Last updated on August 3rd, 2023 at 08:25 pm
ತುಳುವ ಬೊಳ್ಳಿದೋಟೊಡು ಒಂಜಿ ಇಸೇಸವಾಯಿನ ಪ್ರಯೋಗ ‘ಪಡ್ಡಾಯಿ’. ಲೋಕೊಡೇ ಪುದರ್‌ಪೋತಿನ ಮಾಮಲ್ಲ ನಾಟಕಟಾರೆ ವಿಲಿಯಮ್ ಶೇಕ್ಸ್‌ಪಿಯರ್‌ನ ಮ್ಯಾಕ್‌ಬೆತ್‌ಗ್ ಪೊರ್ಲುಡೆ ತುಳುತ ಕಮ್ಮೆನ ಗೋಡ್ಯಾದ್ ಮುಖ್ಯವಾದ್ ಮರಕ್ಕಲೆರೆನ ಜೀವನಶೈಲಿನ್ ನಡುಟು ದೀವೊಂದು, ಆಟ-ಕೋಲದ ಸೆಬಿ ಸೇರಾದ್ ಮಲ್ದಿನ ಚಿತ್ರೊನೇ ಈ ಪಡ್ಡಾಯಿ. ಒಂಜಾತ್ ವಿಶ್ಲೇಷಕೆರೆನ ಲೆಕ್ಕೊಡು ಮ್ಯಾಕ್‌ಬೆತ್‌ನ್ ಈತ್ ಎಡ್ಡೆಡ್ ಏರ್ಲಾ ಕುಡೊಂಜಿ ಪರತಿರಿಕ್ ಪಗತ್‌ದಿಪ್ಪಯೆರ್.
ಈ ಪಿಚ್ಚರ್ದ ಪುಗರ್ತೆಗ್ ಇಂದೆಕ್ ತಿಕ್ಕ್‌ದಿನ ಮಾನಾದಿಗೆಲೇ ಪುರಪು. ರಾಷ್ಟ್ರ ಚಲನಚಿತ್ರ ಪ್ರಶಸ್ತಿಡ್ ‘ಅತ್ಯುತ್ತಮ ತುಳು ಚಿತ್ರ’ ಮಾನಾದಿಗೆ, ರಾಜ್ಯ ಚಲನಚಿತ್ರ ಪ್ರಶಸ್ತಿಡ್ ಮೂಜನೇ ‘ಅತ್ಯುತ್ತಮ ಚಿತ್ರ’ ಮಾನಾದಿಗೆಲು ಪಡ್ಡಾಯಿಗ್ ತಿಕ್ಕ್‌ದ. ಏಳೆರ್ದ್ ಮಿತ್ತ ಚಲನಚಿತ್ರೋತ್ಸವೊಲೆಗ್ ಈ ಪಿಚ್ಚರ್ ಅಜತ್‌ಬೈದಿತ್ತ್ಂಡ್.
2018ನೇ ಜುಲೈ 13ಕ್ ಬುಡುಗಡೆ ಆತಿನ ಈ ಪಿಚ್ಚರ್‌ಗ್ ಇನಿಕ್ ಐನ್ ವರ್ಸ ಆಪುಂಡು. ಪೊಸ ಪೊಸ ಕಲಾವಿದೆರೇ ದಿಂಜಿದಿತ್ತಿನ ಈ ಪಿಚ್ಚರ್ದ ನಿರ್ದೇಶನ ಮಲ್ದಿನಾರ್ ಅಭಯಸಿಂಹೆರ್. ಇಂದೆತ ಸಂಕಲನೊನು ಪ್ರಶಾಂತ್ ಪಂಡಿತ್ ಬೊಕ್ಕ ಸಂಗೀತೊನು ಮಣಿಕಾಂತ್ ಕದ್ರಿ ಮಲ್ದೆರ್. ಮೋಹನ್ ಶೇಣಿ, ಬಿಂದು ರಕ್ಷಿದಿ, ಚಂದ್ರಹಾಸ್ ಉಳ್ಳಾಲ್, ಗೋಪಿನಾಥ್ ಭಟ್, ಅವಿನಾಶ್ ರೈ, ಸದಾಶಿವ ನೀನಾಸಂ, ಶ್ರೀನಿಧಿ ಆಚಾರ್, ಪ್ರಭಾಕರ್, ರವಿ ಭಟ್, ವಾಣಿ, ಮಲ್ಲಿಕಾ ಇಂಚೆನೇ ನನಲಾತ್ ಕಲಾವಿದೆರ್ ಪಡ್ಡಾಯಿಡ್ ಬಣ್ಣ ಪೂಜಿದೆರ್.