Last updated on May 9th, 2023 at 07:45 pm
ಕುಡ್ಲ: ಮೀನ್‌ದ ವೈವಾಟ್‌ದ ಎಕ್ಸ್ಪೋರ್ಟ್ ಕ್ಷೇತ್ರೊಡು ಮಲ್ಲ ಪುದರ್ ಮದಿಮಾಲ್ ಮೀನ್‌ದವು. ಆಂಡ ಇತ್ತೆ ಕೆಲ ದಿನೊರ್ದು ವಿದೇಶೊಗು ಪೋವಂದೇ ಮೂಲೇ ಒರಿದ್‌ಪೋತುಂಡು. ಬೇಡಿಕೆ ಇಜ್ಜಂದಿನೆರ್ದಾವರ ಮೀನ್‌ದ ಕ್ರಯಲಾ ಶೇಕಡ 60ದಾತ್ ಕಡಮ್ಮೆ ಆತ್ಂಡ್. ಅವೆರ್ದಾವರ, ಮೀನ್ಗಾರಿಕೆಲಾ ಎಚ್ಚಿನ ಪಾಲ್ ಉಂತೊಂದು ಬೈದ್ಂಡ್. ಬೋಟ್ ದನಿಕುಲು ನಷ್ಟ ಲೆಕ್ಕ ಮನ್ಪುನ ಪರಿಸ್ಥಿತಿ ಎದುರಾತ್ಂಡ್.
ಇಂಗ್ಲಿಷ್‌ಡ್ Pink Perch ಅತ್ತ್ಂಡ Japanese threadfin bream ಪಂದ್ ಲೆಪ್ಪುನ ಈ ಮೀನ್‌ದ ಮಾಸೊನು ಬೇತೆ ಮಲ್ತ್‌ದ್ ಎಟ್ಟಿ, ಡೆಂಜಿನ್ ಕಟ್ಟ್ ಮಲ್ತಿಲೆಕ ಕಟ್ಟ್ ಕಟ್ಟ್‌ದ್ ಪಿದಯಿ ದೇಶೊಗು ಕಡಪುಡ್ದ್ ಕೊರ್ಪೆರ್. ಈ ಮೀನ್ ಊರ್‌ಡ್ ತಿರ್ಗುನೆರ್ದ್ ಎಕ್ಸ್ಪೋರ್ಟ್ ಆಪಿನವೇ ಜಾಸ್ತಿ.
ಇತ್ತೆ ಕೆಲ ದಿನೊರ್ದಿಂಚಿ ಮದಿಮಲ್ ಮೀನ್‌ದ ಎಕ್ಸ್ಪೋರ್ಟ್ ಕಡಮ್ಮೆ ಆತ್ಂಡ್. ಇಂಚ ದಾಯೆ ಆಂಡ್ ಪಂದ್ ಸಮ ಉತ್ತರ ಏರೆಡಲಾ ಇಜ್ಜಿ.
ಕುಡ್ಲ ಪೇಂಟೆಡ್ ನೀರ್‌ದ ಎತ್ವಾರ ಇಪ್ಪುನೆರ್ದಾವರ ಕೈಗಾರಿಕೆಗ್ ನೀರ್ ಪೋವೊಂದಿಜ್ಜಿ. ಅಂಚಾದ್, ಮೀನ್ ಸಜ್ಜಿ ಮಲ್ತ್‌ದ್ ಕಟ್ಟ್ ಮಲ್ಪೆರ ಬಂಙ ಆವೊಂದುಂಡು.ಈ ನೆವನೊರ್ದು ಮದಿಮಾಲ್ ಮೀನ್ ಗೆತೊನುನೆನ್ ಉಂತಾದ ಪಂದ್ ಏಜೆಂಟೆರ್ ಪನ್ಪೆರ್. ಆಂಡ, ಒತ್ತೊನೆರೆ ಆವಂದ್. ಟ್ಯಾಂಕರ್ ನೀರ್ ಗಲಸೆರೆ ಅವಕಾಶ ಕೊರ್ತುಂಡು. ಉ್ಂದೆಕಾಪಿನ ಕರ್ಚಿನ್ ಮೀನ್‌ದ ಕ್ರಯಟ್ ಸಮ ಮಲ್ತೊನೊಲಿ. ಆಂಡ, ಕೆ.ಜಿಗ್ ₹370 ರ್ದ್ ಒರಾನೆ ₹130ಗ್ ಜಪುಡಾವುನ ಅಗತ್ಯ ದಾದ ಇತ್ತ್ಂಡ್? ಪಂದ್ ಚೇತನ ಬೆಂಜ್ ಬೋಟ್ ಮಾಲೀಕೆರೆ ಸಂಘೊದ ಗುರ್ಕಾರ್ಲು ಪ್ರಶ್ನೆ ಮಲ್ತೊಂದುಲ್ಲೆರ್.
ಮೀನ್‌ದ ವೈವಾಟ್‌ದ ಬೋಟ್‌ಲೆನ ದನಿಕ್ಲೆಗ್ ಜಾಸ್ತಿ ಲಾಭ ಕನತ್ ಕೊರ್ಪುನ ಮೀನ್ ಈ ಮದಿಮಾಲ್. 10-12 ದಿನೊತ ಒಂಜಿ ಸುತ್ತು ಬತ್ತ್ಂಡ 6ರ್ದ್ 7 ಟನ್ ಮೀನ್ ಬಲೆಕ್ ಬೂರ್ಂಡ ಸುಮಾರ್ 7 ಲಕ್ಷೊರ್ದು 18 ಲಕ್ಷ ರೂಪಾಯಿ ಮುಟ್ಟ ಆದಾಯ ಬರ್ಪೆದ್ಂಡ್. ಅರೆಗ್ಗಾಲೊಡು ಮೀನ್‌ಲು ನನಲಾತ್ ಗಂತ್‌ಗ್ ಜಪ್ಪುನೆರ್ದಾವರ ತಿಕ್ಕುನಲಾ ಕಮ್ಮಿ ಆಪುಂಡು. ಇತ್ತೆ ರೇಟ್‌ಲಾ ಜತ್ತಿನೆರ್ದಾವರ ಎಚ್ಚಿನ ಬೋಟುಲು ಡಕ್ಕೆಡೆ ಉಂತುದ.
‘ಈ ವರ್ಸೊದ ಸುರುರ್ದೇ ಕ್ರಯ ಕಮ್ಮಿ ಆವೊಂದು ಬತ್ತ್‌ದ್ಂಡ್. ಸಬ್ಸಿಡಿ ಇತ್ತ್ಂಡಲಾ ಬೋಟ್‌‌ಲೆಗ್ ಡೀಸೆಲ್ ಪಾಡೆರೆ ಮಲ್ಲ ಅಮೌಂಟ್ ಬೋಡಾಪುಂಡು. ಬೇಲೆದಕ್ಲೆಗ್ ಮಜಿರಿ, ಬೋಟ್‌ದ ಬೇಲೆ ಇಂಚಿನೆಕ್ಲಾ ಕಾಸ್ ದೀವೊಡಾಪುಂಡು. ಅಂಚಾದ್, ಮೀನ್‌ಗ್ ಎನ್ನಿನಾತ್ ಕ್ರಯ ತಿಕ್ಕಿಜಿಂಡ ಮಲ್ತಿ ಬೇಲೆ ನೀರ್‌ಡ್ ಹೋಮ ದೀಲೆಕ್ಕ ಆಪುಂಡು. ಅಂಚಾದ್ ಬೋಟ್‌‌ಲ್ ಪಡ್ಡಾಯಿ ಜತ್ತೊಂದಿಜ್ಜ’ ಪಂದ್ ಟ್ರಾಲ್ ಬೋಟ್ ಮಾಲೀಕೆರೆ ಸಂಘೊದ ಕಾರ್ಯಂತೆರ್ ರಾಜೇಶ್ ಪುತ್ರನ್‌ ಪಂಡೆರ್.
ಕೊರಿಯಾ, ಚೀನಾ ಬೊಕ್ಕ ಯುರೋಪ್ ರಾಷ್ಟ್ರೊಲೆಗ್ ಈ ಮದಿಮಾಲ್ ಮೀನ್ ಜಾಸ್ತಿ ಎಕ್ಸ್ಪೋರ್ಟ್ ಆಪುಂಡು. ಈ ಸರ್ತಿ ವಿದೇಶೊರ್ದು ಬೇಡಿಕೆ ಕಮ್ಮಿಯಾತ್ಂಡ್. ಅಂಚಾದ್ ವೈವಾಟ್‌ಲಾ ತಿರ್ತ್ ಪೋತುಂಡು ಪಂದ್ ಸಾಗರೋತ್ಪನ್ನ ಖರೀದಿದಾರೆರೆ ಸಂಘೊದ ಅಧ್ಯಕ್ಷೆ ಇಬ್ರಾಹಿಂ ಎಸ್‌.ಎಂ. ಪಂಡೆರ್.
ಬರ್ಪಿ ಸೀಸನ್ ಮುಟ್ಟ ಕಾಪೊಡು
‘ಬೈಕಂಪಾಡಿ ಕೈಗಾರಿಕಾ ಪ್ರದೇಶೊಡು ಆಜಿ ಸುರುಮಿ ಫ್ಯಾಕ್ಟರಿಲು ಉಲ್ಲ. ಏಜೆಂಟ್‌ನಕುಲು ಸುರೂಕು ಎಕ್ಸ್ಪೋರ್ಟ್ ಆವೊಂದಿಜ್ಜಿ ಪನ್ಪೆರ್, ಬೊಕ್ಕ ದಾಸ್ತಾನು ದೆತ್ತ್‌ದ್ ದೀತಿನ ಎಚ್ಚ ಉಂಡು ಪಂಡೆರ್, ಇತ್ತೆ ನೀರ್‌ದ ಎತ್ವಾರದ ನೆವನ ಕೊರೊಂದುಲ್ಲೆರ್. ಮಸ್ತ್ ಜನ ಕೇರಳ ಬೊಕ್ಕ ಗೋವಾರ್ದ್ ಮೀನ್ ತರ್ಪುಡಾದ್ ದೆತ್ತ್‌ದ್ ದೀಪಿನ ಮುಕೇನ ಮುಲ್ಪದಕ್ಲೆಗ್ ದಗೆ ಮಲ್ತೊಂದುಲ್ಲೆರ್. ಆಯಿನಾತ್ ಬೇಗೊಡು ಉ್ಂದೆಕ್ ಮಾತ ತಾದಿ ನಾಡೊಡು. ಓಟು ಕರಿನೇ ಪೊಸ ಸರ್ಕಾರ ಉಂಡಾಯಿ ಬೊಕ್ಕ ಇನಯ ಲೆತ್ತ್‌ದ್ ಚರ್ಚೆ ಮನ್ಪರೆಗುಂಡು’ ಪಂದ್ ಚೇತನ್ ಬೆಂಗ್ರೆ ತೆರಿಪಾಯೆರ್. ಈ ಸೀಸನ್ ಎಂಚಲಾ ಕೈದಾವೊಂದು ಬತ್ತ್ಂಡ್. ಗಾಳಿ-ಬರ್ಸ ಸುರುವಾಂಡ ಕಡೆ ಕಡೆಕ್ ಸಮ ಮೀನ್ ಪತ್ತೆರಾಪುಜಿ. ಅಂಚಾದ್ ನನ ದಾದ ಇತ್ತ್ಂಡಲಾ ಟ್ರೋಲಿಂಗ್ ನಿಷೇಧೊದ ಬೊಕ್ಕ ಬರ್ಪಿ ಆಗಸ್ಟ್‌ಡ್ ಕಡಲ್ ಜತ್ತ್‌ದ್ ವೈವಾಟ್ ಚುರ್ಕಾಪುಂಡು. ಅವೆರ್ದ್ ದುಂಬು ಮಸ್ತ್ ಸಮಸ್ಯೆಲೆಗ್ ಪರಿಹಾರ ನಾಡೊನೊಡು ಪಂದ್ ಆರ್ ಪಂಡೆರ್.
ಎಕ್ಸ್ಪೋರ್ಟ್ ಹಬ್ ಆವಡ್
ವಿಮಾನ ಉಂತಡೆ, ಬಂದರ್ ಇಂಚಿನ ಮಾತ ಇತ್ತ್‌ದ್‌ಲಾ ಕುಡ್ಲಡ್ “ಎಕ್ಸ್ಪೋರ್ಟ್ ಹಬ್’ ಇಜ್ಜಂದಿನೆರ್ದಾವರ ಮೀನ್‌ಗಾರಿಕೆ ಉದ್ಯಮೊಡಿತ್ತಿನಕುಲು ಬಾರಿ ಬಙ್ಙ ಬರೊಂದುಲ್ಲೆರ್. ಕುಡ್ಲ ದ ಮೀನ್‌ಲೆನ ಎಚ್ಚಿನ ಪಾಲ್ ಗುಜರಾತ್‌ಡೆ ಬೊಕ್ಕ ಒಂತೆ ಕೊಚ್ಚಿ, ಗೋವಾ, ಮುಂಬೈಡೆ ಎಕ್ಸ್ಪೋರ್ಟ್ ಆಪುಂಡು. ಮೀನು ಸಾಗಾಟೊಗು ಕುಡ್ಲಡ್ ಕಾರ್ಗೊ ಸೌಲಭ್ಯಲಾ ಇಜ್ಜಂದಿನೆರ್ದಾವರ ಅನಿವಾರ್ಯವಾದ್ ಬೇತೆ ಯಲ್ಲ ಪೇಂಟೆಲೆನೇ ತಾಂಗೊಡಾದ್ ಬರ್ಪುಂಡು. ಉ್ಂದೆರ್ದಾವರ ಕರ್ಚಿಲಾ ಎಚ್ಚ ಆಪುಂಡು ಪಂದ್ ರಾಜೇಶ್ ಪುತ್ರನ್‌ ಪಂಡೊಂಡೆರ್.