Last updated on August 20th, 2023 at 07:32 am
ಕಂಜೆಕ್ಟಿವಾ ಪನ್ಡ ಕಣ್ಣ್‌ದುಲಾಯಿ ಉಪ್ಪುನ ಒಂಜಿ ಪೊರೆ. ಉಂದೆಕ್ ಆಪಿನ ಸೋಂಕು ಕಣ್ಣ್ ಬೇನೆಗ್ ನೆವನ ಆಪುಂಡು. ಈ ಪೊರೆಟ್ ಉಪ್ಪುನ ಎಲ್ಯ ಎಲ್ಯ ನರಕೊಲು ನಿಗ್‌ರ್‌ದ್ ಕಣ್ಣ್ ದ ಬೊಲ್ಯೆನೆದ ಜಾಗೆ ಕೆಂಪು ಆಪುಂಡು. ಈ ಕಣ್ಣ್ ಬೇನೆನ್ ಕಂಜೆಕ್ಟಿವೈಟಿಸ್ ಪನ್ದ್ ಪನ್ಪೆರ್.
ಉಂದು ಎಚ್ಚಾದ್ ವೈರಸ್ ಸೋಂಕುರ್ದ್ ಆಪುಂಡು. ಆಂಡ ಕೆಲವೊರ ಬ್ಯಾಕ್ಟೀರಿಯಾರ್ದ್ ಲಾ ಆಪಿನ ಸಾಧ್ಯತೆ ಉಂಡು. ಉಂದು ಬತ್ತ್ಂಡ ಕಿರಿ ಕಿರಿ, ಬೇನೆ ಆಂಡಲ ಕಣ್ಣ್ ದ ದಿಟ್ಟಿಗ್ ಉಂದು ತೊಂದರೆ ಮಲ್ಪುಜಿ. ಎಲ್ಯ ಮರ್ದ್ ದೆತೊನ್ದು ಕಣ್ಣ್ ಕಂತುನ, ಕಿರುಂಬುನೆನ್ ಬೇಗ ಕಮ್ಮಿ ಮಲ್ತೊನೊಲಿ. ಉಂದು ಪರಡಪನ ಸೀಕ್ ಆಯಿನೆರ್ದಾವರ, ಬೇಗ ಮರ್ದ್ ಮಲ್ತಿನಾತ್ ಎಡ್ಡೆ.
ಸೀಕ್‌ದ ಲಚ್ಚನೊಲು : ಒಂಜಿ ಇಜಿಂಡ ರಡ್ಡ್ ಕಣ್ಣ್ ಲಾ ಕೆಂಪು ಆಪಿನಿ. ಒಂಜಿ ಇಜಿಂಡ ರಡ್ಡ್ ಕಣ್ಣ್ ಲಾ ಕಿರುಂಬುಲೆಕ್ಕ ಆಪಿನಿ. ಕಣ್ಣ್ ಬಾಪುನು, ಕಂತುನು, ಪುರ್ಕು ಕಟ್ಟುನೆರ್ದ್ ಕಾಂಡೆ ಲಕ್ಕ್ ನಗ ಕಣ್ಣ್ ದೆರ್ಪರೆ ಬಂಗ ಆಪಿನಿ. ಕಣ್ಣ್‌ಡ್ ನೀರ್ ಜಪ್ಪುನು ಅತ್ತಂದೆ ಲೈಟ್ ತೂನಗ ಕಣ್ಣ್ ಬೇನೆ ಆಪಿನಿ ಉಂದು ಪೂರಾ ಲಚ್ಚನೊಲು.
ಕಣ್ಣ್‌ಡ್ ದಾದನಾ ತಿಕೊಂದಿನಲೆಕ್ಕ ಆಪಿನಿ, ಕಣ್ಣ್ ತೋಜಂದಿಲೆಕ್ಕ ಆಪಿನ ಮಿನಿ ಇತ್ತ್ಂಡ ತಾಪುರ್ತೊಪು ಡಾಕ್ಟರೆನ್ ತೂವೊಡು. ಈ ಕಣ್ಣ್ ಬೇನೊದ ಲಚ್ಚನೊಲು 1 ದಿನೊಟು ಸಮ ಆವೊಂದು ಬತ್ತ್‌ಜಿಡಲಾ ಡಾಕ್ಟರ್‌ನಡೆ ಪೋಪಿನ ಎಡ್ಡೆ.
ಪಗರಂದಿಲೆಕ್ಕ ಎಂಚ ತೂಪಿನಿ?
ಈ ಸೀಕ್ ಪಗರಂದಿಲೆಕ್ಕ ತೂವೊಡಾಂಡ ಒಂತೆ ಒತ್ತರೆ ಕುಲ್ಲೊಡಾಪುಂಡು. ನಿಕ್ಲೆನ ಕೈಟ್ ಅಪಗಪಗ ಕಣ್ಣ್ ಮುಟ್ಟೊಂದುಪ್ಪಡೆ. ಕೈನ್ ಅಪಗಪಗ ದೆಕ್ಕೊಂದುಪ್ಪುಲೆ. ಸಮ ಅರ್ದ್‌ದಿನ ಎಡ್ಡೆ ಬೈರಾಸ್ ಪೂರಾ ಗಲಸ್‌ಲೆ. ದಿನಾಲ ಕುಂಟು ಅರ್ದ್‌ಲೆ. ನಿಕ್ಲೆನ ಕುಂಟುಲೆನ್ ಕುಡೊರಿನೆಟ್ಟುಗು ಪಟ್ಟೊನಡೆ. ದುಂಬು ಪಾಡೊಂದಿತ್ತಿನ ಕಣ್ಣ್‌ದ ಮಸ್ಕಾರ ಪೂರಾ ಇತ್ತ್ಂಡ ದಕ್ಕ್‌ಲೆ.
ನೆಂಪು ದೀಲೆ, ಈ ಕಣ್ಣ್ ಬೇನೆದ ಸೀಕ್, ಸೀತೊರ್ದುಲಾ ಪಕ್ಕ ಪಗರುಂಡು ಅಂಚಾದ್ ಪೂರಾ ಗುನ ಆನಮುಟ್ಟ ಒಡೆಗ್ಲಾ ಪೋವಂದೆ ಇತ್ತ್ಂಡ ಎಡ್ಡೆ. ಸೋಂಕು ಉಪ್ಪುನಗ ಎರೆನ್ಲಾ ಮುಟ್ಟರೆ ಪತ್ತರೆ ಪೋವೊಡ್ಚಿ.
ಬೊಕ್ಕ ಕಾಲಿ ಕಣ್ಣ್ ಬೇನೆದಕಲೆನ್ ತೂಂಡ ನಮಕ್ ಪಗರುಂಡು ಪನ್ಪಿನವು ಸತ್ಯೊಗು ದೂರದ ಪಾತೆರ. ಅಂಚ ಪಗರುಜಿ, ಅಂಚ ಪನ್ದ್ ಅಕಲೆನ ಕೈತಲ್ ಪೋದು ಕುಲ್ಲಡೆ. ಅಕುಲು ಮುಟ್ಟಿನ ಪತ್ತಿನ ಕುಂಟು ಸೊತ್ತುಲೆರ್ದ್ ಲಾ ಪಗರುನ ಸಾದ್ಯತೆ ಉಂಡು.