Last updated on August 3rd, 2023 at 08:23 pm
ಕಾರ್ಲ: ಪೊಂಜೊವು ಒರ್ತಿ ಆತ್ಮಹತ್ಯೆ ಮಲ್ತೊನುನ ಲೆಕ ಮಲ್ದಿನ ಆರೋಪ ಇತ್ತಿನ ಜವನೆ ಒರ್ಯನ ಪುನ ಆತ್ಮಹತ್ಯೆ ಮಲ್ತೊಂದಿನ ಲೆಕ ತಿಕ್ಕ್‌ದಿನ ನಡಕೆ ಈದು ಗ್ರಾಮೊದ ಗುಮ್ಮೆತ್ತುಪಾಡಿಡ್ ನಡತ್‌ದ್ಂಡ್.
ತೀರ್ದಿನಾರೆನ್ ಈದು ಗ್ರಾಮೊದ ನಿವಾಸಿ ಸಂತೋಷ್ ದೇವಾಡಿಗ ಯಾನೆ ಹರಿತನಯ ಪಂದ್ ಗುರ್ತಪತ್ತ್‌ದೆರ್.
ಕಾರ್ಲದ ಮಾರ್ಕೆಟ್ ರೋಡ್‌ಡುಪ್ಪುನ ಮಹಿಳಾ ಕೋ- ಆಪರೇಟಿವ್ ಬ್ಯಾಂಕ್‌ಡಾ ಆಫೀಸ್ ಅಟೆಂಡರ್ ಆದಿತ್ತಿನ ಪ್ರಮೀಳಾ ಪನ್ಪಿನಾರ್ ಜುಲೈ14ತಾನಿ ಆಫೀಸ್‌ಡೇ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ದಿತ್ತೆರ್. ಪ್ರಮೀಳಾ ಜೂವ ಗೆತ್ತೊನರೆ ಆರೆನ ಕಂಡನಿ ನರೇಶೆರೆನ ದೂರೊದ ಸಂಬಂಧಿ ಸಂತೋಷ್ ದೇವಾಡಿಗೆ ಪನ್ಪಿನಾಯೆ ಕಾರಣ. ಆಯೆ ಕಾಸ್ ಕೊರೊಡೂಂದು ಕಿರುಕುಳ ಕೊರೊಂದಿತ್ತೆ ಪಂದ್ ಪ್ರಮೀಳಾನ ಪಲಯೆ ಕಾರ್ಲ ಸ್ಟೇಷನ್‌ಡ್ ಒಯಿಲ್ ಕೊರ್ದಿತ್ತೆರ್. ಆ ಪ್ರಕಾರ ಸಂತೋಷ್‌ನ ಮಿತ್ತ್ ಕಾರ್ಲ ನಗರ ಪೊಲೀಸ್ ಸ್ಟೇಶನ್‌ಡ್ ಐಪಿಸಿ ಸೆಕ್ಷನ್ 306ತ ಅಡೀಟ್ ಆತ್ಮಹತ್ಯೆ ಮನ್ತೊನುನ ಲೆಕ ಮಲ್ದಿನ ಪ್ರಕರಣ ದಾಕಲಾದಿತ್ತ್ಂಡ್. ಅವೆರ್ದ್ ಬೋಕ್ಕ ಸಂತೋಷ್ ದೆಂಗ್‌ತಪ್ಪಾದಿತ್ತೆ. ಕೋಡೆ ಸಂತೋಷ್‌ನ ಪುನ ಬಲ್ಲ್ ಪಾಡೊಂದಿನ ಸ್ಥಿತಿಟ್ ತಿಕ್ಕ್‌ದ್ಂಡ್ ಪಂದ್ ಪೋಲೀಸೆರ್ ತೆರಿಪಾದೆರ್.
ಈ ಪ್ರಕರಣೊದ ಬಗ್ಗೆ ಕಾರ್ಲ ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.