Last updated on May 9th, 2023 at 04:54 pm
ತೆಲಂಗಾಣ ರಾಜ್ಯೊಡು ಬೂರ್ದು ಪೆಟ್ಟಾತಿನ ಒಂಜಿ ಬಾಲೆದ ಗಡಿನ್ ಪೊಲ್ಲುನ ಪಗತೆಗ್ ಫೆವಿಕ್ವಿಕ್ ಫಾಸ್ಟ್ ಗಮ್ ಪಾಡ್ದ್ ಅಂಟಾದಿನ ನಡಕೆ ನಡತ್‌ದ್ಂಡ್.
ತೆಲಂಗಾಣ ರಾಜ್ಯೊದ ಜೋಕುಳಂಬಾ ಗದ್ವಾಲ್ ಜಿಲ್ಲೆದ ಆಲಂಪುರ್ ಪೇಂಟೆದ ವಂಶಿಕೃಷ್ಣೆ ಪನ್ಪಿನಾರೆನ ಮಗೆ ಪ್ರವೀಣ್ ಡಂಕ್‌ದ್ ಬೂರ್ದ್ ಮುಂಡೊಡು ಗಡಿ ಆದಿತ್ತ್ಂಡ್.
ಅಂಚಾದ್, ವಂಶಿಕೃಷ್ಣೆರ್ ಮಗನ್ ಮರ್ದ್‌ಗ್ ಅಲ್ಪದ ರೇನ್ ಬೋ ಆಸ್ಪತ್ರೆಗ್ ಲೆತೊಂದುಪೋತೆರ್. ಗಡಿನ್ ಪೊಲ್ಲುದ್ ಮರ್ದ್ ಕೊರ್ಪಿನ ಬುಡ್ದ್ ಕರ್ತವ್ಯೊಡಿತ್ತಿನ ಬೈದ್ಯೆ ನಾಗಾರ್ಜುನ್ ಬೊಕ್ಕ ಸಿಬ್ಬಂದಿಲು ಫೆವಿಕ್ವಿಕ್ ಫಾಸ್ಟ್ ಗಮ್‌ಡ್ ಅಂಟಾದ್ ಕಗಪುಡ್ದೆರ್.
ಗಡಿ ಸಮ ಕೂಡಂದೆ ಇತ್ತಿನೆರ್ದಾವರ ಸಂಶಯೊಡು ವಂಶಿಕೃಷ್ಣೆರ್ ಮಗನ್ ಕುಡೊರಿ ಬೈದ್ಯೆರ್ನಡೆ ಲೆತೊಂದು ಪೋತೆರ್. ಅಲ್ಪ ಪರೀಕ್ಷೆ ಮಲ್ತ್‌ದಾನಗ ಗೋಂದೂಡು ಅಂಟಾದಿನ ತೆರಿದ್‌ಬೈದ್ಂಡ್. ಇತ್ತೆ ಬೋಡಾಪಿನ ಮರ್ದ್ ಮಲ್ತ್‌ದ್ ಗಮ್‌ನ್ ಬುಡ್ಪಾದೆರ್.
ರೇನ್ ಬೋ ಆಸ್ಪತ್ರೆದ ಬೈದ್ಯೆ ನಾಗಾರ್ಜುನ್ ಬೊಕ್ಕ ಸಿಬ್ಬಂದಿಲೆಡ ಪಿರ ಪೋದು ಈ ಇಸಮದ ಬಗ್ಗೆ ಕೇನ್ನಗ ಆ ಪೊರ್ತುಡು ಕರೆಂಟ್ ದಾಂತಿನೆರ್ದಾವರ ಇಂಚ ಆತ್ಂಡ್ ಪಂದ್ ಪನ್ತೆರ್.
ವಂಶಿಕೃಷ್ಣೆರ್ ಕೊರ್ತಿನ ಒಯಿಲ್‌ದ ಪ್ರಕಾರ ಆಸ್ಪತ್ರೆ‌ನ್ ಬಂದ್ ಮಲ್ತ್‌ದೆರ್. ಎಚ್ಚಿನ ಜಡ್ತೆ ನಡಪರೆಗುಂಡು.