ಕುದ್ರೋಳಿ : ‘ಬಿರುವೆರ್ ಯೋಧೆರ್, ಬೆನ್ನಿದಕುಲು, ಬಿರುವೆರೆನ ಕುಲಶಾಸ್ತ್ರ ಅಧ್ಯಯನ ಆವೊಡು’ ಬಿಲ್ಲವರ ಗುತ್ತು ಬರ್ಕೆಗಳು ಕೃತಿ ಬುಡುಗಡೆ

Last updated on August 28th, 2023 at 10:20 am

ಸಂಶೋಧಕೆ ಬಾಬು ಶಿವ ಪೂಜಾರಿ, ಬಿ.ಎಂ ರೋಹಿಣಿ ಬೊಕ್ಕ ತಂಡದಕುಲು ಗೋಡಿದ್ ಪತ್ತ್ ಪದಿನೈನ್ ವರ್ಸ ಸತತ ಅಧ್ಯಯನ ಮಲ್ತ್ ತುಳುನಾಡ್‌ದ ಸುಮಾರ್ 450 ಬಿರುವೆರೆನ ಗುತ್ತು, ಬರಿಕೆ, ಜನನ, ಬೂಡುದ ಇಲ್ಲಲೆನ ಅಪೂರ್ವ ಮಾಹಿತಿ ಉಪ್ಪುನ ಬಿಲ್ಲವರ ಗುತ್ತು ಬರ್ಕೆಗಳು ಪನ್ಪಿನ ಸಂಶೋಧನಾ ಕೃತಿ ಕೋಡೆ, 27 ಆಗಸ್ಟ್ 2023ಕ್ಕ್ ಕುದ್ರೋಳಿಡ್ ಬುಡುಗಡೆ ಆಂಡ್.

ಈ ಪೊರ್ತುಡು ಸಮಾಜದ ಪೆರಿಯ ನಾಯಕೆರಾಯಿನ ಜನಾರ್ಧನ ಪೂಜಾರ್ಲು, ವಿಧಾನಪರಿಷತ್ ಸದಸ್ಯೆರಾಯಿನ ಬಿ.ಕೆ ಹರಿಪ್ರಸಾದ್, ಮುಲ್ಕಿ ಬೆದ್ರದ ಶಾಸಕೆರಾಯಿನ ಉಮಾನಾಥ ಕೋಟ್ಯಾನೆರ್, ವಿನಯ ಕುಮಾರ್ ಸೊರಕೆ, ದಿನೇಶ್ ಅಮೀನ್ ಮಟ್ಟು, ಗಣೇಶ್ ಅಮೀನ್ ಸಂಕಮಾರ್, ಪದ್ಮರಾಜ್ ಇಂಚಿನ ಸುಮಾರ್ ಗಣ್ಯೆರ್ ಮಿತ್ತ ಚಾವಡಿಡ್ ಇತ್ತೆರ್.

ಬೂಕು ಬರೆತಿನ ಬಾಬು ಶಿವ ಪೂಜಾರಿಲು ಪಾತೆರ್ದ್, ಬಿಲ್ಲವೆರ್ ಕಲಿ ಮೂರುನಕುಲು ಪನ್ದ್ ಅಕಲೆನ್ ವ್ಯವಸ್ಥಿತವಾದ್ ಸಮಾಜೊರ್ದು ದೂರ ದೀಪಿನ ಷಡ್ಯಂತ್ರ ನಡದಿತ್ತ್ಂಡ್. ಕಲಿ ಮೂರುನವು ಕಾಲಿ ಉಪವೃತ್ತಿ ಮಾತ್ರ, ಬಿಲ್ಲವೆರ್ ದಂಡ್ ಕಟ್ಟ್ ದ್ ಕೊಲಲ ಸಾದಿನ ವೀರೆರ್, ಬಿಲ್ಲವೆರ್ ಬೆನ್ನಿದಕುಲು. ವಿಜಯನಗರದ ಮಲ್ಲ ಅರಸೆಯಾಯಿನ ಕೃಷ್ಣದೇವರಾಯೆಲಾ ಬಿರುವೆರೆ ವಂಶೊಗು ಸೇರಿನಾಯೆ ಪನ್ಪಿನ ಸಂಶೋಧನೆ ಮಲ್ದ. ಆಳುಪೆರ್ಲಾ ಮೂಲೊಡು ಬಿಲ್ಲವೆರೇ. ಬಿಲ್ಲವೆರೆನ ಇತಿಹಾಸ ಪೆಜ್ಜಿದ್ ಬರೆಪಿನ ಕಜ್ಜ ಆವೊಡು. ಸಾಹಿತ್ಯ ಪ್ರಜ್ಞೆನ್ ಬುಲೆಪಾವೊಡು ಪನ್ದ್ ಪನ್ಡೆರ್.

ಈ ಪೊರ್ತುಡು ಪಾತೆರಿನ ಬಿ.ಕೆ ಹರಿಪ್ರಸಾದೆರ್ ಜನಾರ್ಧನ ಪೂಜಾರಿನ ಕಾಲೊಡು ಒಂಚ ಸಮಾಜ ದುಂಬು ಬತ್ತ್ಂಡ್, ಒಂಜಿ ಕಾಲೊಡು ತುಳುನಾಡ್ ದ ಆಜಿ ಶಾಸಕೆರ್ ಬಿಲ್ಲವೆರ್ ಆದಿತ್ತೆರ್. 30% ವೋಟು ಬಿಲ್ಲವೆರೆನ ಉಂಡು ಆಂಡಲ ಪಾರ್ಟಿಲೆಡ್ ಒಂಜಿ ರಡ್ಡ್ ಸೀಟು ದೆತೊನುನವೇ ಮಲ್ಲ ಆತ್ಂಡ್ ಪನ್ಡೆರ್. ಕುಡ್ಲ ಯುನಿವರ್ಸಿಟಿದ ನಾರಾಯಣಗುರು ಅಧ್ಯಯನ ಪೀಠೊಗು ಬೋಡಾಪಿನ ಸೌಕರ್ಯ ಒದಗಾದ್ ಬಿಲ್ಲವೆರೆನ ಕುಲಶಾಸ್ತ್ರದ ಅಧ್ಯಯನ ಮಲ್ಪಾವೊಡು ಪನ್ದ್ ಪನ್ಡೆರ್.

ಗುತ್ತು ಬರಿಕೆದ ಬೂಕು ಬರೆಯಿನ ಒತ್ತು ಸಂಶೋಧಕಿ, ಡಾ॥ಬಿ.ಎಂ ರೋಹಿಣಿ ಮೇರ್ ಪಾತೆರ್ದ್, ದುಂಬುದ ಕಾಲೊಡು ತಿಕ್ಕಿನ ಸೀಮಿತ ಸ್ವಾತಂತ್ರ್ಯೊನು ಗಲಸ್ ದ್ ಪೊಣ್ಣುಲು ಎಂಚ ದುಂಬು ಬೈದೆರ್ ಪನ್ದ್ ತೆರ್ಪಾದೆರ್. ಬೊಳ್ಳಕ್ಕು ಬೈದೆತಿ, ದೇಯಿ ಬೈದೆತಿ ಪನ್ಪಿ ಪುದರ್ ದ ಗುತ್ತುದ ಪೊಣ್ಣುಲು ದಂಡ್ ಪತೊಂದಿ ಕೊಲಲ ಜಯಿತಿನಕುಲು ಪನ್ದ್ ಬಿರುವ ಪೊಣ್ಣುಲೆನ ಪರಂಪರೆತ ಬಗೆಟ್ ತೆರಿಪಾಯೆರ್.

ಈ ಬೂಕು ನವಕರ್ನಾಟಕ ಪ್ರಕಾಶನದ ಮಳಿಗೆಡ್ ತಿಕ್ಕುಂಡು ಪನ್ದ್ ತೆರಿದ್ ಬೈದ್ಂಡ್.