತುಳು ಭಾಷೆ. ಕನ್ನಡ ಏತ್ ಪಂಡಲ ಕಲ್ದಿನ ಭಾಷೆ. ಮುಲ್ಪದ ಜನಕ್ಲೆನ ಸಂಪರ್ಕ ಮಲ್ಪರೆ ತುಳು ಭಾಷೆನೇ ಉತ್ತಮ. ತುಳು ಸಂಸ್ಕೃತಿ ಕನ್ನಡ ಸಂಸ್ಕೃತಿರ್ದ್ ಕಮ್ಮಿದ ಅತ್ತ್. ತುಳು ಬರ್ಪಿನಾತ್ ಆತ್ಮೀಯವಾದ್ ಕನ್ನಡ ಬರ್ಪುಜಿ ಪನ್ದ್ ಪಂಡೆರ್. ಸುರು ಸುರುಟು ಜಿನರಾಜ್ ಹೆಗ್ಗಡೆರ್ ಕರ್ನಾಟಕೊರ್ದು ಜಾಸ್ತಿ ಪಣಿಯಾಡಿಯೆರ್ನ ತುಳು ಚಳುವಳಿಗ್ ಬೆರಿಬಲ ಕೊರೊಂದಿತ್ತೆರ್. ಗೋವಿಂದ ಪೈಕುಲುಲಾ ತುಳು ಇತಿಹಾಸದ ಬಗೆಟೇ ದಿಂಜ ಬರೆತಿನಿ. ಪಂಜೆ ಮಂಗೇಶರಾವ್, ಎಂ.ಎನ್ ಕಾಮತೆರೆಗ್ಲಾ ತುಳುತ ಬಗೆಟ್ ವಿಶೇಷ ಅಭಿಮಾನ ಇತ್ತ್ಂಡ್. ಆಂಡ ಯಾಪ ಪಣಿಯಾಡಿಯೆರ್ನ ಬಿಸಿನೆಸ್ ಸೋತು ಒಡಿಪು ಬುಡ್ದ್ ಪೋಯೆರಾ ಅಪಗ ತುಳು ಚಳುವಳಿಲಾ ಸೋತುಂಡು. ತುಳು ಚಳುವಳಿ ಫೇಲ್ ಆಯಿನೇ ಕೆ.ಆರ್ ಕಾರಂತೆರ್ ಕರ್ನಾಟಕ ಏಕೀಕರಣ ಚಳುವಳಿಗ್ ಜತ್ತೆರ್. ಜಿನರಾಜ ಹೆಗ್ಗಡೆರ್ಲಾ ಅರೆನ್ ಗೋಡ್ಯೊಂಡೆರ್. ಆ ಪೊರ್ತುಡು ಕುಡ ರಡ್ಡ್ ನಾಯಕೆರಿತ್ತೆರ್. ಎ.ಬಿ ಶೆಟ್ಟಿ ಬೊಕ್ಕ ಶ್ರೀನಿವಾಸ ಮಲ್ಯೆರ್. ಮಲ್ಯೆರೆಗ್ ಕರ್ನಾಟಕ ಏಕೀಕರಣದ ಬಗೆಟ್ ಆಸಕ್ತಿ ಇತ್ತಿಜಿ. ಆಂಡ ಕಾರಂತೆರ್ ತುಳುನಾಡ್ ಕರ್ನಾಟಕೊಗು ಸೇರೊಡು ಪನ್ಪಿನೆಟ್ಟ್ ಸುರುಟಿತ್ತೆರ್. ತುಳು ಎಂಕ್ಲೆನ ಮಾತೃ ಭಾಷೆ ತುಳು ಎಂಕ್ಲೆನ ಅಪ್ಪೆ.ಎಂಕುಲು ಈ ಪೊರ್ತು ಉಪ್ಪು ತಿನ್ಪಿನಿ ಕುಡ್ಲದ, ಮುಂಚಿ ಪಾಡುನು ಕುಡ್ಲದ, ಅರಿ ಎಂಕ್ಲೆಗ್ ಕುಡ್ಲರ್ದೇ ಬರೊಡು, ಎಂಕ್ಲೆನ ಬೇರೊಲೆಗ್ ಕುಡ್ಲನೇ ಗತಿ ಇಂಚ ಉಪ್ಪುನಗ ವಾ ಸೌಕರ್ಯೊಗು ಕಾಸ್ರೊಡುನು ಕೇರಳೊಗು ಗೋಡ್ಯಾಯಿನಿ? ತುಳುನಾಡ್ ನ್ ಬೇತೆನೆ ಜಿಲ್ಲೆ ಮಲ್ಪೊಡು, ಬೊಕ್ಕ ತುಳುವೆರೆನ ಒಪ್ಪಿಗೆದ ಲೆಕ್ಕ ಕೇರಳ ಇಜಿಂಡ ಕರ್ನಾಟಕೊಗು ಗೋಡ್ಯಾವೊಡು. ತುಳುವೆರ್ ಒಟ್ಟುಗು ಒಂಜೇ ಜಿಲ್ಲೆಡ್ ಉಪ್ಪೊಡು. ಎನ್ನ ಕಡೆಮುಟ್ಟಲಾ ಕಾಸ್ರೊಡುನು ಕುಡ್ಲಗ್ ಗೋಡ್ಯಾವುನ ಪೊರುಂಬಾಟ ಬುಡ್ಪುಜಿ. ಈ ವಿಷಯೊಡು ತುಳುವೆರ್ ಎನ್ನ ಒಟ್ಟುಗು ಉಲ್ಲೆರ್.
ಆಂಡ ರೈಕುಲೆನ ಕನ ಕನ ಆದೇ ಒರಿಂಡ್.