ಮುಲ್ಕಿ ತಾಲೂಕುಗು ಆಡಳಿತ ಸೌಧ, ಕೋರ್ಟು, ತಾಲೂಕು ಆಸ್ಪತ್ರೆ : ಉಮಾನಾಥ ಕೋಟ್ಯಾನ್

Last updated on August 15th, 2023 at 06:40 pm

ಮುಲ್ಕಿ ತಾಲೂಕುದ ಅಭಿವೃದ್ದಿಗ್ ಬೋಡಾಪಿನ ಮಾತಾ ಯೋಜನೆಲೆನ್ ಕನಪಿನ ಪುನೆಪು ಉಂಡು ಪನ್ದ್ ಮುಲ್ಕಿ ಮೂಡಬಿದ್ರಿದ ಶಾಸಕೆರಾಯಿನ ಉಮಾನಾಥ ಕೋಟ್ಯಾನ್ ಮೇರ್ ತೆರಿಪಾಯೆರ್. ಮುಲ್ಕಿ ಪಿರಾಕ್‌ದ ಕಾಲೊದು ಒಂಜಿ ಪ್ರಸಿದ್ದ ಜಾಗೆ. ಮುಲ್ಕಿದ ತಾಲೂಕು ಆಡಳಿತ ಸೌಧದ ಬೇಲೆ ಸುರು ಆದ್ ಸುಮಾರ್ 60% ಬೇಲೆ ಆತ್ಂಡ್. ಆಯಿನಾತ್ ಬೇಗ ಮಾತಾ ಬೇಲೆ ಮುಗಿತ್‌ದ್ ಮುಲ್ಕಿಡ್ ಮಾತಾ ಸರಕಾರಿ ಸೇವೆಲು ಆಡಳಿತ ಸೌಧೊಡು ತಿಕ್ಕುಲೆಕ್ಕ ಆಪುಂಡು. ಮುಲ್ಕಿ ತಾಲೂಕುಗು ಪೊಸ ಕೋರ್ಟ್ ನಿರ್ಮಾಣ ಮಲ್ಪುನ ಯೋಜನೆ ಉಂಡು. ನಜೀರ್ ಮೇರ್ ಸುಪ್ರೀಂ ಕೋರ್ಟುದ ನ್ಯಾಯಮೂರ್ತಿಲಾದಿಪ್ಪುನಗ ಮೆರೆಗ್ ಮನವಿ ಕೊರ್ತುಂಡು. ಅಂಚೆನೆ ಮುಲ್ಕಿದ ಅಗ್ನಿಶಾಮಕ ಠಾಣೆನ್ ಮಿತ್ತರ್ಜೆಗ್ ಕೊನೊಪುನ ಯೋಜನೆಲಾ ಉಂಡು ಪನ್ದ್ ಪಂಡೆರ್. 100 ಬೆಡ್ ಸಾಮರ್ಥ್ಯ ಉಪ್ಪುನ ತಾಲೂಕು ಆಸ್ಪತ್ರೆನ್ ಮುಲ್ಕಿಡ್ ಕಟ್ಟಾವುನ ಯೋಜನೆ ಉಂಡು. ಕಿನ್ನಿಗೋಳಿ ಪಟ್ಟಣ ಪಂಚಾಯತ್‌ನ್ ಅಭಿವೃದ್ದಿ ಅಂಚೆನೆ ಬಜ್ಪೆ ಪಟ್ಟಣ ಪಂಚಾಯತಿ ಮಿತ್ತರ್ಜೆಗ್ ಕೊನೊಪಿನ ಯೋಜನೆ ಉಂಡು. ವಿಧಾನಸಭಾ ಕ್ಷೇತ್ರೊಡು ಎಚ್ಚಿನ ನೀರ್‌ದ ಸಮಸ್ಯೆ ಉಪ್ಪುನ ಜಾಗೆ ಪನ್ಡ ಮುಲ್ಕಿ. ಕಡಲ್‌ಗ್ ಕೈತಲ್ ಆಯಿನೆರ್ದಾವರ ಮುಲ್ಪ ಉಪ್ಪು ನೀರ್ ಕಂತ್‌ದ್ ಪರ್ಪಿನ ನೀರ್‌ದ ಸಮಸ್ಯೆ ಉಂಡು. ಉಂದೆಕ್ ಶಾಶ್ವತ ಪರಿಹಾರ ಕನಪಿನ ಪುನೆಪು ನಡೆತೊಂದುಂಡು. ಮುಲ್ಕಿನ್ ಒಂಜಿ ಮಾದರಿ ತಾಲೂಕು ಮಲ್ಪುನ ಕನ ಉಂಡು ಪನ್ದ್ ತೆರಿಪಾಯೆರ್.