Last updated on August 6th, 2023 at 10:31 pm
ಪಡ್ಡಾಯಿ ಬಂಗಾಳೊದ ಮೋಟಾರ್ ಅ್ಯಕ್ಸಿಡೆಂಟ್ ಪ್ರಕರಣೊದ ಸಾಕ್ಷಿಲು ಹಿಂದಿ ಬರಂದಿನೆರ್ದಾವರ ಪ್ರಕರಣೊನು ಯುಪಿರ್ದ್ ಸಿಲಿಗುರಿಗ್ ವರ್ಗಾವಣೆ ಮನ್ಪರೆಗ್ ಸೋಮಾರ ಸಂದಾದಿತ್ತಿನ ಬಿನ್ನಪುನು ಸುಪ್ರೀಂ ಕೋರ್ಟ್ ತಿರಸ್ಕರಿತ್‌ದ್, ಹಿಂದಿ ಭಾರತೊದ ರಾಷ್ಟ್ರೀಯ ಭಾಷೆ ಪಂದ್ ಪಂತ್ಂಡ್. ಆಂಡ, ಸಂವಿಧಾನೊದ ಪ್ರಕಾರ ಭಾರತೊಗು ರಾಷ್ಟ್ರೀಯ ಭಾಷೆ ಇಜ್ಜಿ. ಸಂವಿಧಾನೊದ ಎಣ್ಮನೇ ಪರಿಚ್ಛೇದೊದ ಅಡಿಟ್ ಬಂಗಾಳಿ, ಕನ್ನಡೊ, ತಮಿಳ್, ತೆಲ್‌ಗ್ ಮಲ್ಯಾಲಿ ಸೇರ್ದ್ 22 ಅಧಿಕೃತ ಭಾಷೆಲು ಉಲ್ಲ. ನ್ಯಾಯಮೂರ್ತಿ ದೀಪಂಕರ್ ದತ್ತಾ ಪನ್ಪಿನಾರ್ ತನ್ನ ಆದೇಶೊಡು, “ಕಮ್ಮಿಡ್ 22 ಅಧಿಕೃತ ಭಾಷೆಲು ಉಲ್ಲ. ಆಂಡಲಾ, ಹಿಂದಿ ರಾಷ್ಟ್ರ ಭಾಷೆ ಆದುಪ್ಪುನೆರ್ದಾವರ, ಅರ್ಜಿದಾರೆರ್ ಹಾಜಿರ್ ಮನ್ಪುನ ಸಾಕ್ಷಿಲೆನ್ ಹಿಂದಿಡೇ ತೆರಿಪಾವೆರೆ ಎದುರು ತೂಪ” ಪಂದ್ ಪನ್ತೆರ್.
ಯುಪಿ ದ ಫರುಕ್ಕಾಬಾದ್‌ಡುಪ್ಪುನ ಮೋಟಾರ್ ಅಪಘಾತೊದ ಹಕ್ಕು ನ್ಯಾಯಮಂಡಳಿಡ್ ಬಾಕಿ ಒರಿದಿನ ಮೋಟಾರ್ ಅಪಘಾತೊ ಪ್ರಕರಣೊನು ಪಡ್ಡಾಯಿ ಬಂಗಾಳೊದ ಡಾರ್ಜಿಲಿಂಗ್‌ದ ನ್ಯಾಯಮಂಡಳಿಗ್ ವರ್ಗಾವಣೆ ಮನ್ಪೆರೆ ಕೇಂದ್ ಸಂದಾಯಿನ ಅರ್ಜಿನ್ ನ್ಯಾಯಮೂರ್ತಿ ದತ್ತಾ ವಿಚಾರಣೆ ಮಲ್ತೊಂದಿತ್ತೆರ್. ಸಿಲಿಗುರಿಟ್ ಅ್ಯಕ್ಸಿಡೆಂಟ್ ನಡತಿನೆರ್ದಾವರ ಡಾರ್ಜಿಲಿಂಗ್ ನ್ಯಾಯಾಧಿಕರಣೊಡು ವಿಚಾರಣೆ ಮಲ್ತ್ಂಡ ಅನುಕೂಲ ಆಪುಂಡು ಪಂದ್ ಅರ್ಜಿದಾರೆರ್ ಕೇಂದಿತ್ತೆರ್. ಅರ್ಜಿದಾರೆರೆನ ಮಾತಾ ಸಾಕ್ಷಿಲು ಸಿಲಿಗುರಿದಕುಲೇ ಆದುಪ್ಪುನೆರ್ದಾವರ ಉತ್ತರ ಪ್ರದೇಶ ನ್ಯಾಯಮಂಡಳಿಡ್ ಭಾಷೆ ಅಡ್ಡ ಆವು ಪಂದ್ ಬಿನ್ನಪುಡು ಪಂದಿತ್ತೆರ್.
ಆಂಡ, ನ್ಯಾಯಮೂರ್ತಿ ದತ್ತಾ ಈ ಬಿನ್ನಪುಗು ಮಣೆ ಪಾಡಂದೆ, “ಅರ್ಜಿದಾರೆರೆನ ವಾದೊನು ಒತ್ತೊನೊಡಾಂಡ, ಅಕುಲೆನ ಆವೃತ್ತಿನ್ ಬಂಗಾಲಿಡ್ ಪಂಡ್ಂಡ ಬಂಗಾಲಿ ಭಾಷೆ ಬರಂದಿನ ಹಕ್ಕುದಾರೆರೆಗ್ ಬಾರಿ ಬಂಙ ಆಪುಂಡು ಪಂದ್ ಪನ್ತೆರ್.
ರಾಷ್ಟ್ರ ಭಾಷೆ
ಅಧಿಕೃತ ಭಾಷಾ ಕಾಯಿದೆ, 1963 ತ ಪ್ರಕಾರ, ಒಕ್ಕೂಟೊದ ಅಧಿಕೃತ ಉದ್ದೇಶೊಲೆಗ್ ಬೋಡಾದ್, ಸಂಸತ್ತ್‌ದ ವೈವಾಟ್‌ಲೆಗ್ ಬೋಡಾದ್, ಕೇಂದ್ರ ಬೊಕ್ಕ ರಾಜ್ಯ ಕಾಯಿದೆಲೆಗ್ ಅಂಚೆನೇ ಉಚ್ಚ ನ್ಯಾಯಂತಡೆಲೆಡ್ ಕೆಲ ಉದ್ದೇಶೊಲೆಗ್ ಹಿಂದಿ ಬೊಕ್ಕ ಇಂಗ್ಲಿಷ್ ರಡ್ಡ್ ಭಾಷೆಲೆನ್ಲಾ ಸಾರ್ವಜನಿಕೆರೆಗ್ ಉದ್ದೇಶಿತಿನ ಎಚ್ಚಿನ ಆಡಳಿತಾತ್ಮಕ ದಾಕಲೆಲೆಡ್ ಸರ್ಕಾರ ಗಲಸೊಡು ಪಂದ್ ಉಂಡು. ಸುಲಭೊಡು ಪನ್ಪುಂಡ, ಹಿಂದಿ ರಾಷ್ಟ್ರಭಾಷೆ ಅತ್ತ್. 22 ಅಧಿಕೃತ ಭಾಷೆಲೆಡ್ ಒವೆನ್ ಬೋಡಾಂಡಲಾ ಗಲಸೊಲಿ.