Last updated on August 3rd, 2023 at 08:25 pm
ಚಂದ್ರಯಾನ-3 ಭಾರತದ ಚಂದ್ರನಡೆ ಉಂದು ಮೂಜನೇ ಪಜ್ಜೆ. 3921 ಕೆಜಿ ದುನ್ನದ ಒತ್ತುಗ್ರಹ 4 ಲಕ್ಷ ಕಿಲೋ ಮೀಟರ್ ದೂರ ಪೋವರೆ ತಯಾರಾದುಂಡು.
ಆಂಧ್ರಪ್ರದೇಶದ ಶ್ರೀಹರಿಕೋಟಾದ ಬಂಗಾಳ ಕೊಲ್ಲಿ ಕಡಲ ಕರೆಟ್ ಮಿತ್ತರ್ಮೆ ಆತಿನ ಭಾರತದ ‘ಬಾಹುಬಲಿ’ ನನ ದಾನೆ ಒತ್ತುಗ್ರಹೊನು ಪತೊಂದು ಅಕ್ಕಸೊಗು ರಾವರೆ ಕಾತೊಂದುಂಡು.
ಇನಿ ಮಧ್ಯಾಹ್ನ 2:35ಕ್ಕ್ ನಮ್ಮ ದೇಶದ ಮೂಜನೇ ಚಂದ್ರಯಾನದ ಪ್ರಯಾಣ ಸುರು ಆಪುಂಡು. ಭಾರತದ ಸುರುತ ಚಂದ್ರಯಾನ 2008ಡು ಆದಿತ್ತ್ಂಡ್. ಇತ್ತೆದವು ಮೂಜನೆತ್ತ, ಬಾಹುಬಲಿ ರಾಕೆಟ್ ಗ್ Launch Vehicle Mark 3(LM-3) ಪನ್ದ್ ಪುದರ್ ಕೊರ್ತೆರ್. ಉಂದು 642 ಟನ್ ದುನ್ನ ಉಂಡು. 642 ಟನ್ ಪನ್ಡ 130 ಆನೆಲೆನ್ ಒಟ್ಟು ಪಾಡ್ಂಡ ಏತ್ ದುನ್ನ ಆಪುಂಡಾ ಆತ್! ಬಾರೀ ಬಯಂಕರ ರಾಕೆಟ್ ಉಂದು, ಉಂದೆತ ಉದ್ದ 43.5 ಮೀ. ಈ ರಾಕೆಟ್ ಗ್ ಒತ್ತುಗ್ರಹೊಕುಲೆನ್ ಮಿತ್ತ್ ಕೊನೊಪಿನೆಟ್ಟ್ ಉಂದು ಆಜನೇ ಪಯಣ, ಇದ ಮುಟ್ಟ ಒರಲಾ ಈ ರಾಕೆಟ್ ತೆಟ್ಟಿನ ಇಜ್ಜಿ!
ಚಂದ್ರನ ತೆನ್ಕಾಯಿ ಮುನೆಟ್ ನಸೇಟ್ ಜಪ್ಪುನೆತ್ತ ಉದ್ದೇಶೊಡು ಮಲ್ತಿನ ವೈಜ್ಞಾನಿಕ ಮಿಷನೇ ನಮ್ಮ ಚಂದ್ರಯಾನ-3. ಈ ಒತ್ತುಗ್ರಹ 7 ಉಪಕರೊಣೊಲೆನ್ ತನ್ನೊಟ್ಟುಗು ಕೊನೊಂದುಂಡು. ಭಾರತ ಎಡ್ಡೆಡ್ ಅಡೆಗ್ ಎತ್ತ್ಂಡ ಇಡೀ ವಿಶ್ವೊಡೇ ನಮ್ಮ ದೇಶ ಚಂದ್ರನ ಮಿತ್ತ್ ನಸೇಟ್ ಜತ್ತಿನ ದೇಶೊಲೆಡ್ 4ನೇತ್ತ ಆಪುಂಡು. ಇದಮುಟ್ಟ ಅಮೇರಿಕಾ, ರಷ್ಯಾ, ಚೈನಾ ಬುಡುಂಡ ಬೇತೆ ಏರ್ಲಾ ಇಂಚಿನ ಪುನೆಪು ಬೈಜೆರ್.
ಮಾತಾ ಸಮ ಆಂಡ ಆಗಸ್ಟ್ 23ಕ್ಕ್ ವಿಕ್ರಮ್ ಲ್ಯಾಂಡರ್ ಬೊಕ್ಕ ಪ್ರಗ್ಯಾನ್ ರೋವರ್ ಚಂದ್ರನ ಮಿತ್ತ್ ಜಪ್ಪುಂಡು. ಚಂದ್ರನ ಮಿತ್ತ್ ದ ಮಣ್ಣ್, ಚಂದ್ರನ ಮಿತ್ತ್ ದ ಪಸಂದ್ರ, ಚಂದ್ರನ ಏರ್ ತಗ್ಗ್ ದ ಬಗೆಟ್ ಈ ಮಿಷನ್ ಡ್ ಅಧ್ಯಯನ ನಡಪುಂಡು.
ವಿಕ್ರಮ್ ಲ್ಯಾಂಡರ್ ಬೊಕ್ಕ ಪ್ರಗ್ಯಾನ್ ರೋವರ್ ರಡ್ಡ್‌ಲಾ ಭಾರತದ ಕೊಡಿನ್ ಅಂಚೆನೆ ಕ್ಯಾಮರೊನು ಪತೊಂದು ಪೋವರೆ ಉಂಡು. ಎಡ್ಡೆಡ್ ಚಂದ್ರನ ಮಿತ್ತ್ ಎತ್ತಿನೇ ರೋವರ್ ಬೊಕ್ಕ ಲ್ಯಾಂಡರ್ ಭಾರತದ ಕೊಡಿತೊಟ್ಟುಗು ಸೆಲ್ಫಿಲಾ ಕಡಪುಡುಂಡು.
ಸುರುತ ಚಂದ್ರಯಾನ 2008ಡು ನಡತಿನ, ಉಂದು ಚಂದ್ರನ ಸುತ್ತ ಸುತ್ತೊಂದಿತ್ತ್ಂಡ್. ಉಂದು ಮಿಷನ್‌ದ ಅರ್ದೊಡೇ ಉಂತುಂಡು ಆಂಡ ಮಲ್ಪೊಡಾಯಿನ ಬೇಲೆನ್ ಮಲ್ದಿತ್ತ್ಂಡ್. ಚಂದ್ರೆ ಪಡೀರ್ ಬೂರಿನ ಜಾಗ ಅತ್ತ್ , ಆಯನ ಮಿತ್ತ್ ನೀರ ಪಸೆ ಉಂಡು ಪನ್ದ್ ಈ ಚಂದ್ರಯಾನ ತೆರಿಪಾದಿತ್ತ್ಂಡ್. ಉಂದು ಇಡೀ ವಿಶ್ವದ ಇತಿಹಾಸೊನೇ ಬದಲ್ತಿತ್ತ್ಂಡ್.
ರಡ್ಡನೇ ಚಂದ್ರಯಾನ 2019ಡು ನಡತ್ಂಡ್. ಉಂದು ಇತ್ತೆಲಾ ಚಂದ್ರನ ಸುತ್ತ ಸುತ್ತೊಂದುಂಡು. ಆಂಡ ವಿಕ್ರಮ ಬೊಕ್ಕ ಪ್ರಯಾಗ್ ಬಂಡಿಲು ನನ ದಾನೆ ಚಂದ್ರನ ಮಿತ್ತ್ ಜಪ್ಪೆೊಡು ಪನ್ನಗನೇ ಕ್ರಾಶ್ ಆದಿತ್ತ್ಂಡ್. ಸಮ ಟೆಸ್ಟ್ ಮಲ್ಪಂದೆ ಕಡಪುಡಿನೆರ್ದ್ ಇಂಚ ಆದಿತ್ತ್ಂಡ್ ಅಂಚೆನೆ ಕಡೇತ ಪೊರ್ತುಡು ಮಲ್ತಿನ ಕೆಲವು ಪಗತೆಲೆರ್ದ್ ಅಂಚ ಆಂಡ್ ಪನ್ದ್ ಇಸ್ರೋದ ಚಂದ್ರಯಾನ ಪ್ರೋಗ್ರಾಮ್‌ದ ಗುರ್ಕಾರ್ಲು ತೆರಿಪಾದಿತ್ತೆರ್. ಈ ಸಲ ಮಾತಲಾ ಸಮ ಉಂಡು ಪನ್ಪಿ ಆತ್ಮ ವಿಶ್ವಾಸೊಡು ನಮ್ಮ ರಾಕೆಟ್ ಪಿದಡೊಂದುಂಡು. ಈ ಮಿಷನ್‌ಗ್ ಕಾಲಿ ಭಾರತ ಮಾತ್ರ ಅತ್ತ್ ಇಡೀ ವಿಶ್ವನೇ ತೂವೊಂದುಂಡು. ಎಡ್ಡೆಡ್ ಈ ಮಿಷನ್ ಆವಡ್ ಪನ್ದ್ ತುಳುನಾಡ ದೈವೊಲೆಡ ನಟ್ಟೊನುಗ.